paper moon

早在幾個月前，海運大廈擴建之後，已經想試呢間餐廳，今日終於可以一試，呢度個景幾靚，可以望到成個中環至灣仔，呢間係意大利餐廳，在入口處望到個焗薄餅嘅爐，我地當然要叫一個Pizza試下，叫咗一個辣肉腸、芝士薄餅，前菜叫咗一個火箭菜牛肉，另外叫咗一個龍蝦鮮茄意粉，我哋就叫咗兩杯 cocktail 飲，呢度上菜都非常之快，先來麵包、橄欖油同埋醋，味道都唔錯，前菜未食完， Pizza已經到在，傳統嘅意大利薄餅，都係比較少餡料，只係好簡單見到臘腸、辣椒片、芝士就係咁簡單， Pizza都幾大件，食到我哋好飽，跟住再上埋意粉，好彩份量唔算太多，不過真係好飽，雖然食到咁飽，仍然想試下佢地嘅甜品，所以叫咗一個 Tiramisu ，另外叫咗一個椰子 crème brûlée ，等緊甜品嘅時候，維港兩岸就播緊幻彩耀香冮，好多年冇睇啦，以前同好友周不時去尖沙咀食飯，好多時係睇到幻彩耀香冮，呢幾年都冇乜出尖沙咀食飯！

食完甜品真係要出去行下，因為實在太飽了，在 海港城行下街，先至冇咁頂住！

友和

很多年沒有去這家日本餐廳了，今日行咗幾間食店都唔知食乜好，忽然就想起這一家，就去睇下有冇位！

呢幾日不斷落雨，好多食店都唔多客，呢間都唔例外，上到去都見到幾多位，我地坐咗一間二人房，房入邊仲有一部細細部嘅電視機，見餐牌有D套餐，主要都係二人餐同埋三人餐，二人餐好似好少嘢食，所以叫咗三人餐，不過都驚份量太多，但係又想食龍蝦，所以都係叫咗先，先來沙律同魚乾，跟住係刺身拼盤，刺身非常厚切，龍蝦就好細隻，不過好新鮮好好味，跟住就上埋卷物，食完刺身同卷物，都已經幾飽，我地睇下電視，再等之後的食物，仲有豚肉生姜燒，同埋蟹膏炒飯，食埋真係好飽，但係仲有燒帆立貝！好彩食物嘅份量都唔算好大，兩個人食三個人嘅份量，都真係好飽，我地有叫到 sake 飲，sake 杯好特別，印象中好似之前已經見過，但係唔肯定係咪喺呢度見到！食飽飯坐咗一陣就走喇，始終食得太飽都係要行下消化下好D！

Made in H.K restaurant

以前去朗豪坊睇戲果陣，都好鐘意去食戲院旁邊果間泰國菜，不過泰國餐廳執咗，變咗一間港式餐廳，叫做香港製造，上星期見佢未開，今日見門口擺晒花牌，見客人不多，既然咁多位，就試試！

有D肚餓所以叫咗一個沙律，同埋一個串燒牛肉飯，沙律比想像中大了點，都係簡簡單單有D帶子碎同埋蟹籽，用日式嘅芝麻汁，清清地都幾好食，D菜都幾新鮮！牛肉飯亦都比想像中大碗，好似太多嘢食，都驚食唔晒！牛肉串燒有兩串，仲有好多伴菜，慢慢食下食下都食得晒，食完野飲埋杯 mojito 就飽晒 !

Gioia charcoal grill and oyster bar

又去西環食飯，搵到呢間餐廳有生蠔食，又去試吓啦！

午飯時間只有兩、三枱客，見呢度午餐做緊優惠，四人同行一人免費，我地得兩個人所以享用唔到！我地叫咗兩個唔同嘅牛扒餐，生蠔的選擇就唔多，如果逐隻叫嘅就只有三款，所以叫晒三款試試，蠔嘅size唔係太大，都幾新鮮，係有少少蠔殼碎，美國牛扒煎得比較生，不過肉味都幾濃，日本牛扒就煎得過熟，而且肉味比較淡，應該先食日本牛，然後至食美國牛，我地倒轉左次序食，所以覺得日本牛淺味，而且佢個汁都係比較淡D，不過味道都算唔錯！

呢度附近都有好多餐廳，好似好吸引咁，下次可以再試下另外果D！

Cristel 中式鑊

前日去會展見到我一直想買果隻 Cristel 中式鑊，但係我唔知佢特價係咪特別平，上網搵左一輪，似乎係算平，心思思諗緊好唔好再去會展買，我成日覺得早買早享受，遲買平幾舊係不變嘅道理，沒有最平，只有更平！不過屋企用緊果隻LC  TNS 鑊，上次朋友嚟煮飯嘅時候整到花晒，始終係易潔鑊，覺得佢花左唔知會唔會有D塗層物料甩出嚟，都唔係太敢用，雖然個鑊都好好用，不過真係太容易花，所以左諗右諗都係買個不鏽鋼鑊比較安全D，一直心儀呢個牌子，因為聽講煎魚零失敗，唔會黐底咁話，不過覺得都要講技巧，有技巧就乜嘢獲都唔會黐！其實我幾鍾意 deBuyer 個牌子，不過其實我貪佢個手柄係巴黎鐵塔造型，至於好唔好用，就似乎見唔到有好多好嘅 comment！

