慢煮工業

今晚即興約咗好友食飯，我睇完戲同佢會合，去咗太子呢間餐廳食，其實呢度剛剛開業無耐果陣，我已經來過，只係佢冇位所以冇食到，今次依然係冇位，不過得我地一枱等，咁就等下啦！今日仍然好熱，坐响出邊等都幾辛苦，好彩都唔係等太耐，呢度餐牌食物選擇唔多，因為主要係慢煮嘅扒類，而且呢度係半自助式，要自己埋去收銀處落單，自己攞水飲或者餐具調味料等，店內嘅冷氣唔係好夠，因為樓底好高，個冷氣機又好舊，而且成日開咗門，搞到我地要攞芭蕉扇出嚟用！

我地 order 左西冷牛扒同豬鞍，兩個扒都沒有汁料，牛扒上面有鹽，所以唔使落汁，豬鞍上面都有小小調味， 切開個扒睇，的確係慢煮，不過塊扒唔算出色，雖然係慢煮，但用了普通質素食材，只能夠話保持到肉汁，而肉味唔算特別好！side dish 有薯條同椰菜仔，椰菜仔烚過了，有點黃而且很濕，薯條亦都唔見得特別好食，整體感覺這店子是一班年輕、而沒有太多食肆經驗的人做，廚技和經營方式都很年輕，沒有經驗的感覺！所以見到人客都係以年輕人為主，因為價錢比較平，較成熟的食客會感覺食物質素好一般！

反啪啪同盟 Blockers

Julie、Sam、Kayla 三個由細細個第一日返學就相識，Julie嘅媽媽同Sam 、Kayla 嘅爸爸成為咗朋友，三個女孩一同成長，直到畢業舞會前夕， Julie決定要在當晚失身，作為好友的 Sam 、Kayla 相約當晚一同失身，在他們出發前往舞會的時候， Julie 的媽媽發現他們的短訊內容，與兩個爸爸一同前往阻止⋯⋯！

之前睇咗trailer 冇諗住睇呢套戲，不過好友話好好笑，見到佢上左畫成個月，都仲有好多場，所以就去睇下，雖然佢搞笑場口係好好笑，但係搞笑嘅場口唔多，大概只有兩、三場係搞笑，其實可以加多D搞笑場口！

飯局主場 - 第十四回

近幾個月冇招呼朋友來吃飯，好友生日，原本去佢屋企食，因為種種原因改了期，亦改了去我家！每次朋友來，都略略打掃一下，徧徧吸塵機壞了！唯有用傳統方法，掃把！

清潔好，先去九龍城買蛋糕，壽星仔指定要食 Tony Wong 的拿破倫蛋糕，另一好友的小朋友不吃芒果，所以要買士多啤梨拿破倫，去到見只有芒果和雜莓，唯有買雜莓，反正都有士多啤梨只係加左berries ！買完蛋糕返屋企放低，身水身汗了，搭車出尖沙咀買野！坐巴士可以涼冷氣，有D肚餓，如果食碗拉麵又驚太飽，最後買咗個麵包頂住當先！

行咗去 franc franc 睇嘢，因為尋晚打爛咗個皂液樽，所以買返一個，然後撘車去旺角，再轉小巴去大成街街市，約了好友一齊去買餸，今晚煮幾味小菜！買左條英䱽返去煎，都幾貴！貴過買海斑！仲有鮮蝦，整茄汁蝦碌，豬肉餅、湯浸莧菜、牛肉炒雜菜！我地五大兩細，五個餸唔多夠，買埋雞翼，應該夠！

買完餸，又係大廚煮嘅時候，又係成班女人坐响度等食！今日得一個人煮，因為另一個要晏D先到，我都係幫手洗洗切切，好彩有蒸爐幫手，人齊都差唔多煮好，等一陣就開飯，六個餸啱啱好食清晒冇剩！食完飯切埋個生日蛋糕，然後大家坐低傾下計，又同D細路玩下，兩個細路好嘈吵，玩到成12點先走，佢地走晒之後，跟住就到我洗碗嘅時間喇！

Ocean in pot

天氣仍然非常炎熱！ 去西環食個 lunch ，原本想去一間叫做 Little Creatures ，但係比呢間吸引左，店外有狗狗圖，枱面有狗狗擺設，店子半開放式，所以冷氣不太夠，餐牌選擇不多，三款沙律，3-5款主菜，我們叫了一個帶子沙律、一個磨菇湯，一個飯和一個 pasta！沙律只有一塊帶子，菜不算很新鮮，磨菇湯味道ok，如果再濃一點更好！海鮮飯有蝦、蜆、魷魚，味道不錯，pasta 材料基本上和飯一樣，都係蝦、蜆、魷魚！只是不同的 sauce！

店子外是海旁，今日天氣很熱，天色晴朗，最啱航拍......！

Outback Steakhouse

今日好友生日，一早約左今晚去呢度食飯，好友好想食佢地個慢煮牛扒，上次食唔到，店員話要假期先有得供應，點，今日佛誕假期，點知都係食唔到，因為店員話係星期五、六、日先至供應！咁我哋揀咗佢哋 Black label 的肉眼和西冷，另外叫一個羊扒，肉眼唔錯，西冷好多根，羊扒不過不失！好友最鐘意佢地個麵包，都幾好食！

