我老細係天后 The High Note

Maggie 係天后 Grace Davis 的助手，她自小喜歡音樂，對音樂非常熟悉，她亦懂得做混音及監製，她做了三年助手，覺得天后已經多年沒有出碟，她希望能夠為天后做監製，同時她認識了一位有潛質的男歌手，便開始為他做監製錄歌，後來他因為一次失誤而被天后解僱，她無奈放棄一切離開.....！

套戲都幾好睇，演天后的演員都做得唔錯，故事好簡單，但係發展都有D出乎意料之外！

蘭王雞蛋

前日去西環食飯嘅時候，順便攞埋人地幫我在西環卑路乍街果間新利欄買的蘭王雞蛋，呢隻日本雞蛋，據講可以生食，在香港唔係咁多地方有生食用嘅日本雞蛋，盒上面有D日文字，應該係話可以生食，不過我都唔係就咁生食，因為在網上參考左人哋嘅介紹，用味醂同埋醬油去浸個蛋黃，味醂入面本身有酒精，加埋醬油去浸嘅做法，有D似溏心蛋做法，只係直接將蛋黃浸落去，做法都好簡單，只係將味醂 + 生雞蛋專用醬油，用 1:1 嘅比例，份量足夠浸到蛋黃就得喇，一次過浸左四隻蛋黃，放入雪櫃浸佢二十四小時之後就可以食得！

浸左一日之後，個蛋黃變得更深色，生雞蛋一定要配白飯，所以，雖然今晚唔係好想食飯，都煲咗少少飯去送雞蛋，個醬油我覺得鹹咗少少，但係個蛋黃都好好味！一次食咗兩個，留返兩個第二日食！

飯局作客 - 端午節聚餐

端午節食飯，今晚買咗油蟹，好大隻，足足六斤幾，蒸爐都係剛剛好放得落，蒸左35分鐘，好新鮮，好好味！食完都飽左一半，仲有其他餸，飯後仲有水果，正！

遺密繼承人 Inheritance

Lauren 係檢察官，來自一個有錢嘅家族，一日，父親突然去世，在分佈遺產之後，父親分了大部份遺產給弟弟，只留下少量遺產給她，另外還有一串鎖匙，同埋一條USB手指，父親拍了一條短片給她，她看完之後，走到大閘的後院。尋找這把鎖匙應該在哪裏開門，她找到一個地下室，裏面竟然有一個人被鎖在裏面，他自稱 Morgan ，他講述了自己和 Lauren 的父親相識多年，以及為何被困在此，  Lauren 半信半疑，便出去尋找 Morgan 所講的真相⋯⋯！

個故事都有D新意，成套戲都係幾個場景，都算係低成本之作，男主角都做得幾好，套戲個氣氛都拍得幾緊張，尤其是行入去地下室嘅一段，因為好有神秘感，劇情發展都係幾意料之內，不過結局都幾出人意表，成套戲算係幾流暢，中間有小小悶場！

Micasadeco & cafe

早幾個月疫情比較嚴峻嘅時候，想去呢間餐廳食嘢，但係佢冇開到，我以為佢唔會再開，今日見到佢又有開，就去試吓食嘢啦！

呢度主打係疏乎厘蛋糕pancake🥞，落order嘅時候講明要60分鐘，我諗住佢應該係預鬆左，先至話要60分鐘，正常45分鐘應該有，始終都係要等，先叫咗一個班尼迪蛋食住先，想叫杯橙汁佢話冇晒橙汁🍊，改要西柚汁，又話冇，唯有要芒果汁，唔係好想飲芒果汁，因為之前食咗個芒果之後腸胃炎 🤦🏻‍♀️，有段時間都唔敢食！我諗果汁應該都安全！個班尼迪蛋賣相麻麻地，食落個味道都 ok ，係個麵包嘅邊比較晏，佢有一D菜伴碟，落咗醋，個醋好酸，食新鮮菜沙律應該要落陳醋先好食！同埋應該要加少少橄欖油，因為本身個菜唔係咁新鮮，所以比較乾！芒果汁係比較濃稠果種，都幾好味！

個pancake真係要等足60分鐘，佢唔遲唔早，剛剛好60分鐘先至時有得食！我叫嗰個係雜莓pancake，原來個pancake係紫色嘅，我以為個pancake係原味，然後伴D雜莓，味道一般啦！冇乜蛋味，鬆軟到就足夠，一定唔及得在日本食咁好味，不過而家冇得去旅行，叫做懷念下在日本食pancake 🥞飲橙汁🍹嘅感覺！🤣

