品麵館

今日行過見到有新開的這家麵店，店內沒有客，見到店入面有好多大大碗麵嘅模型，都係一D雲吞麵、牛腩麵模型，睇吓個餐牌，又完全係兩回事，呢度主要係食烏冬，餸菜嘅選擇主要係雞扒同豬扒 ，仲有D丸，試左芝士雞扒撈烏冬，豬扒湯烏冬、和牛坑腩蛋飯，雞扒味道唔錯，豬扒就一般，和牛坑腩嘅牛腩係切成薄片，唔係一般人心目中牛腩麵果種一舊舊的牛腩，牛腩有少少膻，同埋份量較少，職員很友善，地方好乾淨，可以試吓雞扒，佢有D小食，主要係炸的，唔係咁啱我，鍾意脆口嘢食嘅人就啱D 😅

 

飯局作客 - 松葉蟹

今日公司攪左個簡單的長期服務獎頒獎典禮，參與的人一年比一年少，近年好多打工仔心態都改變左好多，大部分人都想做D freelance，或者自由度高的工作，例如 part time ，因為新一代人都冇乜家庭負擔，亦對好多 KOL 生活嚮往，都唔想好似自己父母咁捱生捱死，要好好享受生活！

今晚去好友屋企食飯，今晚食松葉蟹，除咗松葉蟹，仲有蝦、魚、生菜包！好味！😋😋

 

G.Bar

呢日放假，無無聊聊去尖沙咀睇完戲，四圍行吓！去 K11 Musea 行，天氣好熱，見到海濱公園果間 Arabica 旁邊開左間 gelato🍨 ，咁熱天氣，整返杯 gelato 食吓先！ 買左單球 cone，檸檬薑味，清清地都未唔會太濃烈！夠消暑😄

 

神探大戰 Detective vs Sleuths

 

市內發生多宗連環命案，死者都是一懸案的疑兇，殺死這些疑凶的組織自稱”神探”，每次犯案後都留下懸案嘅檔案編號，另一方面患上精神病的前警員李俊，自薦破案，協助重案組方禮信和陳儀兩夫妻辦案，但方禮信一直不相信李俊，反而陳儀相信他的說話⋯⋯！

呢套戲都幾好睇，主要係想睇劉青雲，但係我覺得佢嘅對白講得太快，套戲嘅節奏亦都非常快速，好似好趕咁，追唔切對白之餘，都睇唔切佢嘅演技！如果慢返少少就好啦！可能要睇多次先得 ！😅

Le Jardin à soho

今日去中環食晏，今日天氣好熱！士丹頓街都好靜，呢間餐廳得兩枱客，餐牌嘅食物選擇都唔算好多，主要都係 set lunch menu 、小食同甜品，我哋叫咗大蝦欖油香蒜意粉、澳洲草飼牛肉眼扒，今餐有個蘑菇湯都幾好味，另外叫咗兩杯嘢飲，食物就不過不失，呢個店嘅設計係半開放式，所以冷氣唔係好夠，都幾熱！

 

免揉蒜蔥麵包

網上睇到呢個Mrs Lazy 的免揉蒜蔥麵包食譜，又試吓整！

1）蜜糖水：
蜜糖15g
室溫水75g
糖10g
以上材料混合後加入1.5g乾酵母，攪勻後放置10分鐘
2）高筋麵粉125g + 鹽1.5g 混合後備用
3）冇鹽牛油溶液10g 加入 （1）的蜜糖水中攪勻，然後加入 （2）的麵粉用膠刮攪拌成麵團，蓋上保鮮紙在室溫靜置60-90分鐘
4） 半個蒜頭和兩棵蔥切粒，加入15g軟身牛油，少許鹽拌勻
5） 已靜置完，發大了一倍的麵團，放在枱上，灑一些麵粉，略為搓吓，再摺疊幾次，搓至光滑，蓋上保鮮紙鬆弛20分鐘，直接按在麵團上有沒有回彈，再將麵團略為壓扁，再用麵粉棍擀平及排氣，擀成長方形後灑上（4）的蔥蒜及芝麻在表面，再卷成條狀，𠝹開麵團，卷成辮仔型，放入模具內，再發酵45分鐘，麵團脹大一倍左右，掃上蛋液，再灑些蔥蒜和芝麻，放入180度焗爐，焗25至30分鐘，完成！好味！🍞🥰🥰

 

走進巴洛克

食完嘢，行出去餐廳嘅時候，見到太空館後面有個香港藝術館，今次展覽主題係走進巴洛克，我唔知道巴洛克係一個人名？定係一個國家/地方？見到只係$10入場費，又入去睇吓！

