今朝一早起身去酒店大堂食早餐，餐廳早餐食物嘅選擇都幾多，而且都幾豐富，我哋都好好胃口，食咗好多野，我食咗三個麵包、生雞蛋飯、納豆、沙律、仲有幾舊肉同埋炒蛋，飲品我就淨係飲水，唔敢飲咖啡，驚沿途上山難揾廁所，因為食完咖啡成日都要去水！
食完早餐返房攞行李，由酒店望出去，見到條河，又可以遠眺一座古城！係天色有D暗，影出來有點灰暗！希望上到山會出太陽啦！
今朝嘅行程係上鏡山展望台，由酒店出發大約15分鐘車程就到山腳，其實好近不過山路比較多，係個山上面轉來轉去花咗D時間，都用左15分鐘先上到去，呢度地方都幾大，除咗有一個鏡山神社之外，亦都有個好大嘅公園，而展望台就有兩個，我哋去咗西面果個，呢度冇乜人，因為主要係要揸車先上到黎，只係見到一團韓國人，好彩冇大陸團，除咗一團韓國人喺度影相之外，有幾個日本人喺度打雀，即係用長距離驚頭拍攝雀鳥，因為呢度有幾隻鷹不停在附近盤旋，亦都有D本地人自攜望遠鏡喺度睇景，我哋當然除咗影相之外就梗係放飛機啦！不過見到有幾隻鷹，都驚佢地會襲擊我地隻雀（飛機）！雖然冇比麻鷹襲擊，不過拍攝過程唔係太順利，因為我換左新手機!!!!!!!!!!!!!
放完飛機我哋就喺公園嗰度行咗一陣，影下相睇下野，跟住就要離開呢度，要過去系島果邊食午餐！好友一早上網做咗search， 10月初係開始食蠔的季節，所以佢揀左一個地方，位處於海邊嘅養蠔場，果度有一排食店，全部主要都係做海鮮，當然主打係蠔啦！我地鎖定左一間叫做正榮的店，去到現場，我地再望下，見到最爆場都係正榮，所以唔使諗，一於幫襯佢！我地睇餐牌果陣，已經好多野想食，呢度D店員英文比較弱，好彩有圖文並茂的餐牌，全程指手劃腳落單，我地想食龍蝦刺身，問咗店員，佢大概嘅意思係唔同size唔同價錢，我地就去海鮮檔果度睇下，店員先俾咗一隻細嘅我哋睇，我哋嫌佢太細隻，跟住佢攞咗中size俾我哋，覺得呢隻size差唔多，所以就揀咗隻中size嘅，價錢係¥8500，我哋覺得都好合理，在香港要食龍蝦兩食，刺身加煮湯，一定貴一倍有多！龍蝦送來的時候，刺耳上還加上了金箔，顯得特別矜貴，而且龍蝦非常之鮮甜，龍蝦頭同身都攞去煮湯，剩低D肉都唔好嘥！除咗龍蝦當然一定要食佢哋嘅蠔啦，呢度嘅蠔每份只係¥1000，每分大概有12至13隻，雖然佢唔係好大隻，不過好鮮甜充滿濃濃嘅海水味，好好食！我哋仲有叫咗鮑魚、蝦、扇貝、大沙甲等等，全部都好新鮮好好味！呢餐真係食得好開心好滿足！唯一嘅缺點係呢度太熱啦！雖然出面有風，但係呢度屬於室內，唔係甘通風，亦都冇風扇，加上每一台個火爐，真係好熱，呢度有提供一D橙色嘅風褸俾人客著，我地估原因係避免衣服吸上燒烤味，同埋D蠔爆汁彈落件衫度，我地因為太熱都冇着到，但係一行出門口，就非常之涼快！
食完大滿足嘅一餐，再出發去佐賀，呢段車程有D遠，要個多小時，沿路行高速公路已經好快，我哋先返酒店check-in，放低左行李再出發去御船山公園，由酒店去御船山都要成個鐘！去到附近開始塞車，我哋諗緊係咪好多人去同一個地方，未上去御船山之前，經過一間美術館，美術館已經關門，不過門口都有拍咗D車，我哋上御船山嘅時候，有D大叔在指揮交通，叫我地去第二個停車場，去到第二個停車場又叫我地去臨時停車場，去臨時停車場果條路，離開御船山越來越遠，我地覺得唔對路，因為沿路有好多人行返出去，我哋諗架車係咪要泊好遠，然後行返過去，但係我哋估計果條路起碼要行20分鐘，我哋諗起頭先上御船山之前果間美術館，門口可以泊車，於是我地返轉頭，將架車泊喺美術館，由美術館上去御船山只需要行幾分鐘！唔使排隊等泊車，慳返好多時間！
今次去御船山公園嘅原因，係佢秋季有個特別嘅 event，就係夜間有燈光表演，加上日本呢兩日係假期，明天不用上學，所以特別多人去睇，我哋一早在機場已經買咗入場券，因為驚要排隊買飛，雖然多人，但係原來買飛都好快，我哋唔使買飛就直接入去！一入去就有一個湖，呢度會有一個燈光表演，就係會投影一些彩色的錦鯉魚在湖上，然後有個真人坐在湖上的船，而錦鯉會幻化成為彩帶，畫成一幅彩色嘅話，仲有音樂配合一齊播放，都幾靚！而另一個比較特別嘅就係一個投影瀑布，雖然個瀑布係用一幅白布投影落去，但係個瀑布流到最底部嘅大石頭，係真嘅石頭，所以都幾特別，要排隊先可以埋去影相，不過條隊都排得好快！另外仲有D燈光在草堆上漸變，都幾好睇，我哋行左一輪山，又影咗一輪相，好攰！跟住就走！
晚餐去酒店附近食，一早在網上搵咗一間叫做笑家的烤肉放題，既然身在佐賀，一定要食佐賀牛放題啦！好友先車我地去攞位，佢泊返架車返洒店，再行去笑門只需幾分鐘，因為好友要飲酒，所以唔揸車！我地先入去攞位，呢度全部榻榻米坐位，燒肉放題加飲品放題要¥7000，限時90分鐘！一坐低就 order 左五款佐賀牛不同部位，但係佢先來一碟雜錦肉。有豬牛雞，目的係令你飽左D先，就食唔到咁多，我地睇過餐牌，散叫五款佐賀牛大約要¥4300，每人叫兩轉已回本，不過比第一碟雜錦肉頂一頂，加上午餐的海鮮食得好飽，令我地食唔到咁多，蝕左！不過飲酒就冇蝕！
食飽左行返酒店，今晚住 Tokyo inn Saga Ekimae，之前成日見D旅遊書介紹平價酒店，都有呢間東橫 Inn，佢好似 APA咁，有好多間，今次第一次住 ，設傋算唔錯，房間比 APA大，起碼張床唔會斜埋一邊！係床頭冇插電位唔方便！坐左成日車好攰，一瞓落床已經不醒人事！
沒有留言:
發佈留言