迪士尼終於有新園區開幕喇！今次呢個圓區令人非常期待，雖然Frozen 呢套卡通片都有少少過咗氣，不過仍然有好多小朋友鍾意，同埋佢個園區嘅設計都好靚，之前有VIP日，但係因為時間夾唔到，所以冇去到，尋日正式開幕，今日就去睇吓 ！
今日樂園超級多人，個個都係去新園區，新園區有兩個入口，一個喺旋轉木馬對面，而另一個入口就喺小小世界旁邊，主要入口係旋轉木馬嗰邊，所以嗰邊有人流管制，小小世界嗰邊就有D似係出口，當然你可以喺嗰邊入，但係大部份人都係旋轉木馬嗰邊入去，我唔係咁早入去，所以雖然有人流管制，但係都唔使等，可以直接入去！
一入去就係亞德爾小鎮，就見到噴水池，旁邊有商店同埋糖果屋，見到糖果屋大排長龍，因為佢主要係賣雪糕甜品，好多人買嚟打卡，所以好多人，其實商店嗰邊都有少少糖果賣，但係就冇糖果屋嗰啲咁靚，同埋商店入面有一部份係賣商品，有盒裝嘅手信同埋廚房用具，手信係聯乘Godiva 嘅朱古力同餅乾，我就睇中咗碗碟🤣
沿左手邊行入少少就有間餐廳，入D係機動遊戲魔雪奇幻之旅，旁邊係另一間大啲嘅商店，呢間就主要賣魔雪奇緣嘅精品，亦都係機動遊戲玩完之後行出嚟嘅地方，而小鎮右邊係一個湖，湖嘅另一邊係過山車雪嶺滑雪橇，旁邊有個洗手間同埋有架車仔檔，過D就係小小世界嘅出口！
湖邊影相嘅時候見到 Elsa 出巡，佢有同啲小朋友互動一下，跟住我就去排隊玩魔雪奇幻之旅，人龍排到出餐廳門口，大約要排1小時，迪士尼而家都推出咗啲俾錢買嘅 fast pass，其實應該一早要推出呢一種付費服務，因為對遊客嚟講要花咁多時間去排隊，係玩唔到幾多樣嘢，本地人好似我咁係年卡嘅香港人，就可以入幾次都得，就有時間排！
排左一個鐘多D先玩到，佢好似小小世界咁坐船，每隻船有三行，每行可以坐四個人，開始時真係好似小小世界咁慢慢行，去到Elsa 唱Let it go 就突然快速倒後行，好彩唔係好快，而且路程短，踉住又慢慢行，去到大隻雪怪果陣，又突然急速向下衝，好似過山車咁😅 尖叫聲四起！好似彩又係好短程😅
玩完出嚟天黑了，又可以影吓夜景！今次晏少少嚟都係想影埋夜晚，同埋想睇聖誕樹亮燈儀式，所以買完野就出去等睇亮燈！個亮燈儀式7:15 開始，見遲咗一分鐘仍未開始，已經心知不妙，因為上次睇煙花又係咁樣，正常會準時開始。遲得就係有問題，結果真係因為故障取消 🤦🏻♀️🤦🏻♀️ 近幾次去迪士尼都係天黑之前走，前後兩次留到夜晚都係諗住睇煙花同埋睇亮燈儀式，呢兩次都因為故障突然取消咗！對於我嚟講就冇乜所謂，可以下次再嚟過，但係對於特登過嚟嘅遊客嚟講，就好掃興！買完應該要諗吓有乜嘢應變措施，例如可唔可以維修到？晏啲再做過？
整體而言，呢個新園區好靚，據講亦都係其他樂園冇嘅主題，難得見到個樂園熱鬧返，希望呢個新園區真係可以幫到迪士尼賺錢，唔使年年蝕錢😅
沒有留言:
發佈留言