小漁港海鮮舫

年初三，相約好友去食飯，往年我地都係年初一食，今年夾唔到初一，所以初三先食，有兩個唔出嚟，因為驚有菌，其餘都冇帶小朋友，都係怕肺炎！我地去左太子呢間食蒸海鮮的，因為佢哋今日先開工，今日先打去訂枱，開頭話冇位，後來又話有人取消，所以有位！

位置有小小隔涉，近住雷生春，佢隔籬左右都冇店開門，可能未開工？只有對面大大間惠康！進入店時，店員要求人客先量體溫，話有發燒就不招待，都好嘅！大家安心D！呢間店好新淨，應該開左冇幾耐！店内樓底很高，枱不算多，主要係圓枱，大約8-10張圓枱，幾個卡位，基本上D枱要四人以上，兩位可能都會比個卡位你，店內佈置有D老舊香港既畫同裝飾品，餐牌未常簡單，一個$298餐，同一個$398餐，$398餐要六位以上，因為有隻皇帝蟹！我地四個人，只能叫$298餐，另加一個粥底要$78，餐牌仲有D小食，同埋酒水，店員話個餐夠食，個餐有刺身三款，今日係蝦、帶子、象拔蚌，蒸海鮮有龍蝦🦞，唔算細隻，不過D肉有小小枚，唔夠新鮮！跟住係馬友魚、鮑魚、粉絲扇貝，馬友咸魚食得多，馬友鮮魚真係第一次食，又幾好味喎！鮑魚同扇貝都新鮮，唔錯！跟住係鮮蝦，都幾大隻，一人一隻唔多夠😅！我地有兩隻蟹，未蒸蟹之前先將蟹蓋放落粥底煲，個蟹蓋勁多膏！攪完個粥，蒸蠔同蜆，只有蜆係每人兩隻，其餘每人一隻，蜆同蠔🦪都新鮮！跟住係蒸蟹兩隻🦀，新鮮多膏，好味！最後一款蒸主菜，係蟲草花蒸雞烏冬🐓，伴蕃薯仔🍠、南瓜片、粟米、蒜蓉蝦米勝瓜、芋頭片！D雞幾靚，烏冬索晒D雞汁好好味！其實食完個烏冬都未飽！跟住食埋個粥，個粥入面有排骨、小瑤柱、蟹膏，好味！每人兩碗，食埋個粥真係飽！仲有甜品添！埋單計埋啤酒🍻梅酒🍶，每$400有找，真係抵食，海鮮夠新鮮同靚（除左龍蝦🦞）會再嚟，呢D小店，剛剛開是最好的，越嚟越多人之後可能未必保持到，所以要趁早去食！

走果陣見到店外的魚缸，有瀨尿蝦，但係反晒肚😅好彩我地個餐冇瀨尿蝦好🤣見到D鮑魚都幾大隻，大過我地食果D，可能要六人餐先大隻🧐

變雀特工 Spies in Disguise

Walter 自小已經喜歡發明武器，去幫助做警察的媽媽，雖然個個都覺得佢係騎呢怪，但係媽媽對佢有信心，相信佢將來一定可以幫到人！長大後的 Walter 加入了政府的特工部門，專門研發新的武器，而特工之中最出色的 Agent Sterling，在一次完成任務後，要帶回來的武器消失了，被懷疑是變節的特工，因而被追捕，他想起之前 Walter 正在研究一種隱形藥物，於是前往尋找 Walter，Walter正在將研究好的隱形藥水，放入白鴿的羽毛，成功令到羽毛變成隱形了，此時剛到來的 Sterling ，誤把隱形藥水當作水飲，飲完後便變成了一隻白鴿........！ 

套戲比預期好睇，亦都幾搞笑，不過我覺得可以再搞笑D，始終一個人變咗隻雀仔一定係笑了百出，套戲啱晒一家大細睇，劇情發展當然係好容易估到，在配音方面搵咗 Will Smith 配 Agent Sterling ，唔知係先搵咗配音人員至設計個角色，定係有個角色之後先至諗搵邊個配音，睇個角色個樣，都覺得搵 Will Smith 配係不二之選，所以我覺得有可能係為佢度身訂做呢個角色，因為比較少特工嘅角色係黑人！而 Walter 就搵左蜘蛛俠 Tom Holland ，啱啱睇完D老篤有佢配音，呢套又係佢！

