去到機場call 果間 Avis / Budget ，然後等佢哋車我哋去攞車，去攞車嘅地方都差唔多10分鐘車程，去到佢竟然俾唔到我哋訂嗰架 Freed，話會比同類型嘅車 Sienta，但係好明顯呢架係細咗，佢幫我哋check緊有冇辦法搵到車嘅時候，有另外一班人嚟攞車，佢哋遇到同樣嘅情況，不過佢哋就嚴重D，因為佢哋六個人租咗最大最貴果架車 Alphard ，但係而家比低一級嘅車佢地，佢哋唔接受，所以要求佢俾返同款佢哋，我哋就因為冇我哋想要租嗰架，最後就加錢換架大D嘅 Elgrand🤦🏻♀️🤦🏻♀️ 見另外一班人最後都攞到佢哋要嘅車，呢間公司真係麻麻地！
攞咗車之後，即刻出發去迪士尼，因為買咗今日飛，去到已經12點幾！🤦🏻♀️第一次揸車去日本嘅迪士尼，我哋架車泊咗喺最頂嗰層，雖然係比太陽曬住，不過佢呢度有架迪士尼嘅車擺咗喺度俾人影相，我哋當然都要影返幾張！影完相就嗱嗱臨入園！
一入去即刻周圍影相，亦都去咗商店度行咗兩個圈，諗住買premier access，見到有得賣，諗住轉頭問吓好友買邊隻，點知轉頭已經賣晒🤦🏻♀️ 今次個行程都幾多波折🥹 唔理咁多住，佢搵啲嘢食吓先，我哋一心想去船上面嗰間 SS Columbia 餐廳食飯，去到要稍為等一等，等緊嗰陣，好友就去咗買骨付雞肉腸，每次嚟親都要食呢個腸，因為好好味，我哋每人要一條，因為要食飯，唔想食咁飽，等咗幾個字就有位，其實餐廳入邊都有好幾張吉枱，唔知點解硬係要人等位，話要睇吓有冇人取消，咁可能真係好多人取消，我哋一坐低就去洗手間，其實係想問吓職員有冇蛋糕，因為今日係好友嘅生日，想俾個surprise佢，不過佢呢度冇蛋糕，只可以喺甜品度加個生日牌，咁都好過冇！我哋叫咗個聖誕午餐，可以揀頭盤或者湯，我哋要咗兩個頭盤兩個湯，頭盤係四款小食，湯就係腸仔雞肉雜菜湯，我就飲湯，所以唔知頭盤好唔好食，不過好友話都OK，主菜係有龍蝦尾同埋燒牛肉，同幾年前個Menu冇乜分別，係龍蝦尾多咗舊魚🤣 最緊要係個麵包，因為我哋好鍾意食佢個麵包，今次每人要咗兩個，而甜品有一件cake，同一個甜品杯，味道不過不失！
食完嘢我哋出去行吓，想玩嘅遊戲全部都排晒長龍，仲要排隊好誇張，因為好友唔想排隊，所以都冇乜遊戲可以玩到，我哋排隊去咗搭火車，兜咗個圈，最後決定去玩 Indiana Jones 都排咗超過一個鐘，好友排到懷疑人生 🤣🤣 跟住去睇海上表演，我就趁呢個時候去shopping，跟住會合好友就走喇！走嗰陣已經8:30 ，啱啱好見到隔離 Disneyland果邊放煙花，睇咗一陣先去攞車！
去到池袋，搵到個泊車位就泊低架車，然後行去附近一個地鐵站入口，入去諗住行過去 Echika商場，點知我哋揀嗰個地鐵入口，一落去就已經係銀座篝😄😄😄😄 果然係唔需要排隊，而且仲啱啱好有四個相連位，我哋先去咗洗手間，呢個商場個洗手間係有料，即係要俾錢，不過只係100円，我哋三位女士就抵D，三個都係100円，男士就一個人都係100 円😂 一出嚟就去食拉麵，好友叫咗特製雞白湯拉麵，我就叫咗雞白湯鮮松露拉麵，大家都讚不絕口話個湯好正！一D都唔肥膩，但係雞味好濃郁 👍🏻👍🏻 食完拉麵諗住喺附近行吓街，不過好多舖頭都收咗，淨係可以去到Donki，行咗一陣買咗少少嘢，就行返去攞車，今晚住返尋晚果間酒店，聽朝一早要check out 去富士山喇！
沒有留言:
發佈留言