食飽之後去 Sogo 行左陣，又去果攔買榴連食！今晚食干腰同貓山王，干腰好食，貓山王就麻麻地！

醬缸

又到五月之星生日飯，相約好友去佐敦食韓國菜，上星期真係好熱！今星期更熱！上到35度！在門口等位時熱到暈！

店子地方不大，座位好迫，好彩店內的冷氣夠凍！我地叫左醬油蝦同醬油蟹、豬手、海鮮窩，牛肉、芝士炒年糕等，食物質素唔錯，見係韓國人主理，味道應該正宗吧！

死侍 Deadpool 2

死侍受聘到世界各地殺人，還與女友計劃生育，建立家庭，可惜事與願違！死侍去了做Xmen 的練習生，認識到14歳的異能男孩，更一起被關進監獄，失去異能，同時來了一個由未來穿梭時空來到現在的人，為了殺這男孩而來⋯⋯！

之前在飛機上看過第一集，幾好睇，不過我覺得今集好睇D，多咗好多抽水同埋攪笑，雖然無端端有個未來人走咗嚟，有D無厘頭，就係咁先至搞笑！死侍把口唔收，又死唔去，真係好攪笑！片尾有兩段彩蛋，唔使等好耐就出，唔好錯過呀！

今日係哈里王子大婚，英國第一個有非洲血統的皇妃，估唔到英女皇咁開明，可以接受到！

航拍 4 - 大埔科學園

成個月冇飛，好想飛！今日熱到不得了，仍無阻我要飛的興致！原本想去獅子山公園或者慈雲山近麥理浩徑，不過發覺果度好多樹，所以白行左一趟，最後，匆匆忙忙走咗入大埔科學園，去到都成四點！

之前來過兩次參加百萬行，所以大概都知位置，去到白石角海濱長廊，呢度有d人在踩單車/跑步，我就行左去一個樹陰下的位置，唔使咁曬，呢度都有d風，所以都唔算太熱，不過呢度望出去個景，唔係有太多野可以影，茫茫大海的一邊望到慈山寺的觀音像，同埋比華利山別墅，不過距離太遠，飛咗一段路接收訊號開始差，所以要飛返轉頭，而另一邊就係馬鞍山，反而馬鞍山呢邊就近D，可以影到馬鞍山運動場，原本想再飛過去溪沙，不過部機係咁 warning 我，太大風了，飛返轉頭又影下科學園，影海邊海濱長廊就冇乜大問題，飛入D影就有好多干擾，睇返D相，見有兩座樓嘅天台，全部都係發射基站，唔怪得咁多干擾！影完一輪就走，今日流左好多汗！熱到不得了！要返屋企凉下冷氣先！

慢煮羊架

前幾日忙到不得之了，個人攰到不行！真係名副其實exhausted ！今日放假，完全唔想郁，全日都覺得好眼瞓！但係唔敢瞓晏覺，因為驚今晚瞓唔着！明天又要早起身，所以唯有今晚早D瞓算啦！今日瞓醒覺，在家中Hea左成兩、三個鐘！又肚餓又冇嘢食，唯有死死地氣走出街，因為之前攞咗條褲去改，改左成三個禮拜都未去攞，應該話唔係我冇去攞，係改褲果間野冇開，去咗幾次都白行，今日終於可以攞到啦，咁就攞咗條褲先啦！跟住去超市買嘢食，前兩日睇電視見肥媽介紹慢煮羊架，好想食，所以就去買羊架返嚟整！

羊架先落咗鹽、迷迭香、香草、橄欖油搽勻羊架，再放入慢煮袋，個慢煮袋太細，我又懶得攞一卷出來剪裁，所以將個羊扒卷埋少少，塞左落個袋度，然後抽真空，我部抽真空機，之前吸到水份壞咗，後來將佢吹返乾，佢又抽得返真空，不過時得時唔得，今次又得，抽完真空密封埋袋口就搞掂！入去 Anova 個app度set時間，見佢有d食譜，又搵下有冇羊架，見到都有，佢建議嘅時間同溫度，係57.2度煮一個鐘，果日睇肥媽係用59度煮一個鐘，相差1.8度，我諗係生熟嘅程度有少少分別，因為肥媽話想熟D的話就用60度煮一個鐘，我就跟返個app嘅食譜，用57.2度煮一個鐘，煮完出來再煎一煎個面，我冇跟肥媽個食譜煮個汁，見屋企有一小樽芥茉醬，就用芥茉醬點啦！呢一小樽芥茉醬，係舊年我去歐洲住果間酒店，早餐buffet 提供一d好細樽嘅茄汁同埋芥茉醬，所以攞咗兩樽返來，而家用就啱啦！

羊架煮完出來好淋，顏色係好粉嫩色，大概係五、六成熟左右，我用大火煎一煎每一邊，等佢有少少顏色，然後一片片切出來，味道都唔錯，下次有朋友來食飯可以再煮，下次就要煮埋個醬汁試吓先得！

母親節晚飯 - 好彩酒家

又到母親節，平時過時過節都係去家姐屋企食飯，唔知點解馮係母親節都出街食！去咗我他都幾鍾意去嘅尖東好彩酒家，我諗起前幾日，好友問我尖沙咀有冇D平平哋嘅酒樓，我諗好彩都算係比較平，而食物質素又唔差嘅一間！母親節全包宴都係$3388，而且呢度每碟餸都好大跌，當然菜亦都唔少，每碟餸都好多菜，我咁鍾意食菜都覺得太多，所以想唔飽都唔得！當然肉佢都唔係太少！

每次我哋食淨都打包，次次都打包幾盒，今年今次竟然只係食淨一盒炒飯！正左最後一隻菜，因為菜好難打包放多日，所以都冇打包到D菜走，其實每碟餸都已經有好多菜，所以我哋都食到非常之飽，今次甜品有莎翁，味道都唔錯，而且平時好少有得食，雖然好多砂糖，不過撥走少少就OK啦！