豉油王炒麵

上次在元朗好到底買咗麵餅，今日就試吓整豉油王炒麵，材料就真係好簡單，只係蔥同埋芽菜，麵餅就咁用室溫水浸開一陣，然後鬆開佢，然後隔水備用，跟住開咗個豉油先，味道可以自己調校，因為唔同嘅豉油個咸度都有D分別，我就用咗 3:2:1 ，三份豉油，兩份老抽，一份蠔油咁嘅比例，跟住先炒左D蔥同芽菜，然後盛起，跟住炒麵，唔知道應該要炒幾耐，不過呢個麵，如果煮係大概一、兩分鐘，我先煎一煎個麵唔郁佢，然後先至炒開佢，大概炒左幾分鐘，然後加返芽菜同蔥，炒完之後落返少少芝麻就搞掂！簡單易做好味！😋

1/2 的魔法 Onward

在一個魔法嘅城市，入面着嘅”人”，因為科技嘅進步，大比大家好多方便，令佢地慢慢忘記咗魔法，經過幾個年代之後，而家嘅小朋友已經唔識魔法，好似 Ian 同 Barley 兩兄弟，Ian 在佢好細個嘅時候父親已經離世，所以佢對父親係冇印象，而哥哥 Barley 自細就好鍾意魔法故事，在Ian 16歲生日嘅時候，母親就將父親留低嘅禮物送比 Ian，話係佢爸爸留低俾佢，叫佢等兩兄弟都過咗16歲交比佢地，原來係一支魔法杖，我父親亦都留咗一張魔法咒，諗呢個咒語就可以令佢父親重現一日，佢哋嘗試跟咒語但唔成功，反覆嘗試之後， Ian 終於成功，當父親現形左下半身之後，意外被 Barley 停止左，他們要想辦法變返父親的上半身出來，但他們只有一天時間......！

呢套戲本來係幾個月前要上畫，因為疫情影響到而家先至上，不過適逢剛剛開返學，所以唔係咁多人睇，可能週末會好D掛！套戲都好有溫情，有笑有淚，結局亦都唔係想像中咁！而且迪士尼嘅製作一向都有水準，所以都值得去睇！

鴻星

相約一班好友去咗旺角新世紀食飯，成班人之中有幾個都keep 住有出嚟食飯，只係有兩公婆同埋佢地嘅小朋友冇出嚟，因為有兩個小朋友，比較擔心佢地抵抗力低，所以一直都唔敢帶佢哋出街，而且其中一個好友在機場返工，都係高危嘅地區，而家疫情有改善先至敢出嚟！

今個月有兩個好友生日，每年都同佢地一齊慶祝，原本想去食蒸海鮮，但係見到呢度嘅廣告，六人餐都係$1400 幾，有龍蝦、鮑魚、燒鴨等等，睇落都唔錯，所以先至嚟試食，今晚都有八成滿座，而餐牌主要都係食呢個套餐，當然佢仲有D散叫嘅食物啦！個龍蝦係波士頓龍蝦，即係冇肉食！波士頓龍蝦不嬲都冇乜肉，淨係蟹鉗最多肉，食物嘅味道唔錯嘅，不過分量真係好少！隻燒鴨只係得半隻，而且好似隻雞咁細，我地有理由相信佢係唔足半隻！不過味道都係OK嘅，其餘嘅餸仲有花膠湯，個湯入面加左年糕？我地講笑話等你可以飽肚D！其餘餸嘅份量都係比較細碟，總共有八餸一湯一甜品！我雖然我哋女士比較多，不過都唔係食得好飽！

今日大家冇溝通過邊個買蛋糕，但係我早小小去咗買，到差唔多食完飯，小朋友話要食蛋糕嘅時候，大家都問係咪真係有蛋糕㗎 ？我先至話俾佢地聽有！不過呢個商場得兩間餅店，而且因為已經係傍晚時份先至買，所以冇乜選擇，買咗個藍莓芝士蛋糕，今餐食得唔係太飽，食埋個蛋糕就啱啱好！

