上個月，同好友食生日飯時約好左今日去澳門玩，我地一早坐9:00船由上環過去，其中一個好友因為住屯門，所以佢自己一個在屯門上船，然後在澳門等，去到澳門過關嘅時候我和一個好友唔記得咗上網登記自助過關，要排隊過關，所以比佢哋遲咗一步行出關閘，先出閘的好友等緊我哋嘅時候，咁岩撞到我老細，我就因為遲咗出關閘，所以同佢緣慳一面！
人齊就一齊坐酒店 shuttle ，先去新葡京，因為去附近食瑪嘉烈葡撻！呢間之前來過，我地叫左半打，坐低食同飲野，今朝都幾大雨，坐在店外食野，望住條街落緊雨，都有D休閒寫意！
食完葡撻，行去議事亭前地果邊，行行下經過一間叫做 Loja Das Conservas 的店，這是一間賣沙甸魚罐頭的店，裡面除了沙甸魚，還有些魷魚、劍魚之類的罐頭，小量砵酒、橄欖油等等，我地試食完買左兩罐，我自己買左幾罐，又買左厨房布同蜜糖，店入面有隻貓，同佢玩左一陣，見到店入面有布製的沙甸魚罐頭鎖匙扣，都幾得意！
買完野繼續行，本來去祥記食麵，但係冇開，就行左去食胡椒餅，冇台灣果D咁好食！跟住去左大山包，影下相，再入去地下室參觀，第一次入去大山包，呢個展覽室好細，行一個圈就走，跟住上大炮台，大家行到身水身汗，今日好熱，又落雨，行過澳門博物館，講笑話去左澳博！( ◠‿◠ ) 大家熱到不行，要搵地方凉冷氣！行去最近果間十六浦賭場，入去飲野同凉冷氣，好友坐低玩三公，我地企旁邊等，等左一陣，我地幾個去玩電子輪盤，我地用$100 本金，玩左三盤，竟然贏左$500，真係好彩，玩完之後去會合返玩三公的好友，好友就輸咗幾百蚊，大家已經凉夠就去食嘢，我地坐 shuttle 去氹仔，行過去官也街食午餐，去到官也街已經三點幾，去咗一間叫做波爾圖葡國菜館，我哋叫咗麵包焗葡國雞、葡國乳豬飯、檸檬白酒炒蜆、牛仔骨、沙甸魚等，食物嘅味道唔錯，食飽飯當然係食甜品啦，去咗斜對面嘅莫義記買雪糕食，買咗貓山王、D24、芒果、大菜糕，買緊嘅時候突然間落大雨，我哋買完就即刻去附近凉亭避雨，順便食埋杯甜品，食完又去返買手信，買完手信又行返去搭shuttle 去 Galaxy，行左一陣，又搭 shuttle 去巴黎人，呢邊又落雨，我地上去巴黎鐵塔7樓，因為7樓係免費，可以上去47樓，但要付款，如果星期三至星期日係免費，可惜今日唔係星期三，但係今日就算想俾錢上去，都上唔到，因為今日冇開！
我哋影左一陣相，就搭返車過返去 Galaxy ，嘗試問吓我地訂咗buffet可唔可以早D入場，餐廳果邊話可以，我地就去附近買埋手信，買完手信就去食自助餐，今次係去食群芳，之前食過一次午餐，今次食晚餐，食物選擇都算幾多，有生蠔、長腳蟹、龍蝦、壽司、刺身、佛跳牆等等，飲品方面係任飲的，對於我哋呢D會飲酒嘅人來講，又真係幾抵，我地都係主攻海鮮類，呢度有 Yorkshire budding 食，我都食咗兩個！
食飽咗就趕住去搭船，我哋搭 shuttle 去返外港碼頭，我哋買嘅船飛係11點，諗住早少少上10:30的後備位，不過冇晒位喇，只能夠搭返11點嗰班船！今日雖然又熱又攰，不過真係玩得好開心，好難得成班朋友一齊去玩，我地已經講定下次北上，可能只係食一餐飯就返嚟果種，好期待呢！
沒有留言:
發佈留言