年初一 , 今朝同屋企人去飲茶，去咗尖沙咀果間翠亨村，竟然冇乜人，去戲院亦都唔多人，成場戲少於一半座位有人，同平日差不多，可能因為武漢肺炎，個個都唔敢出街，戲院都變得冷清清，人人都帶住口罩睇戲，希望疫情可以盡快受到控制，一切可以回復正常！

怪醫 D老篤 Dolittle

Dr. Dolittle 懂得和動物溝通，亦能夠替女王治病，因此女王賜予他一片土地，讓他和動物一起在這個莊園內生活，並醫治來自各地的動物，而和他志同道合的妻子Lily是一個探險家，在一次探險路程中，意外身亡，自此他變得一蹶不振，亦將莊園關閉，從此與世隔絕......有一天，莊園來了一個男孩，他一家人都是獵人，唯獨他不想傷害動物，他意外槍傷了一隻松鼠，所以帶來找 Dr. Dolittle，同時皇宮傳出女王病重的消息，他必須要替女王治病，否則他的莊園便不能夠保留.......！

近十年來，Robert Downey Jr 除了 Ironman 幾乎都冇乜演過其他角色！今次呢個角色唔可以話為佢度身訂做，可能有更好嘅人選，套戲嘅背景係英國，覺得男主角刻意改變口音同埋聲音，造型也帶點不羈，感覺像要擺脫 Tony Stark 的公子形象，動物嘅配音演員，全部都係比較有名氣嘅演員，例如有Emma Thompson 配隻鸚鵡，Tom Holland 配隻狗狗，John Cena 配隻北極熊，Rami Malek 配隻猩猩，Marion Cotillard 配隻狐狸，都算好多名人明星參與，而男主角 Robert Downey Jr都特登拍左條賀歲宣傳短片，佢恭祝大家農曆新年快樂！呢套係合家歡嘅電影，比較適合大小朋友去睇，大人睇就有小小悶！今次去 iSquare 英皇睇 Imax，新開之後第一次睇佢個 IMAX ，揀左 H 行，但係太近了，睇到我頭都暈埋，我諗最好揀 J 行或更後會好D！

蘿蔔糕

又係一年一度整蘿蔔糕嘅日子，相約好友去食早餐，然後去街市買材料，我哋預計要整十幾底，計算材料後就買咗23斤蘿蔔、五斤粘米粉、 14條特瘦臘腸、 10條潤腸、三條臘肉、四両蝦米，兩包冬菇，少量乾瑤柱碎，我仲帶咗我之前在日本買嘅芝麻，同埋金箔，用來做裝飾，買好晒材料之後返去開工！今年我哋買咗一部食物處理器，因為見到佢係最後一部，特價五百幾蚊，所以即刻買咗佢先，今日第一次用，覺得佢實在太有效率啦！蘿蔔我哋一共有11條，有五條切粗條，其餘刨絲，刨絲嘅速度非常快，用咗幾分鐘就已經刨好晒六條蘿蔔，唯獨是切條真係要人手做，臘味蒸好之後切細，再攞去用機打碎，快靚正！之前刨絲刨到手軟，早就應該買機打！今次D臘味切到好細粒，因為想佢香D！

處理好晒D材料就煮，先炒臘味，然後煮蘿蔔，要分開四轉炒，炒完再溝粉漿，呢個比較考經驗，我地經驗唔夠，好似杰左D，見到D粉一舊舊，不過溝左落蘿蔔度，又唔杰，我地分左 total  20底，跟住就開始蒸，最花時間係蒸，我地用三層電蒸籠、鑊、三層煲，一次可以蒸7底，都要蒸三轉，三個唔同容器蒸出來效果最好係電爐，難怪個個都話要用電蒸爐！