迪士尼樂園重開

樂園經過接近150日關閉之後，終於可以重開，都預計佢差唔多要開，因為海洋公園上星期六已經開咗，見佢網上公布樂園重開嘅安排，第一時間上網登記，因為佢話限制人數一定要上網登記，原先想叫埋好友F去，但係佢似乎唔得閒，所以唯有自己去，上網預約咗10:30 ，所以要早D起身！

入園嘅時候，見到都幾多人，同埋佢有人流管制，因為要量度體溫先入得去，今日烈日當空，要排隊都幾辛苦，而且要兜過噴水池，由另一邊嘅進入樂園，我唔知點解要咁樣安排，搞到要行好遠先去到入口！

入到樂園，大家都好興奮，不過冇節目表提供比人攞，全部係上網睇，一行入去小鎮大街，工作人員都好熱情咁打招呼，果一刻真係好感動，久違咗嘅熱情，D工作人員都好耐冇試過咁熱情，呢個場面記得喺樂園初初開嘅時候就經常會見到，已經好耐冇出現過熱情嘅招呼喇！好明顯今日大家都好開心，而且睇得出總動員返工，所以員工嘅數目都好多，加上冇咗合照工作，入園嘅人數亦都唔係咁多，人手自然好鬆動！

咁熱就梗係要去入去商店行一陣先啦！商店亦都有好多新產品推出左，主要係新城堡外型嘅產品，好多都好靚，其實我見到個 cushion 套幾靚，不過佢係要連埋個 cushion 一齊買，所以我冇買到，另外見到本簿都唔錯，但係好重，所以都冇乜買到野，見到佢推出左一D新嘅 Patched ，我買咗兩個可以癡喺袋上高，另外一款注目嘅新產品就係 Duffy & friends 嘅新朋友，就係海龜 Olu Mel ！老實講我覺得佢個樣唔係好可愛，但係小朋友好似幾鍾意，因為我見到好多小朋友都有買，原本都想買隻細嘅捧吓場，不過真係揀唔落手！

我好少咁早入園，所以一D平時冇玩嘅機動遊戲，都走去玩下，例如去咗搭船，都好耐冇搭過，成架船都係得五個人，好彩有一個小朋友，都識得做吓反應，如果全部大人揸船果個應該好冇癮！😅

行去城堡嗰邊影吓相，以為今年會整完個城堡，點知整咗咁耐都未整完，預計要今年年尾先搞掂，個城堡睇落大左好多，我諗佢日後可能可以進入去城堡裏面，希望佢可以快啲開飯啦，到時就約埋好友F一齊去睇煙花！

跟住去玩咗Iron Man、蟻俠、迷離大宅、4D 劇場，原本想去另一劇場睇劇，不過 full 左，跟住去咗搵嘢食，因為有幾間食店冇開，所以D人迫晒喺幾間食店裏面，所以好多人，好難搵位，除非坐室外位，因為太熱，個個都想坐室內有冷氣，其實小鎮大街嘅餐廳都有位，不過佢收費比較貴，我都係去咗食漢堡包，而家佢有買一送一優惠，不過一個人食唔到兩個餐，所以只係食一個餐！

