天吉屋

睇完戲好肚餓，去咗試呢間天婦羅店，佢開咗唔係好耐，但係經常見到有人排隊等位，隔離果間勝面之前都食過，見佢好靜，無乜客，同呢間相差好遠，我因為時間尚早，所以唔使等位，不過一路都見到有客入嚟，座位來講都唔算少，近門口有幾張卡位，轉入去裏面亦都有D面壁枱位同埋四人枱，餐牌亦都非常之簡單，只係有五款選擇，價錢由$108至$158 ，價錢都算好相宜，唔怪得咁多人排隊，我叫咗個天幕御膳，天婦羅有黑虎蝦、海紅鯛配紫蘇葉、軟殼蟹、雜錦炸物（魷魚同洋蔥）、茄子、南瓜、紫菜、四季豆，個餐有白飯可以任加，仲有椰菜絲配柚子汁，都好豐富，呢個天幕御膳有三個食法，第一係就咁點蘿蔔蓉食，第二個食法係白飯配天婦羅加佢哋嘅醬汁，第三個食法係白飯加天婦羅，再加紫菜絲同Wasabi，再問店員攞鰹魚湯，加埋一齊食，我覺得第二個食法嘅醬汁好好味，第三個食法既堅魚湯就有D似日本嘅鰻魚飯三食，佢個堅魚湯都幾好味，食晒成個餐真係好飽，店員話用膳時間只有60分鐘，其實真係唔係好夠，我都算食得比較快，都食咗45分鐘， 60分鐘真係要食得好急，因為佢落order先做，所以等得耐少少，而且有幾個唔同嘅食法都要花D時間，整體而言覺得食物質素唔錯，白飯係日本米好好食，店員嘅服務都幾好，而且價錢都算相宜！