出去尖沙咀睇戲，因為有張贈券，睇戲前先來食D嘢，知道堪富利士道開咗間小店，去到見到原來係一座新起嘅單幢大廈，係一間服務式公寓，有三層係食店，如果唔係特登嚟搵佢，真係睇唔到呢度有食肆，因為個門口只係一般住宅入口，要望清楚先見到有個水牌，因為呢座樓係新嘅，所以呢間食肆都好新淨，不過搭電梯嘅時候，見到店名唔係宜家呢個，唔知係轉左手定係改左名，上到去一樓，店裏面只有兩、三個客，大把位可以任你坐，揀咗個靠窗卡位，可以望到街景，呢度嘅裝修都幾簡潔，餐牌亦都簡單，主要係食餃子/麵，同埋叉燒飯，仲有一D小食之類嘅嘢，不過竟然係冇飲品！只有湯或免費嘅玄米茶，叫咗一個失傳黑毛豚腩叉燒流心蛋飯，跟飯有一碗湯，係蟲草花粟米紅蘿蔔豬骨湯，個叉燒半肥瘦，味道都幾好，流心蛋就唔夠流心啦，應該話係半熟蛋，個湯就好好味！另外仲有餃子，叫咗個雙拼，七味辣子健康走地雞肉餃子，同埋白菜馬蹄黑豚肉餃子，可以選擇蒸餃或者炸餃，再搞就要加多$10 ，蒸餃就跟埋一碗湯，都係蟲草花粟米紅蘿蔔豬骨湯，不過比頭先果個湯大碗D，店員話本身冇做雙拼，不過可能冇乜客就冇所謂啦！另外仲叫咗麥芽糖走地雞翼，雞翼甜甜地味道都唔錯，整體成間鋪都好家庭 feel，店員很友善，地方很清潔，食物都係好手作、自家製嘅味道，以後去尖沙咀又多個飯堂喇！
沒有留言:
發佈留言