食完野，再行左陣就走喇！今晚約咗人食飯，早少少出去，搵個商場涼下冷氣先！

航拍 21 - 元朗大棠千島湖清景台

今個假期，plan 左要去千島湖，原本昨天去，但因為遲了起床，所以今天去，不過今日都遲左少少起身，結果 11:00 先出發，搭地鐵去西鐵朗屏站，轉 K66 巴士，之前上網睇資料，話 B2出口去搭，但地鐵站的通告話 B1 ，由B1出口落去，落到去唔知行左定右，見右邊有的士站以為係呢邊，行過去見唔對路，好似行去 B2果邊，原來行左邊先啱，行前小小過條馬路，見到架 K66 剛剛走了，追唔到因為唔係咁近，都要行2-3分鐘先到巴士站，巴士站在悦屏樓對面的天橋下，唔知有冇第二個近D既站，呢邊有一、兩間食店，下一班車10分鐘，所以唔夠時食，架巴士都幾多人搭，要搭17個站，巴士經過元朗市中心，沿住大棠路經過好多條村，站同站之間好近距離，有D站行車時間只係10秒又停低，所以會有十幾個站！全個車程大概半小時，就去到大棠山道果個站落，車站有個公廁，落車行返轉頭，第一個路口轉右入去，就係大棠山道，呢條大棠山道望上去係一條斜路，沿住呢條斜路行上去都有少少吃力，不過呢度只係開始，沿住呢條路一直行一直行，就會經過大棠有機生態園，最緊要唔好轉左入去右邊嘅有機生態園，要一路直行，又會經過賽馬會大棠渡假村，繼續行就會見到大棠郊野公園嘅燒烤場，行入去燒烤場嗰條石梯，繼續上，上到去就會見到有個公廁在左手邊，右手邊就係燒烤場同埋一個十八鄉觀景台，今日33度高溫☀️，當然冇人燒嘢食，不過都有幾個人郊遊，我去右邊嘅觀景台睇咗一陣，然後繼續行返去左邊個燒烤場，行返出去有條馬路，沿着馬路向上行，呢條馬路仍然係大棠山道，如果睇指示牌，就要睇楓香林嘅方向，行上D就會見到大欖郊野公園管理站，旁邊有個停車場，因為呢度係禁區，一般汽車係唔可以進入，所以有個停車場俾人泊車，我見到佢攔住左入口，又有保安，我就以為旁邊果條山路先至係去楓香林，因為個指示牌係指住呢邊，我行入去嘅時候見到條路攔住左，所以我行返轉頭出燒烤場，正諗緊係咪應該唔入得，諗住要放棄嘅時候，見到有架的士駛入嚟，停咗喺管理站出面，有四個人落車，睇佢地一身嘅造型就知道係行山，我就睇吓佢地點樣行，與此同時有一班人由禁區行出嚟，我就即刻買去問下佢地係咪由呢度去千島湖，佢都話係，其實個禁區只係車唔入得，人係可以行入去，因為頭先見到一個人都冇，以為佢唔俾人入，而家見到人出入就知道係可以行入去啦！

又係一條斜路，不過唔算長，行到上去就多咗好多指示牌，人都多咗D，在電話亭旁邊有個指示牌，繼續跟住楓香林嘅方向去行，呢度一段都係馬路，都有少少工作車出入，亦都有少少單車出入，人就比較少，可能好多人都係一早上去，所以呢個時間入去嘅人比較少，沿着馬路一路行，前面都係果四個頭先搭的士入嚟嘅年青人，似乎大家係去同一個目的地，因為一路行佢地都响我前面，而且呢度得一條路，行到咁上下有個分叉位，指示牌就第一次出現千島湖觀景台呢個指示，去千島湖就要行右邊，如果繼續想去楓香林就要行左邊，我當然係選擇行右邊啦，而四個年青人就停低休息，我就繼續行，頭一段路係要落斜路（心諗返轉頭咪要上斜路？😅），沿着大欖林道 - 伯公坳段行，行咗一陣就見到好似城牆咁嘅建築，城牆上面寫住伯公坳，之前在地圖搵伯公坳呢個地方係在大嶼山，唔知點解搵唔到呢度，我喺度影吓相順便休息一下，反而有人問我路，因為沿路指示牌都會話俾人聽，我嘅相反方向係去大堂山路巴士站，所以人哋問我行去巴士站要行幾耐，我話都行咗成個鐘頭先上到黎，我唔知果兩個人係由邊度行過嚟，因為我知道有另一條路可以去千島湖，好似係近深井果邊，但係我唔識路，我淨係睇過大堂呢邊點樣行，陣間都要諗吓走果陣時點樣行！🤔