今日人在上環，即管去永安睇下價錢，我諗住如果佢貴過會展$100以內，都會喺呢度買，因為要搭車去會展同人迫，又要買飛入場，車錢時間都要，所以即管去睇下，佢嘅中式鑊主要係有34同38 cm兩款，在會展見到兩款一樣價錢，送一個20 cm 嘅煎pan，呢度見到38 cm同會展一樣價錢，34 cm就平左$200 ，但係兩款都冇贈品，煎pan 要加 $498換購！我就發揮下我議價能力，因為我見到呢度好靜，好明顯冇晒客，D客去晒會展買野，就係議價好機會！埋去問吓 sales姐姐，我問佢係咪有煎pan送，佢話會展先有得送，不過（呢個時候不過呢兩個字，就即係有得傾！）可以幫你睇下做唔做得返會展個優惠，我話俾佢聽會展送煎pan，隻鑊34 cm同38 cm係一樣價錢，我梗係買大D 啦！見佢打電話問人，問完之後話可以做返一樣優惠俾我，佢仲話另外送多支鑊鏟俾我！我記得果日喺會展見到個鑊鏟要二百幾蚊，佢話見我嚟呢度幫襯佢，佢又冇生意，所以送埋鑊鏟俾我，咁我梗係多多益善啦！

買左個新鑊梗係要試吓啦！即刻買條魚返去煎下先，其實我都好少煎魚，因為我多數食蒸野，不過都即管試一試，屋企原本有個孖人牌不鏽鋼鑊，但係黐鑊黐不得了，已經打咗入冷宮，希望呢個OK啦，睇鋼水都好過孖人牌嘅，買咗條紅衫魚一試。sales 姐姐教我返去洗一洗隻鑊，再煲一煲水先至好用，我照足佢嘅講法去做，佢仲叫我煲水果陣加一匙白醋落去，我洗完之後就即刻用，佢問左我係咪用電磁爐，佢話如果電磁爐就先用五或者六度熱左隻鑊，等D油出煙之後，教低一度火力去煎魚，我驚太大火，所以教低咗兩度，煎煎下又覺得個火力太細，煎另一面嘅時候，就教返大一度，條魚煎出嚟都有少少黐底，不過都好過之前用嘅不鏽鋼鑊，效果都算滿意！下次可以試吓煎其他魚，同埋控制好少少嘅火力，我覺得我今次教細咗個火，下次應該可以掌握好D！

博多ん丸

今日去尖沙咀補色，去 iSquare 食野，見呢間拉麵店開左一排，一路都未食過，所以去試試，以前呢個位係食意粉的 Te，成個商場最少人應該係佢，都堅持左好耐先執，轉左拉麵店都幾個月！

呢度嘅選擇唔係好多，經營模式有D似丸龜製麵，都係可以自己夾一D炸物，不過今日見佢冇炸物，可能係非繁忙時間所以冇，拉麵就只有幾款唔同嘅湯底，我叫咗最基本果款博多丸，佢係海鮮加豬肉配豬骨湯底，見佢呢度今日好靜，得一、兩枱客，買完飛俾個牌你坐低等，之後會有人攞俾你，碗麵個賣相麻麻地，不過D湯都幾好味，麵條稍為淋咗D，因為我比較鍾意食硬身的麵，豬肉嘅味道都可以，海鮮就麻麻地，D蝦應該用火槍燒過，所以有D黑黑的，叫做試過就算啦，見到張單寫住可以下次當$5用，在丸龜製麵都用得，證明係同一個集團，可能同果間丸龜製麵做咗咁耐都做得住，所以開到間唔同形式嘅睇下可唔可以有生意做啩？

一幻

今日去睇家電、家品展覽，會展極之多人，因為同時有美食博覽會，我冇去美食博覽會，淨係想去睇吓家電、家品，呢邊嘅會場靜好多，而且主要都係展銷，好多電器同埋家品都係做特價，當然唔少得一D示範，我見到我一路想買嘅不鏽鋼鑊，但係覺得價錢唔係特別平，都係考慮下先！

去睇展覽之前，去咗食拉麵，呢間一幻，未開之前見到個鋪位好細，知道佢會在呢度開店，開咗之後因為多人，一直冇去試，今日就去試一試佢，店子比想像中大，店內只有兩、三個客，我坐咗則邊面壁位，叫左一碗原味拉麵同餃子，拉麵的湯底好重蝦味，麵條就揀咗粗麵，味道都 ok 唔算特別好食，拉麵入面有半隻半熟蛋，同一塊叉燒，叉燒就普普通通，至於餃子就麻麻地，我以為呢D比較出名日本拉麵店，餃子會好食，但係佢好似係雪藏餃子，而且裏面冇乜汁，所以麻麻地！

飯局作客

又去好友家食飯，本來七大一小的八人餐，其中一個好友有事走左，佢剛走，我便到！

今日整左蒸肉餅，因為有小朋友同孕婦，有兩塊牛扒，一塊要全熟比孕婦同小朋友食，另一塊要五成熟，比大人食！屋主炒左碟兩碟豆苗，蒸左蝦、蚌、石斑，炒左碟蜆，仲煲左蕃茄薯仔湯，個湯好好味，好足料，唔使落鹽，都好夠味！

走左的好友因為朋友有事才走的，因為她走的時候我不在場，好友們話佢喊住走，令我好擔心，夜晚食完飯 WhatsApp 佢，話原來佢個朋友去世，剛送走了他，我只能安慰她幾句，都唔知講乜好！