新明記

好友T夜晚打電話俾我，問我收咗工未，有冇約人食飯，我話冇，原來佢同女友即興約咗好友K食飯，所以叫埋我，我返屋企放低D嘢再出來，去咗九龍城食火鍋，呢間火鍋店開咗唔係好耐，佢哋話去開佐敦果間，我諗佢哋係就我方便先去九龍城，順便試吓同佐敦果間有冇唔同，我地叫咗牛頸脊、自家製水餃同丸，仲有脆肉骨腩、牛骨髓等等，而家好多地方都冇牛骨髓食，咁岩大家都係食，就叫碟食囉，牛頸脊嘅味道好好，好有牛味，而且比較淋，價錢亦都合理，唔使$300 ，自家製嘅水餃都好足料，味道都好食，自家製嘅丸都係好好味，整體來講食物質素真係唔錯，價錢相對來講都係比較平，我地傾開幾時再去大陸食火鍋，其實大家都想上去，但係又驚過關俾人查，聽講話佢會備份你部手機，感覺好似冇咗私隱，所以大家都係諗住遲少少先再考慮上去，其實我對上次返大陸打邊爐都有D念念不忘，因為真係好食同埋好平！希望好快可以上去啦！

古月

今日去北角，又係要諗下食乜好，行來行去，比我見到一條橫街，呢度經過咁多次都唔知道有條橫街，睇地圖其實係錦屏街，因為錦屏街係分咗3段路，其中呢一段好似橫街咁，呢條街係斜路，所以有部份係樓梯，大概有10間食店，揀咗其中呢一間試吓，過咗午飯時間，成間店都冇人，後來只有兩、三個人客入來，睇餐牌見佢係食星馬菜，有肉骨茶之類嘅嘢食，揀咗一個叫做古滑雞飯，類似海南雞飯咁，佢寫明係冇骨雞上脾配油飯，通常好少會寫明比雞脾你，所以想試吓佢，雞上髀嘅肉幾厚，不過唔滑，話明係古滑，原來係唔滑，而且D肉幾硬添，個油飯就幾好食，唔會太油膩，比較乾身! 另外仲試咗個蝴蝶腩配米粉，我唔知道蝴蝶腩同一般牛腩有咩唔同，不過呢隻係比較硬身，而且肉嘅部份比較少，個汁係甜甜地唔同一般牛腩汁，個米粉有一個蒜頭，同埋個湯都幾辣，飲品方面，叫咗白咖啡，雖然係甜咗小小，但係都幾好飲，下次可以再嚟呢條街睇下有乜其他嘢食再試下！

鮨穴

尋日同好友J食完飯，今日去開銅鑼灣開會，又約佢食飯，今次去咗時代樓上食，近排市道淡靜，好多餐廳都做優惠，呢間都做緊七折，所以就去食下，其實呢間個集團有好多間餐廳，其中一間係之鮨千寿，我上個禮拜先食過，我估計呢間嘅質素應該都係差不多，我哋一人叫咗一個特上刺身拼盤，除咗刺身之外仲有前菜、麵豉湯、燉蛋，另外仲有支 Sake，個刺身拼盤都唔錯，有七折就真係幾抵食！

同好友J傾開去旅行嘅嘢，大家都希望出年可以一齊再去旅行，上年同期我哋一齊四個人去旅行，今年因為另外兩個分咗手，雖然話再見亦是朋友，但係一齊去旅行就未必有機會！

TC Bistro

好多年冇去過新蒲崗，今日好友J生日飯局，揀咗呢間餐廳，餐廳嘅地方唔係好大，眼見大概有30個位，晚飯時間都係十幾個客，我地預先訂左枱，仲訂左一客威靈頓牛柳，餐牌上面嘅威靈頓牛柳係四人份量，之前在網上見到可以定一人份量，所以我地訂左一人份量，雖然我地唔有四個人，但係我地仲想試吓其他食物，唔想淨係食威靈頓牛柳就食到飽，所以叫個一人份，大家食少少試吓，我地叫咗兩款小食，一個係雞翼薯條，另外叫左兩客大啡菇，仲叫咗一個羊架同慢煮豬鞍，個雞翼有少少辣，味道都幾好，啡菇就唔係好大隻，所以我哋先至要叫兩客，佢其實比冬菇只係大左少少，唔係一般餐廳成個漢堡包咁大個果D啡菇，不過佢整得幾好食，羊架就唔錯，豬鞍就好厚身，但係味道就一般，唔係咁 Juicy，始終厚身嘅扒係比較難控制，食到咁上下先想起個威靈頓牛扒未見，店員原來漏咗單，我地以為冇得食，因為佢話要預早一日訂，點知佢話可以即刻整！個牛柳味道都唔錯，裏面嘅肉質都好Juicy ，而且牛味都香濃，整體來講呢間餐廳嘅食物質素都唔錯，價錢係比較合理，地點亦都方便我哋，食完飯之後，我哋帶咗個蛋糕嚟，最後冇喺餐廳食，因為我哋攞返去好友 F 屋企度食，佢住附近，可以慳返切餅費！