見到好多都係畫像，原來巴洛克係一種藝術嘅總稱，應該類似係一種藝術風格🤔 主要都係欣賞一D巴洛克風格嘅畫，見場館裏面都有個互動遊戲，應該唔係遊戲，係Photo Booth，我見都係要戴住口罩影，所以冇玩到！因為影出嚟會好怪 😅 睇咗一陣就走！

 

牧羊少年與他的浮萍

今日出尖沙咀睇 Samsung 個 road show ，睇吓隻新款雪櫃，我順便去搵好友傾吓計，原本想同佢一齊食晏，但係佢已經食咗，我唯有自己出去搵嘢食，行咗去文化中心嗰邊，以前呢度有間西餐廳，而家已經轉咗做呢間牧羊少年，門口有幾個人等位，不過好快就已經有位，因為餐廳其實都幾大，我叫咗個下午茶餐，係烤雞漢堡🍔，另外叫咗杯羽衣甘藍果汁，好味 👍🏻抵食👍🏻

 

Thor : Love and Thunder 雷神奇俠4: 愛與雷霆 MX4D

 

在一個很荒蕪的星球上，Gorr和女兒已經因為饑渴而奄奄一息，女兒更不幸死去，悲傷的 Gorr 找到了一直崇拜神明，希望挽救女兒，卻發現神明根本對他們漠不關心，他用死靈劍將神明殺死，Gorr 被死靈劍選為新主人，令他成為屠神者。另一方面，Thor 已重新振作，變返正常，他和銀河守護隊一起幫助其他星球，他們收到了很多求救訊號，都是一些神明被殺，另一邊廂 Thor 的前女友 Jane 因得了癌症，正在接受治療，她感應到已破的雷神之鎚的召喚，並成為了它的新主人，而 Jane 亦變成了女雷神…….！

今次去沙田睇戲，好耐冇去過沙田間戲院，以前好似係UA，裝修咗之後冇去過，因為好友話呢度D戲飛平D，所以嚟呢度睇，睇戲之前我哋去新城市廣場食晚飯，去咗 Simply life ，本來我哋係四個人睇，但係其中一個因為家人懷疑確診，所以冇嚟到，好彩戲院肯退飛，套戲都幾好睇，覺得演屠神者個演員好面善，諗咗好耐都諗唔到係邊個，最後睇返資料原來係 Christian Bale ! 

安倍遇襲

今日出尖沙咀剪頭髮💇🏻‍♀️，去山頭火食碗拉麵先🍣🍜，今日好熱！☀️剪完頭髮去鹿角巷買杯嘢飲，以前呢間鹿角巷成日都大排長龍，而家係冇乜人，完全唔需要排隊，雖然話呢D茶店而家周街都有，但係呢個位置附近應該都冇乜選擇，可能天氣太熱🔥，好多人都幫襯商場入邊嘅店舖！

晚上回到家後，睇新聞知道日本的前首相安倍晉三遇襲，最後還傷重死亡！😱實在令人感到震驚，想不到現在還會有人刺殺政治人物！我唔知道佢嘅政績如何，但係感覺佢應該幾受自己國家嘅國民愛戴，見當地市民好多都好難過！我就覺得成件事，班保安警覺性非常之低 😔

 

魚治

之前上YouTube睇片介紹呢間日本餐廳，今晚相約好友們一起去試，餐廳門口嘅位置已經擺咗餐牌，餐牌係畫圖畫形式展示食物樣版，但係個店入口好矮，要”捐”入去 😅

餐廳嘅地方唔算好大，不過D 餐牌好日本，因為訂咗枱佢都有張紙寫住定左貴姓，全部都係日文！同埋佢啲餐牌好似日本咁，有張紙寫咗今日有乜嘢特別海鮮，不過有D魚已經賣晒，我哋叫咗四隻日本生蠔、一夜干、燒粟米、刺身七点、和牛三文治、燒厚切牛舌、滿足壽司、燒魷魚、甲羅燒、炒野菜，食物都唔錯，不過份量細D，甲羅燒我哋只係叫咗一個試吓，因為驚一次過嗌四個，如果唔好食就嘥咗，結果真係唔係太好食，因為好鹹！剌身同圖片相差好遠，最好食係條一夜干同埋厚切牛舌！

食到8:30 有表演，其實每晚都有，就係用一D唔記得咗叫做乜嘢草，去燒魚生片，燒完再分比每枱客，不過睇個樣已經知呢隻魚生片係麻麻哋，事實上真係麻麻地，有少少腥！純粹貪得意睇吓個表演！下次可以考慮試吓食其他嘢！因為好多嘢睇落都好吸引，但係我哋食唔到咁多！