今年第一次去旅行，第一次同呢幾個朋友去旅行，事前冇乜點樣plan行程，因為其中一個去過幾次，其餘四人好多年冇去過或者從未去過，今次搭國泰，原因係其中一個唔想搭廉航話D位太迫，我哋去程搭波音777 ，D位一樣係好迫！😅 其中一個朋友用飛行里數換飛，佢換咗商務位，所以去lounge度食早餐，我哋就自己去food court食嘢，再集合分開上機😂😂
飛左三個幾鐘就到，兩點幾就去到，我哋一早book咗架車，車我哋由機場返酒店，先去酒店check-in放低行李，我哋五個人book四間房，大家都要私人空間，又要編埋同一層樓，所以最後俾人編咗喺2樓，雖然關咗窗唔會嘈，但係個街景就唔係太好，而且冬天冇冷氣，對於香港人嚟講係有D焗，不過可以開窗，不過開窗就會嘈甚至有D蚊滋飛入嚟，因為低層，而且對出好多係後巷🥹好友就因為間房太多蚊滋，所以換咗去第二間房上咗去4樓，我就冇開窗，又冇開暖氣都唔覺得焗，放低行李就出去
由酒店行過去明洞，大概10分鐘路程，明洞呢邊好熱鬧，好多街邊檔嘅嘢食，我哋沿路搵吓有乜嘢韓燒，見到有一間Google評分有5分，所以就去試吓，店名叫Daol Charcoal Grilling (Korean BBQ Daol)，我哋叫咗個套餐，不過覺得D肉質麻麻哋，唔知係咪叫套餐D肉係爭D，有D冇乜牛味，有D又好韌，雖然全程有人幫你燒，不過真係唔知佢點樣攞到5分，可能散叫D肉質會好啲都唔定🤷🏻♀️
食完嘢搭地鐵去梨花女子大學，夜麻麻冇靚女睇，條街又靜英英，淨係經過韓國第一間Starbucks，兜咗兩個圈就過返去明洞
大家頭先嗰餐食得唔飽，所以再去搵第二啲嘢食，原本想去食一間麵店，但係佢準備收工，行去附近有條橫巷，有間Myeong Dong porridge ，雖然係食粥，但係都有啲韓國嘢食，我哋坐低叫咗啲嘢食，有魚有豬肉有湯有飯，又叫咗麵同埋煎蛋餅，最緊要填飽個肚，食物就一般，價錢相對較平，今晚我哋未有任何shopping，就返咗酒店先！本來見到有間12層樓高嘅Daiso，不過佢關門啦，所以冇行到就返酒店！
酒店住後感 ：Travelodge Myeongdong Namsan 首爾明洞南山彩鴻酒店酒店距離明洞市中心大概10分鐘路程，如果搭地鐵就要步行一段路先至返到去，酒店附近有啲賣相機嘅舖頭，同埋印刷公司，酒店旁邊已經有間便利店，旁邊幾條街都好多食店，不過呢啲食店都係夜晚先開，附近亦都有幾間咖啡店，基本上返到酒店都冇乜嘢地方好行，房間都算唔使，都有少少空間，不過酒店話冬天佢哋唔會有冷氣提供，對於香港人嚟講就真係有D焗，雖然室外嘅氣溫大概只有九度，但係香港人都係唔習慣開暖氣，好彩可以開窗，不過我哋住2樓，開咗窗就會有啲嘈，而我間房對住對面一間舊屋，屋頂嘅磚瓦都爛晒，所以我都係閂埋個窗簾，整體嚟講酒店都唔錯，都幾新淨，應該係翻新過！酒店只有洗頭水，無護髮素，有沐浴露，冇牙膏牙刷，另外三日先至做一次清潔，所謂嘅清潔只係換毛巾同床單，但係我間房係冇換床單，廁紙用晒亦都冇refill😅 本身廁所入面果兩卷廁紙已經係用剩好少，兩日已經用晒，跟住有一日出門嘅時候見到House keeping，問佢攞咗一卷廁紙換咗，之後另外一卷一路都冇換過🙄
沒有留言:
發佈留言