魔雪奇緣 2 Frozen 2

Elsa 和 Anna 小時候聽過父親說過魔法森林的故事，父親險死在森林內，之後森林一直被濃霧籠罩，人們沒辦法入去或出來。Elsa 經常聽到一陣歌聲的呼喚，感覺會影響 Arendelle ，他決定前往森林，看看能否解決，Anna 決意和她一同前往這個神秘的森林.......！

今集嘅劇情冇上一集咁好睇，歌亦都冇咁好聽，不過唱歌的戲比上一集多，中間有一兩場戲都幾傷感，睇到人眼濕濕，節奏冇上一集個明快，中間都有一兩場悶悶地！

鮨千寿

今日出去尖沙咀睇戲，睇戲之前去食D嘢，呢間壽司店開咗都一段時間，今日就去試吓佢，因為見到佢午市有午餐優惠，叫咗一個刺身丼，都有好幾款刺身，質素都唔錯，刺身都好新鮮，壽司飯嘅醋味唔係好重，都幾啱我食，而且服務都幾好，都可以再嚟！食飯嘅時候見到枱面張紙，寫住同一個集團嘅其他食店，原來都好多間日本壽司店都係同一個集團，應該同集團旗下嘅壽司店都係同一個來貨，所以幾間店嘅質素都係差不多！

A Disney Christmas

迪士尼又做會員折扣優惠，趁放假入去睇一睇有冇野啱買，以前呢D購物日只會做幾日，而家延長到做兩個星期，雖然都開始左成十幾日，但係都幾多人，聖誕嘅promotion亦都開始咗，順便睇吓聖誕嘅表演，城堡前面有個歌舞表演，睇咗一陣就去商店睇嘢，睇啱左兩件衫，同埋一個聖誕掛飾，今期佢有D Tote bag 可以換購，孭上身都幾好睇，所以都換購左一個，商店入面好多人排隊俾錢，搵咗一條冇咁長嘅隊去排，好快就搞掂，始終我買嘢唔係多！買完野出返去聖誕樹果邊，傍晚有聖誕樹亮燈儀式，呢幾年都冇點睇，尤其是最近夜晚大家都唔想太夜返屋企，因為冇車搭，今晚旺角站要收九點，所以我睇完表演亮燈儀式之後都要走！

神探俏嬌娃 Charlie’s Angels

Sabina 和 Jane 首次一起執行任務，一年後她們再次見面，今次一齊協助 Elena ，她舉報公司研發的 Callisto 可以成為殺人武器，亦因此被追殺，在 Sabina 和 Jane 的協助下逃到安全屋，亦令到 Elena 對他們的工作很感興趣，希望能夠加入，在追查 Callisto 的下落時，她們發現公司內六個 Callisto 已經俾人偷走，並正在尋找商家......!

套戲都拍得幾緊湊，打鬥場面都多，選角都幾適合，好似每隔若干年就有一套神探俏嬌娃，片尾出現咗幾個比較年紀大嘅女士，我唔肯定係咪之前嘅俏嬌娃，但係個樣真係冇印象，對上果套好似已經係 Cameron Diaz 果套？

Gontran Cherrier

呢幾日交通都係大混亂，持續左五日嘅三罷，今日稍為緩和D，今日放假，但係要去睇醫生覆診，原本早兩日想去中環睇，但係睇唔到，而因為D藥已經食晒，唔睇唔得，所以都係出咗去睇醫生，好彩地鐵仲可以去到尖沙咀，去到尖東的診所，好多人等，今日就只有一個醫生當值，所以等左好耐，睇完醫生出嚟差唔多用咗兩個鐘！

好肚餓，去咗附近 K11 Musea ，原本想買一個牛角包食，但係牛角包賣晒，除非糖食，所以就選擇糖食，呢間牛角包店有四個舖位，一個係餐廳，一個係餅店，一個係賣咖啡嘅， 而最後一個就係餅房，上次過嚟嘅時候見到排晒長龍，今日條人龍唔係好長，因為D牛角包已經賣晒，要等下一轉，但係餐廳就有，餐廳入面冇乜人，座位都有30個左右，餐牌就好簡單，有D意粉同埋三文治，亦都有牛角包三文治，佢都可以叫一個淨牛角包食，但係見佢牛角包三文治有跟埋沙律菜，所以就叫牛角包三文治食，飲品方面當然係叫咖啡啦，本來想試吓佢哋果個雲朶咖啡，但係店員話今日冇，店員推介椰子咖啡，我擔心椰子味同咖啡味唔係太夾，不過店員話呢個好飲，所以就試吓！

牛角包三文治餡料係火腿同芝士蕃茄，旁邊有D沙律菜，牛角包同平時食開果D個樣有少少唔同，佢係睇到出面一層層，食起上嚟亦都唔同平時食嘅牛角包，平時食嘅牛角包，最面果層下低係空心嘅，呢一個就唔係，質感亦都好唔同，個人認為冇 Robuchon 咁好食，杯咖啡就幾好飲，比想像中好飲，個牛角包未必會再食，但係杯咖啡就一定會再飲！