飯局作客 - 大閘蟹

前日食完大閘蟹，今日又再食，幫襯返同一檔大閘蟹，先去上環會合好友，好友話佢上星期在同一間店買過大閘蟹，覺得質素麻麻地，令我有D擔心，但係我前日食同一檔個質素都好好，不過既然叫咗人留貨，都係要買，我對佢都有信心，我地三個人食，揀咗六隻公三隻乸，一齊搭車去好友屋企食，另一個好友一早買定其他海鮮等我地，除咗大閘蟹今晚有蝦、鮑魚、象仔蚌、䱽魚同埋西蘭花！先炒左碟菜，再逐樣海鮮蒸，先蒸左大閘蟹，因為要放涼少少先食，再整其他海鮮，一路蒸一路食，今晚D蝦好大隻，食物嘅份量啱啱好，D大閘蟹質素唔錯，不過有一、兩隻就麻麻哋，但係大部份都靚，食得好飽！