金色不如帰 （又一城）

 

之前在商場見到佢裝修緊，話10月開，去到10月尾終於都開咗，今日雖然係假期，都試吓等吓位，因為通常一個人都有機會有位！取飛後見前面有4個一人飛，等左大約五分鐘已經有位，因為前面幾個號碼取飛後沒有等，所以有單丁位就到我！

店入口是圍住廚房的Bar 檯位，入面有卡位和四方枱，見到一個大大隻的店員，講嘢聲大大，安排坐位好有效率，好快手咁指揮工作，感覺好快安排到坐位比人，又同小朋友 social 吓，好勤快！👍🏻

餐牌上湯麵選擇不多，一如日本人那份專注，麵只做一款貝汁，只有醬油同鹽味嘅分別，麵嘅配料有低溫慢煮叉燒同埋三層肉，湯底係三重湯底，包括有蜆湯、豬骨清湯、魚清湯，另外有黑松露醬同埋牛肝菌碎加牛肝菌油，湯底都好清甜，我覺得配牛肝菌好味一過黑松露醬，除咗麵仲有飯食，都係用返佢湯麵果衛低溫慢煮叉燒同埋三層肉，另外有款牛舌飯，小食嘅選擇相對多，有餃子🥟之外仲有豆腐、沙律🥗、炸物🍤之類，其實淨係食一碗麵🍜都好飽，我仲加咗味玉，食埋餃子飲埋野！好飽！

甜姨姨

 

頭先食完黎巴嫩菜，大家都想食個甜品，但係佢果度嘅甜品好似唔係好吸引，所以我哋落返黎中環搵甜品食，行咗好耐都搵唔到，就算有都排晒長龍！於是我哋搭叮叮落去大坑，有一排冇黎大坑，見到好冷清，可能因為我哋夜左去，好多店都已經關門，搵唔到甜品食，跟住我哋就行咗去天后，終於搵到兩間甜品店，去到呢間剛剛好有位，就即刻入去食，我哋叫咗榴槤pancake 一齊食，另外各自叫一碗甜品食，老實講甜品做得麻麻地，不過行咗成晚大家都好想食，但求有位就算喇！😅

Shahrazad Lebanese Dining lounge & bar

今日行咗半日，夜晚落返去中環，會合埋另一好友食飯，之前已經訂咗枱，去食呢間黎巴嫰菜，上到去餐廳都擾攘左一輪，又話我哋冇Booking，好彩我哋有email confirm 左，所以都有位，店嘅面積唔算好大，佈置都幾靚，門口有兩張藍色枱櫈幾靚，趁未有人坐可以影吓相，另外亦都有D室外位，不過要食水煙先可以出去坐！

裏面嘅座位有少少迫，枱同枱之間嘅距離都近，亦都冇板隔開🤦🏻‍♀️，餐牌一早已經email咗俾我哋，但係睇完都唔知揀咩好，最後揀咗啲大路嘢，我哋叫咗個Shahrazad mix grill ，有牛、羊、雞，配左兩款唔同嘅醬，另外仲有一款雞，一款烤餅配四種醬，仲叫咗款雜菜餅係炸嘅，最後加多一個蒜蓉蝦意粉，每人叫咗一款飲品，食物嘅質素唔算差，但係肉類就冇乜味，基本上佢係靠醬料嘅味道，叫做試過下就算喇！😅

奈雪の茶

上到山頂我哋都冇食嘢，因為之前食飽咗，純粹係想飲杯嘢，食D小食，見到門口有D相，有個包包好似幾好食，但係已經賣晒，唯有只係買杯嘢飲，坐咗一陣，店入面嘅面積好細，只有幾張枱，見到佢有埋港式奶茶，我哋就飲台式飲品🥤🥤🥤，因為口乾都好快飲晒！😆

5019 Premium Factory

今日相約好友上山頂行吓，約咗去中環食個lunch先，原本想去試吓今日新開嗰間 Bake house ，門口大排長龍，兼夾冇堂食！所以去附近行吓睇吓有冇其他嘢食，最後去咗呢間食漢堡包！🍔

店入面沒有人客，就只有我們三個，我哋叫左一個 BLT burger、一個漢堡扒、同埋一個三文魚牛油果飯，份量都幾大，好在有兩個好食得嘅男士，就唔會食唔晒D嘢！每個餐都有沙律同埋湯，漢堡扒同漢堡包個牛肉都好相似，三文魚就落咗醬油，所以幾樣野個味道都好食，漢堡包跟咗一大份薯條，其餘漢堡扒同埋三文魚都有飯，我就冇食到飯，佢哋兩位就一人一個飯清晒！食完嘢我哋就出發上去山頂！

