K11 Musea

上個月去咗瑰麗酒店 High tea ，當時都知道旁邊嘅商場 K11 Musea 八月底會開，今個星期一開咗喇，今日得閒就過去行下睇下！香港都好耐冇咁大個商場開喇！

去到商場都好熱鬧，因為都好多人，商場內的店舖未係百分百開晒，大概開咗八、九成，有D餐廳雖然裝修好，但係未正式營業！

由地鐵站上去，B1 全層都係買化妝品，商場大概有六、七層，地庫就有兩層，除咗化妝品呢一層之外，再落一層係童裝同埋 Food court、超市，上面果幾層就主要係服裝類同埋食肆，仲有戲院，同埋空中花園，先在商場行咗一個圈，地方都幾大，但係店舖嘅數量都唔算係好多，而且鋪頭嘅店舖面積亦都唔大，不過店舖嘅類型就有別一般大商場，都唔係全部係果D大路嘅品牌，有D係比較冷門或者係好少見到嘅店舖，即使食店都唔係一般連鎖店，感覺上比較有新鮮感，不過都有一D連鎖店都係有唔少得，例如超巿、藥房咁，而咖啡店就唔係平時果兩間，而係陳豪果間，仲有喜茶，上去七樓 Bohemian garden，一個露天公園仔，有個孔雀滑梯，不過未開放俾人玩，而正門入口果邊都有一個好大嘅公仔，揸住望遠鏡，其實亦都係一個滑梯！呢個商場有好多啱小朋友嘅嘢，成個商場嘅style都好似河內道個K11 ，始終係同一間公司，日後有多一個好去處，去尖沙咀唔再得海港城！