行到咁上下有一個空地，呢度有個指示牌，千島湖就要上樓梯喇，我唔知仲要行幾耐，不過見到條樓梯都有D驚，我數過呢度超過100級，但係只係一個開始，之後不斷係斜路、樓梯上上落落，記得之前睇資料介紹中間會有個電塔，見到個電塔嘅時候以為差唔多喇，在電塔下低影相係例牌動作，繼續行好似見唔到盡頭咁，都好辛苦下，行到咁上下就見到伯公廟，呢間伯公廟旁邊有隻馬🐎，記得之前睇資料介紹過，見到呢隻馬應該望見家鄉，繼續行都仍然係樓梯，開始有人落山，繼續上樓梯，離遠望到仲有一大段路係樓梯，果下真係有D絕望感覺！😣上到果段樓梯之後真係好攰，雖然烈日當空都忍唔住要坐低休息，唯有開住把遮，響度休息嘅時候，離遠望番頭先我行過果條路，真係好遠好遠好遠........ 坐咗一陣就見到果四個年青人行緊上嚟，因為條路都好窄，所以我都繼續行喇，開始唔再有期望見到終點嘅感覺，行到真係有D支持唔住，因為好肚餓，又唔係好夠水飲，又唔敢飲晒D水，驚返轉頭冇水飲，因為沿路上嚟係冇水賣的！行到上去見到有一個千島湖觀景台嘅指示牌，就知道真係望見家鄉喇！不過呢個指示牌嘅旁邊係一條又長又斜嘅樓梯，冇理由呢個時候放棄，但係真係要停低休息一下，因為真係行唔到，正當我喺度氣喘喘休息緊嘅時候，四個年青人都到步啦，佢地同我一樣要停低休息，因為佢地都喘晒氣！🥵等到心跳減慢左，我就開始行上去，呢條樓梯都唔係好長（同頭先嗰D比較），但係行得好慢，因為體力真係有D不支！上到去又係斜路，不過已經望到少少千島，就知道到埗喇！😆 果然行前少少就已經望到千島湖個全景喇！好開心終於成功了！😎 呢度有幾個人喺度影緊相，我都當然影埋一份，上到嚟好大風，好舒服，果四個年青人主動話幫我影相，我問佢地使唔使幫佢地影，佢哋話唔使，可能佢地成日都上來啩，其實呢度都未係終點站，因為行前少少有個位置，影得好靚，就係所謂嘅打卡位，見到咁靚嘅景真係覺得乜都抵返，乜嘢辛苦都忘記晒！坐喺度休息吹下風真係好舒服，呢個觀景台大概有10個人左右，比預期少人，唞順條氣之後就攞架飛機出嚟放！ 開頭都諗緊放唔放，因為超大風，既然咁辛苦上到黎，冇理由唔試一試，最多試試低飛，我只係附近飛咗兩轉，都冇乜點警告話大風，反而升降嘅位置唔係太理想，因為呢度冇乜平地，可以飛到兩轉已經好開心！😄

飛完、休息完，準備落山，睇返千島湖個指示牌，寫住去返大棠山路巴士站要1¾小時，如果行另一邊去黃泥墩水塘就只需要半小時，有考慮過行黃泥墩水塘果邊，因為快好多，問題係落到去點樣走，因為即刻上網睇地圖，搵唔到有咩路徑離開個水塘，所以最後都係揀返由大棠果邊走，雖然佢話1¾小時，應該係計步行時間，如果計埋休息時間，上來嘅時候用咗近兩個小時，我相信走會快D，我預計一個半小時之內可以去返巴士站！

落山果然係快好多，行返頭先行過嘅路，點解頭先覺得行咗好遠，落山嘅時候就覺得好快！最後行咗1小時15分就會去到巴士站，落到山嘅時候好口乾，好彩巴士站附近有自動販賣機，可以買嘢飲，販賣機只有汽水，唯有買一罐飲住先，巴士未到已經飲晒，等咗幾分鐘就有巴士，出到去市中心有少少塞車，我在千色廣場個站落車，行過元朗好到底，終於可以食D嘢，叫咗碗雲吞麵食🍜，又叫咗一支汽水，都好耐冇食過喇，見到呢度外牆搭咗棚，應該係翻新外牆，因為已經五點幾所以唔食咁飽，留返今晚返屋企先食！走嘅時候仲買咗一盒乾麵，食完麵即刻去搭巴士，回程唔搭地鐵，係因為想坐下，不過呢個鐘數都好多人搭車，我都差D冇位坐，我上車嘅時候都係得返兩三個位，諗住搭車果時會瞓着，點知都冇！

總結成個行程用咗嘅時間 （未計中途休息時間）:

1) 由朗屏地鐵站搭K66 巴士去到大棠山道站：30分鐘

2）由大棠山道巴士站步行至大欖郊野公園燒烤場 ： 18分鐘

3）由燒烤場入口步行至管理站閘口 ： 12 分鐘

4）由閘口步行至伯公㘭 ：25 分鐘

5）由伯公坳步行至電塔 ： 18 分鐘

6）由電塔步行至千島湖清景台 ： 20 分鐘

呢個行程對我呢D好少行山嘅人來講，真係好辛苦，不過捱個咗又唔係覺得乜嘢一回事，人生始終要有D挑戰，雖然中間想過放棄，不過朝着目標，勇往直前，終點確實係無限風光等着你😌😌