杭州酒家

今晚咗好友去灣仔食飯，其實上一次約飯局嘅時候，已經約咗去呢間，但係因為臨時有人病咗，所以取消咗飯局，改咗今日去食，亦都去返同一間酒家，我未曾嚟過，但係其中一個好友食過幾次，佢讚不絕口，特別係叫化雞，因為呢間酒家嘅呢款名菜係要預訂嘅，所以我哋要預早訂左隻雞先。

大家都好準時去到酒家，酒家嘅格局都係有少少舊，但係都算整潔，今晚唔係好爆場，我地坐低睇吓個餐牌，食物種類有D似上海野，見到原來佢呢間酒家係米芝蓮一星，唔怪得好友話佢好食啦，我地原本想叫東坡肉，但係好友發板叫咗幾個餸之後，覺得叫埋又會太多，所以冇叫到，除咗預訂嘅叫化雞之外，我地仲叫咗炸響鈴、炸臭豆腐、杭椒炒鱔、糖醋骨、有一款唔知叫做乜嘢，類似魚蛋咁又有D菜，仲叫埋小籠包同銀絲卷，個叫化雞有D似八寶鴨，裡面係一D類似梅菜嘅條條，成隻雞煮到好淋，味道都唔錯，小籠包嘅味道係同上海嘅小籠包唔同，肉嘅味道比較清淡，皮亦都比較厚，而且冇咁多汁，所以食起上嚟感覺冇傳統嘅上海小籠包咁好食！銀絲卷就分別不大，始終銀絲卷本身係冇乜味，糖醋骨個汁幾好味，但係排骨就骨多肉少，杭椒炒鱔幾啱我食，佢有少少辣，都幾惹味，個炸響鈴同埋炸臭豆腐就值得一讚，未食過咁脆嘅炸響鈴，佢脆得來係好幼細，炸豆腐夠晒臭！兩款都好食！

雖然我地食到非常之飽，但係總唔能夠唔食佢嘅甜品，大家一致選擇高力豆沙，別無他選，剛剛炸起的高力豆沙好好味！食完飯大家仲雞啄唔斷，繼續喺度傾計傾計，傾到落樓下已經要約定下個月食buffet，因為其中一個好友或舊曆七月唔好出街，所以我地要等到舊曆八月先至可以同佢出街出來食飯！仲要約定10月去燒嘢食呢！