尋晚一早返咗酒店休息，今日大家都瞓晏少少， 10:00集合走出發，好有尋晚上網search咗幾個地點想去，今日就佢帶路，喺酒店攞咗份地圖，紙本嘅地圖嘅好處就係可以睇嘅範圍大啲，手機就要碌嚟碌去，先去北村行屋村，我哋行過去搭地鐵去安國站，一出地鐵站見到好多警察，好似有D活動，因為好多人嗌口號，不過依稀聽到好似係反中國😅 沿路經過好多商店同食店，不過大部份都未開門，行過一段路之後行過對面，就係北村韓屋村嘅入口，沿路行要行斜路上，呢個行屋村其實係住宅區，所以周圍都有告示叫人哋靜啲，佢只不過係一條古色古香嘅街，當然有唔少人着紅服嚟呢度打卡，沿路經過一間叫做Grains嘅曲奇餅店，佢有得試食，如果盒餅個包裝係一件Hon服咁嘅造型，有男裝同女裝，我諗因為好多人都買女裝，所以男裝做特價，試食咗覺得OK，咁我就買咗兩盒，另外見到佢有期間限定嘅無花果曲奇，問佢有冇得試食，佢話得返塊，其實係¼塊，所以只夠一個人試食，我食咗都覺得OK，所以又買咗兩盒，好有亦都買咗少少嚟做手信，因為佢買滿₩40,000就送一隻杯，我哋買超過咗₩80,000可以送兩隻俾我哋，所以我哋要咗一紅一藍，紅色俾咗好友嘅女朋友，我就要咗隻藍色，其實都唔係太想要，因為屋企好多杯😅
行完呢度，去下一個景點三清洞，睇地圖要行好遠，因為要經過個山路，但係發現有架巴士去到一半路程，起碼唔使行咁遠，所以我哋去搭巴士，大概搭咗兩個站就落車，行到去三清洞，已經12點幾，大家都冇嘢落過肚，所以要去搵嘢食！行過一間貌似牛肉米線嘅店，我哋都唔理啦，入去食咗先，佢食物嘅選擇唔係好多，只係唔同部位嘅牛肉，同埋份量，一人叫咗碗食咗先，呢度嘅牛肉幾好食，反而個米線就有啲淡味，個湯都係牛肉清湯，佢哋覺得冇味，我就覺得OK，除咗米線冇其他嘢食，所以叫店員refill咗啲泡菜俾我哋食😂
食完嘢有返啲力，繼續行，去到三清洞，呢度行一條直路，成條街都有啲靜，見到有一間食店好多人，應該係食韓國傳統麵，不過我哋已經食完麵所以冇再去食，行嗰啲望到裏面有間coffee shop，都幾大間，好簡約風格嘅裝修，有三層樓，店名叫做Four stones，我哋叫咗幾杯嘢飲，又嗌咗幾件cake，上去頂樓度坐吓，不過頂樓都頗大風，但係個view都唔錯，坐咗陣因為太大風吹走晒啲嘢，所以我哋都係入返去室內坐，呢度啲蛋糕好食咖啡好飲，環境又清靜好正好舒服，我又買咗啲咖啡豆，好友就買咗咖啡杯，買完嘢繼續行！
行行吓去咗景福宮出面，對面有間美術館，唔知有咩睇，但係見到樓下有間shop，所以入去行吓，呢度仲有免費locker提供，梗係嗱嗱聲放低晒所有嘢，再去啲shop度睇吓，不過啲嘢都係比較藝術，唔係太吸引，大家志在行吓，去下廁所 😂跟住又繼續行，行咗去仁寺洞一個商場，又去另一個商場行吓，又經過雲峴宮！
最後行返去安國站，去食醬油蟹😋😋 去左呢間叫做大瓦房，好友之前食過話好得，我哋叫咗三隻蟹，因為有兩個話要食一隻，有兩個話食半隻，有一個唔鍾意食，其實一隻都要₩59,000大約 $300 港幣一隻，同香港價錢差唔多，但係靚好多，又多膏，又多肉，好正👍🏻👍🏻👍🏻，另外叫咗五花肉、排骨等，加埋啲配菜都好豐富，蟹攞過嚟嘅時候，大家都嘩嘩聲，跟住狂影相，但係比店員阻止我哋，佢堅持要佢哋擺晒啲嘢先俾我哋影相🙄態度上有啲無禮🥺 隻蟹真係好正，蟹膏撈埋飯又有紫菜好好食，其他食物反而一般，真係淨係嚟食隻蟹就夠😂
食完嘢時間尚早，就落咗去弘大，去睇人哋載歌載舞，又去幫好友睇飾物，買俾佢個仔，不過都睇唔啱，行咗兩個圈，又去食嘢😂😂，去咗一間叫做豬腳小姐，應該呢一邊嚟講幾出名，所以滿晒座，我哋去到啱啱好有張四人枱，唯有坐迫啲，一坐低佢就俾咗煲湯，然後開着個爐，個湯用嚟俾我哋煮麵，佢有一碟生麵，我哋叫咗豬手，佢跟咗一碟沙律，另外叫咗一碟韓式血腸，個豬手都唔錯，咁佢哋話OK因為我冇食，血腸就真係麻麻哋！
食飽又去行街，我哋去咗附近嗰間OLIVE YOUNG shopping，估唔到成班男人都失控咁，呢間OLIVE YOUNG有兩層樓高，班男人係咁幫啲朋友買護膚品，而好友嘅女朋友就最熟啲產品，所以全部叫佢幫手搵，一人一個購物袋，都裝滿左兩袋😆😆，另外見到有啲零食，大家又買咗啲，買得好開心，跟住就返酒店休息喇！
沒有留言:
發佈留言