2023年11-12月東京自駕遊 Day 8 - 銀座、池袋

今日最後一日行程，今晚21:00 機，18:00 還車，所以時間都充裕！酒店check out 後，放晒D行李上車，出發去銀座，經過呢幾日泊車經驗，停車場費用確實要格價，去到銀座就知有幾貴！見到最貴係10分鐘¥550 ，最平30分鐘¥600 ，所以泊左個平嘅！

第一站係期待已久嘅 Le cafe V 係位於銀座 LV 店內的cafe ，去到呢座營光彩色外牆的LV 門口，向店員表明來意去cafe，會叫cafe 的侍應來登記，要留email address ，再掃佢地QR code 攞咗飛先，佢比張飛你，然後話有位會email 比你，跟住話等大約半小時，收到通知後張枱hold 15分鐘！咁我地就去附近行吓先，去搵 Uniqlo 朝聖，行左陣，大約係攞飛之後廿分鐘就收到email 話有位，所以返去餐廳先，轉頭再行過！

去到 LV 要搭lift 上去，上到去先放低件褸比佢地放在衣櫃，入口處有張紅色梳化，旁邊係賣朱古力嘅counter，朱古力個樣好靚，唔知好唔好食，不過價錢一D都唔平，最平買兩塊都要¥3000 !  餐廳嘅面積唔算好大，有一邊係酒吧大約有5-6張高櫈，另一邊係用餐區，我唔知佢會唔會有VIP房喺我哋睇唔到，就咁睇大堂嘅座位見有兩張圓形梳化大枱，有兩排梳化位，可以分開做幾張2-4 人枱，同兩張2人枱，我地坐圓形梳化，見到其實只有一半枱有客，有一半冇人，日本D食肆，好多時有位都要你等！🤷🏻‍♀️ 坐低後一人一份餐牌睇，見到間餐廳同D餐具咁靚，大家都好開心！好興奮！餐牌係英文同日文，不過D名唔知係乜，雖然有D細字詳情，但係冇圖片係好易誤會，同埋要確保係我地想要嘅野，所以都係搵相佢，佢地有D季節性甜品，就show 左sample 在一個show case 內，食物好容易睇餐牌或sample 叫到，飲品就因為唔同飲品有唔同圖案，最想要的LV 圖案只有熱朱古力才有，但我地想飲咖啡，咖啡就只有今期聖誕圖案，係火車同佢地吉祥物 Vivienne ，我地照order 咖啡☕️，食物就叫左hamburger、club sandwich、栗子mont blanc、提子雪糕、millefeuille ，食物質素唔錯，而且賣相都好靚，個個狂影相打咭！📱最後梗係要去一去佢個廁所！😂 唔算好特別，只係好大同幾靚！呢餐埋單都要¥30000 ，好友原本想買朱古力，但係覺得自己唔捨得食，送俾人又太貴，最終都冇買到🤣我哋走嘅時候，已經一點幾，見到得返兩三枱客，唔算好繁忙，或者晚餐時間會多人吧！

食完嘢出返嚟，又再去過 UNIQLO，因為頭先行咗一陣就走咗，依家返去買嘢，我地買咗一D日本限定嘅T恤！買完之後，好友話想去銀座果間篝本鋪，原來在我地泊車的停車場旁邊，去到見到竟然幾個人排緊隊，之前嚟每次都係排好長龍，條龍仲要分開兩段，今次係我見過最少人嘅一次，我哋前面只有六個人，所以好快就入得，原本係分開坐，後來咁啱有人走又坐返埋一齊，我仍然係食黑松露拉麵，佢地都試左，話都係鍾意原味多D，我就覺得黑松露提升咗個白雞湯嘅味，口味嘅嘢都係因人而異🤣 連續食咗兩餐，所以個頭好飽！😄

攞返車之後，就去池袋 Sunshine city 果間Capsule toy store ，話有3000台扭蛋機，其實呢個商場，好啱年青人，除咗扭蛋機仲有盲盒、figure 公仔同一D卡通人物主題嘅商店，例如蠟筆小新、Pokémon 專門店等，而佢個中庭亦都會做一DEvent，今日就有一隊女團做宣傳，我地見到有間Kimura 咖啡店，買左兩杯咖啡，唔好飲🤦🏻‍♀️我哋玩到五點幾先走！

 直接去機場附近還車，預計要一小時多D，好友上車後瞓著左，佢半路突然醒一醒！諗起還車果度收六點，我地Day 1 經歷過六點後攞唔到車嘅教訓，竟然忘記咗佢哋6:00會準時走 🫣🫣🫣🫣，我哋五點幾先喺池袋走，去到機場要大概一個鐘，一定超過六點，所以即刻停埋一邊搵電話打俾嗰間公司叫佢等埋我哋，租車公司果邊竟然話叫我哋取消航班聽日先至還車，因為佢地六點收工😱  我哋堅決拒絕，雖然我地遲到係自己問題，但好難為咗架車改航班，仲要住多晚酒店攞多日假，所以我哋話如果等唔到我哋嘅話，我哋就泊架車喺門口，佢話我哋租咗ETC 未計數，我哋話放低錢喺架車入面，但係大家都唔知ETC 用左幾多錢🤦🏻‍♀️，佢話問一問，問完轉頭就覆我哋話等埋我哋🙏🏻，但不會送我地去機場，呢個問題不大，可以call Uber，如果佢真係唔等我哋嘅話，我哋亦只能夠擺低架車就走，結果我哋 6:50 先去到還車嘅地方😓，佢有三個職員喺度等緊我哋，我哋計返ETC 之餘，仲有趕唔切入返滿油缸俾佢，所以要計返油錢，同埋遲咗一個鐘頭還罰款，當然要比返足錢，鬼叫我地遲咗，不過冇諗過有客未還車佢哋都唔聯絡吓，其實租車公司應該知道好多人，還車後就去機場離開日本，如果唔係佢都唔會安排車送人客去機場，下次真係要提早D攞車同泊車，平時自駕遊都係朋友搞，今次大家都冇經驗，真係搞到一鑊粥🤦🏻‍♀️🤦🏻‍♀️🤦🏻‍♀️🤦🏻‍♂️

我哋call Uber都等咗10分鐘，呢度又凍又大風，上咗車之後，我哋要去T1，司機應該係韓國人，佢喺架車度掛咗啲廣告牌，可以book包車，我地影低佢睇吓有冇機會有人要用，差唔多到機場嘅時候司機問多我哋一次去T1定T2，我哋話T1，佢話我哋call車嗰陣時係留咗T 2😅 真係烏龍百出，好彩司機醒目 👍🏻去到機場都已經七點半，嗱嗱聲寄行李過關，再去食碗拉麵，都已經八點幾，我哋去咗一風堂食拉麵，貪佢快快脆脆，如果唔係就要捱肚餓返到香港先有得食，啱啱好去到登機閘口D人已經上緊機😅 呢個八日旅程就咁完結，總結嚟講，我哋都係玩得好開心！希望下次可以同一個組合再去旅行啦，下次會小心D租車時間🤣🤣