我哋行過去纜車站，見到纜車飛而家都有特價，另外如果港人身分證有P E A K 其中一個英文字母，都會有半價，折實只需要$49就有一套來回車票，真係好抵，仲送咗幾張優惠券，主要都係食嘢同埋買嘢，想到去其實都冇乜嘢睇，只不過係好耐冇上嚟，所以上嚟望吓，因為對上一次嚟仲係好多遊客，今次只有港人，所以靜好多！我哋又上去觀景台睇吓風景，又去影下3D相，基本上我哋係冇乜消費😅，只係買咗三杯飲品！🥤🥤🥤

飯局作客 - 長腳蟹海鮮餐

今晚相約好友去佢屋企食海鮮餐，在網上見到呢個長腳蟹餐，價錢係$1480，其實係六人餐，有一隻三斤半嘅紅長腳蟹、兩隻波士頓龍蝦、六隻扇貝、六隻蟶子、六隻鮑魚、同埋有一D蝦！好友另外買咗D菜，當然唔少得酒啦！又攞佢嗰支響17出嚟！🥃 

好友預早準備定蒜頭辣椒之類配料，等人齊就開始蒸！三斤半嘅長腳蟹，我哋蒸20分鐘，一路蒸埋其他海鮮，呢個就係蒸爐嘅好處！呢個海鮮套餐都好抵食，海鮮都係好新鮮，最重要係幫你洗乾淨左，當然有小小潔癖嘅好友會再洗多次😆 隻蟹蒸完出嚟，我哋狂影相，又上網睇片點樣拆開佢，我哋食得好開心，原來好友準備咗節日嘅氣球俾我，仲有生日蛋糕，好有氣氛，蛋糕🎂好靚好食，氣球🎈亦都好靚！好驚喜好開心，呢班好朋友真係好有心，好感恩識到佢哋！😊

sensu

今日去吓銅鑼灣，去咗呢間餐廳食，其實上次去呢一座 building，已經想試呢間，後來食咗雲壽司，今次再嚟呢度試吓 ！

呢度其實係有幾間食店，都係同一個集團，因為有少少想食日本嘢，所以揀咗呢間，店入面嘅面積唔算好大，都有幾枱客，集中左喺裏面嘅位置，其實佢仲有好多枱，唔知點解要將D人集中埋一齊，雖然疫情減退左，始終枱同枱之間距離都好近，唔明點解唔分開啲人坐？因為幾枱客都係兩個人，枱同枱之間嘅距離好少，左右兩枱客講嘢，好似環迴立體聲🙉

所以最後都係叫侍應調位！雖然冇咁嘈，但係冷氣超凍🤦🏻‍♀️所以都係再叫侍應校細啲冷風！餐牌嘅食物選擇都唔算好多，我地叫咗一個慢煮豬腩肉盛合，同埋一個五感六覺御膳，其實係壽司！個壽司波波其實好細粒，另外有六件手卷，而家豬腩肉盛合，只有中間有少少肉，其餘全部都係前菜！所以都唔係食得好飽！飲品方面，都有好多特色飲品，我哋叫咗兩杯 mocktail ，賣相叫做特別D，味道就一般！我哋坐咗一陣就走，因為冷氣實在太凍！🤦🏻‍♀️🤦🏻‍♀️

食完飯去崇光行一陣，上到去書局，見到間Cafe有位，就入去飲杯藍山咖啡，食返個Tea 補數！

飯局主場 - 第十九回

 

又開始生日飯局，今年疫情下，多過四個人的群組已經冇約食飯好耐！只有四人或以下先有出來！雖然政府今日話星期五會放寛限聚令，不過之前幾個月冇食生日飯的群組都唔約喇！

今日約咗 F的前度 K 和好友 J ，先去九龍城買大閘蟹，我地只買了每人一隻四両，因為尚有其他野食，我地去左九龍城街市，見到D海鮮好貴，所以去返大成街街市，價錢貼地好多，我哋買咗一款叫做白剌嘅蝦🦐，店員話唔係成日有，我哋都係第一次見，見佢價錢都唔貴就買咗一斤試吓，另外再買咗蟶子、扇貝、白鱔、象拔蚌仔、蜆，當然唔少得牛頸脊，同埋少少丸，我哋先整咗大閘蟹食，食完先至打邊爐，今晚大家冇乜食力，基本上所有嘢食淨一半！果隻白剌蝦真係麻麻哋，唔怪得唔係成日有，因為都唔好食！食剩嘅嘢擺咗落冰格，留返聽日再食！食完飯又切蛋糕🎂，今年第一個切嘅蛋糕，雖然人少少，但係都好開心，難得大家有心！❤️😊☺️