蒸完出嚟，我地試左一個，味道ok ，只係個糕好粉，好似D粉未溶咁！同埋臘味太細粒，冇咬口，食唔到臘味！下次可以一半切片，一半切碎，既可以香D又有咬口D！

樂天大喜屋

又有生日飯局喇，壽星女話想食放題，又要在旺角區，所以嚟咗呢間，8:30開始入座，而家佢哋係用QR code落order，唔使好似以前咁一張張紙，環保D又簡單D，都係一個幾好嘅方法，不過我見到食物嘅選擇就似乎少咗，不過都唔緊要啦，最緊要我哋食嘅想食嘅嘢佢有就得啦！我哋叫咗D刺身，串燒，仲有D熟食，原本好友想食火鍋，但係佢想食果間訂唔到枱，先至改咗食放題，其實我已經食咗兩日火鍋，我都唔想再食，所以食放題都好，起碼唔使咁熱氣！呢度食物嘅質素就一般啦，座位就真係好迫喇，不過二百幾蚊一位，都算係好抵食！我哋一路食一路傾計，其實都冇見面三個月，好友又轉左工，去返以前間公司做，不過聽落佢好似有D後悔，既然都轉左都係做埋落去睇下點啦！再唔係咪返番轉頭囉！

飯局作客 - 團年飯

今晚相約好友去佢屋企食團年飯，簡單D打個邊爐，好友買咗龍蝦、蝴蝶蚌、蝦、牛頸脊、牛柳等等，我地第一次食蝴蝶蚌，價錢都唔平，我就覺得唔係特別好食，下次可以唔使買！牛肉都係牛頸脊好食D，不過我哋成日都嫌牛肉檔切得太厚，叫佢切薄D，佢都係咁厚，可能肉檔D人都冇時間同你慢慢切，所以求其切完就算，今晚食飯因為冇準備酒，唯有在好友家中幫佢清倉，不過佢只有一支Raspberry mojito、梅酒同埋冰酒， 3支都俾我哋飲晒，原本我想帶兩支酒落去，但係唔記得咗攞，唯有下次先帶落去啦！反正下星期都會再去！

1917 : 逆戰救兵

1917年4月6日，Blake 收到命令前往見上級，並要求他帶同另一位士兵前往，他便叫了好友 Schofield 一同前往，原來上級的命令，是要求他們兩人前往最前線，通知 Mackenzie 上校，立即撤離，以免誤中德軍陷阱，如果今次任務失敗，無法將訊息傳遞的話，將有千六名同袍遇害，當中包括的 Blake 哥哥，兩人立即前往，中途會有重重危險，有人認為這是不可能的任務........！

呢套戲在金球獎，已經取得最佳電影，套戲最特別嘅地方係佢拍攝嘅方法，係一鏡到尾，當然佢中間有轉個畫面或者停頓過，基本上佢一鏡拍到尾係有大概三、四段戲組成，要拍到一鏡到尾，首先要有咁大嘅場景，同埋要好準確嘅排練，仲有演員一take過不容有失嘅演出，所以呢套戲真係好精彩，令睇嘅人覺得好似身處其中，現場感十足，各演員都好好戲，相信佢要在奧斯卡再下一城應該冇難度！唯一係睇到有少少頭暈，因為始終都係第一身拍攝，雖然鏡頭已經好穩定，始終走來走去，都係睇到有少少頭暈！

套戲在又一城MCL睇，又一城關閉左已經有兩個月，今日終於開返，今日D時間好緊湊，想近近地一個商場處理晒今日要做嘅嘢，所以去呢度睇返場戲，去埋銀行，然後再去好友在附近的屋企，唔使搭咁多車！

奇妙年年

趁過年前去一次迪士尼，入園之前先去青衣城，都有一段時間冇去青衣城，以往同好友去迪士尼都會相約在青衣城等，因為那時候好友住在上水，現在大家都住得近左，就算一齊入去都係屋企附近等，食埋野先直接搭車入去，今日特登去青衣城行下，入到去先搵D嘢食，原本想去UCC 飲咖啡，見到對面果間虎洞麵屋武藏仲喺度，就改咗去食拉麵，自從海運大廈果間執咗之後，我以為佢已經冇晒呢間拉麵店，因為APM果間都改咗名叫做神山，早幾個星期去食先至知，原來都係麵屋武藏！午飯時間呢度都唔滿座，仲有D午餐選擇，叫咗一個豚角拉麵，配埋餃子同飲品，食完野在商場行咗一個圈先至入園！

