今日約咗好友去海洋公園，先去尖沙咀食個lunch，之前經過The One，見到呢間餐廳門口神神秘秘，所以約咗好友今日嚟試吓，訂咗枱，入到去餐廳只有兩枱客，行出outdoor睇吓，呢度有三四個帳篷，如果夜晚嚟都應該幾靚，店員話日頭佢哋唔開呢啲帳篷，而室內嘅座位，只有兩三張枱，其餘都係吧枱位，餐牌有set lunch或者A La Carte，不過食物都係一樣嗰D選擇😅
頭盤有帆立貝青瓜凍湯、赤海蝦昆布の佃煮意大利水牛芝士、巴馬火腿甜瓜出汁啫喱，呢三樣嘢好細份，擺埋一齊做一個意境菜咁，令我諗起幾年前喺東京食過一餐Fine dining 嘅頭盤一樣，不過食物嘅味道就冇乜驚喜，可能上次係有少少分子料理成份，今次係比較正路嘅煮法，不過配搭有D新鮮！主菜我哋揀咗：燒鹽麴名水黑豚，同埋鮮鮑魚淺蜊富山米意大利飯，兩款主菜都要加錢，個黑豚好食，有驚喜，而且份量都唔細，反而意大利飯就唔太特別，甜品有兩個選擇，我哋當然叫晒兩款share食，可以試晒兩款！甜品有： 松の実吉士批，同埋焙茶杏仁約瑟布甸，我覺得個布甸都幾好食，個批就麻麻哋，好有叫做杯果汁我就叫咗杯咖啡，整體嚟講食物質素都唔錯，呢度走高格調私房菜形式，我諗喺呢個商場都唔容易做，可能夜晚會比較多人，不過見佢晚餐嘅價錢都唔平，午餐嘅價錢就覺得可以一試！👍🏻👍🏻
沒有留言:
發佈留言