海洋公園哈囉喂

已經唔記得有幾耐冇去過海洋公園，上次都係同今日嘅朋友其中一個去，應該都有五六年前嘅事，當其時都係去玩哈囉喂，同好友食完午餐就入嚟會合另外兩個好友，因為佢哋要化鬼妝，同埋玩機動遊戲，所以今朝入左嚟先，我同另一好友冇興趣玩機動遊戲，所以晏啲先入嚟join佢哋！

好耐冇嚟，覺得海洋公園好舊，好多設施都冇開，不過仍然有好多遊客，可能旅行團去海洋公園嘅價錢平過去迪士尼，而且呢個地方比較大，遊戲比較刺激，可能啱遊客多啲，所以呢度仍然好多人！

我哋買咗幾款鬼屋遊戲，所以主力都係集中玩呢幾樣嘢，佢有六款鬼屋遊戲，每三款一個組合收費，我哋揀咗恐怖三重奏門票，三個鬼屋遊戲分別係：怨靈異域、壹捌靈實驗室、異度空間，其實鬼屋遊戲對我嚟講興趣不大，因為我唔會好驚，而且不外乎係突然間有個人彈出嚟嚇你果種玩法，今次呢三個鬼屋遊戲都係類似咁嘅形式，只係其中一個有少少互動，有支槍俾你玩吓，特別D，其餘都係有人彈出嚟嚇你果D 😅

玩到夜晚黑，去中間個水池睇燈光效果嘅表演，好有之前睇過話好睇，但係而家個表演改咗，純粹真係燈光效果，加少少噴水池效果，都幾失望！我諗下年再有哈囉喂都未必再嚟😅😅