今日天氣好好，仲有D熱，去到樂園都幾多人，之前在網上續咗會，見張會員卡仲有一個月先到期，售票處又排晒隊，所以諗住用舊果張咭入場，走果陣先換返張新咭，點知都係要用新咭先入到，唯有去返售票處換咭，好彩佢續會係另外排一條隊，所以唔使等，好快就換咗張咭啦！

每年過年前都會入國，因為會買樂園嘅利是封，今年嘅利是封有兩款，一款係米奇同好友，另一款係 Duffy 同好友，我當然買 Duffy 同好友啦！今年嘅利是封有D立體，都幾靚！另外見到佢D排裝朱古力仲有個半月到期，所以做半價清貨，就買返兩排返去食，又見到佢出咗粉紅色嘅朱古力，又買一排返去試吓！呢排唔知點解好想食朱古力，所以另外再買咗一包Duffy朱古力金幣！

除咗買朱古力，都冇買其他嘢，雖然有D嘢覺得都幾靚，但係都係果句，唔等洗就等佢大減價果陣時先買！今日四圍影吓相，又玩下Iron Man，就早少少走，因為約咗人食飯！原本樂園城堡開始裝修果陣時，話今年一月會開返，但係而家睇城堡嘅進度，一月應該開唔返，等個城堡開返有煙花匯演睇嘅時候，再相約好友一齊入嚟睇煙花啦！

豊勝手丼

上星期同好友 J 食完丼，已經約定下次食呢間，話咁快又一個禮拜，今次開會前去食，雖然係午飯時間，不過入邊只有兩枱客，呢度嘅價錢比較貴，即使係午餐嘅丼都要$80左右，一般打工仔唔會食咁貴嘅午餐，最多係間唔中食一餐！我哋叫咗一個海膽丼，佢呢D貴價嘅丼有八折，另外叫咗一個午餐嘅鰻魚丼，雖然午餐係$88 ，不過剩係得一個丼乜都冇跟，加個湯同沙律就要加$25，我哋都加咗，個湯同個沙律都唔錯，呢個呢度嘅用料都唔差，所以價錢先至會貴D，個海膽丼有三種海膽，分別係北海道、加拿大、韓國，韓國嘅係一板俾你，當然係好細條，加拿大係比較大條D，不過佢今日好明顯唔係好夠貨，只係比咗幾條細細地嘅，而北海道嗰D就比韓國嗰D大少少，味道都OK，鰻魚丼因為係午餐，所以細碗D，不過味道都幾好，叫做試過就算，因為成日睇到佢個廣告覺得好吸引，雖然質素唔差不過價錢略為貴咗D，情願留返quota去日本先食！

Red Lobster

今日又去銅鑼灣，行過Fashion Walk 嘅時候，見到佢啱啱有 Event，正正係米奇老鼠同米妮老鼠，當然要影吓相啦！影完相去食嘢，原本諗住去果間餐廳無位！轉左去呢間食龍蝦嘅餐廳，我記得之前呢個位，係一間意大利餐廳叫做 Papi ，冇過嚟一排已經轉左手，見到過咗午餐時間佢都好多人，入去睇吓有乜食！

我地叫咗一個龍蝦，佢有唔同重量嘅龍蝦選擇，因為我也叫咗塊肉眼牛扒，所以叫最小的一磅龍蝦，另外一個沙律，同埋兩個龍蝦湯，龍蝦湯嘅味道都唔錯，沙律就一般啦，上面有D龍蝦鉗嘅肉，所以食落啖啖肉，飲完湯食完沙律都差不多飽，好彩牛扒係比較薄身，雖然龍蝦只係叫咗一磅，但係原來都幾大隻！不過龍蝦肉唔多，所以都食得晒，不過就真係好飽，原本想飲嘢咖啡，不過唔知佢去呢度D咖啡好唔好飲，所以最後都係改去 Sogo 飲咖啡 !