去年十月去完大阪，今個月又去！今次坐早機，四點幾起身，去撘5:30 果班巴士去機場，去到六點零，在機場遇見舊同事，大家都係去排國泰已經辦左網上登機果條隊，佢地去首爾，我地去大阪，依家國泰已經做自助行李寄倉，自己將行李上磅貼 label ，都好方便！
寄完行李去搵食！六點幾，想食 Spaghetti House 未開，想食 pizza express 又未開！於是去40號閘果邊睇下有乜食，順便去premium lounge 攞支水，呢邊都有幾家食店，想食池記，7:00 先開，仲有十分鐘，先去攞支水，再回來買野食，早餐的選擇都係粥、麵。
我地8:15飛，地勤叫我地7:35 要到，食完行去閘口差不多7:35，等左幾分鐘就開始叫人預備登機，我發覺國泰做法好似改變左，以前冇咁快登機，依家好似早左登機，然後坐定定等飛，我諗咁可以減低D人遲到的機會，以前覺得有排等唔使咁早去等，依家就要早D到！
機長話飛三小時（咁快？）食個早餐之後搵套戲睇，揀左死侍，睇完再睇 Kingsman第一集，因為睇左第二集，冇睇第一集，睇左37分鐘就埗，回程再睇！去到機場要搭冇人駕駛，一個站就到，海關超多人，如果零晨機就會少好多人！先排隊打指模同影相，再排隊過關，攪左40分鐘左右，去到行李帶，已經見到自己D行李，出左海關，先去攞 sim咭，又在 WAmazing 訂左免費 sim，攞完 sim 去搭火車，同上次一樣，想買 rapit 但係下一班車無咁快，撘普通車急行線，即刻有車，所以都係搭普通車，唯一係冇行李位，呢個鐘數唔多人，都ok，上次繁忙時間真係爆晒，件行李好阻住！
行車時間50分鐘，到左難波，出到去已經係我地要出果個出口，今次訂的酒店是 Sarasa hotel Namba，位置在我上次住的民宿附近，見位置幾好，價錢又平，所以租呢間，地鐵行出來行三個街口便到了，見門口幾新淨，去接待處登記，即刻可以check in，我同好友分別在日本的亞瑪遜訂左温泉床墊，包裹送去酒店，check in 時包裹已經到左，可以拎埋上房，酒店只有12層，每層有15間房，房間細細，但比 APA 的大，而且頗新淨，唔知係酒店新開，定係翻新過？
放低行李出去食小小野，諗住今晚食燒肉放題，唔好食咁飽，先去高島屋，想去食壽司，照知落場！間間食店都落場，唯有去食碗烏冬，頂一頂肚餓先！跟住去心齋橋行街，行行下落雨！好彩我有帶傘！想影地標固力果，未開燈又落雨，所以冇影，走去藥妝店買野，我要搵上次買果支 Retinotime 唇部美容液，好好用，早晚用一次，咀唇全日唔會乾，好啱我呢D經常咀唇乾燥的人，雖然只係早晚塗一次，但每支份量少，一個月左右便用完一支，要多買幾支先得！搵左好多間都冇，原來要松本清藥妝店先有！見佢有孖裝，價錢冇平，但送幾包面部美容液 sample ，啱晒我經常旅行的人！買！！！！
買完去大丸買水果，但係大丸仲裝修緊，唯有轉頭去食放題果陣經過高島屋買，在心齋橋見到眼鏡店 Jins ，要幫朋友攞眼鏡去換，攪掂之後，又行下街睇下有乜野食，雖然諗住食放題，但係冇訂枱未必有位，睇下有冇其他野食，想起之前杜如風介紹過食吞拿魚的店在千日前，又去睇下，見門口餐牌都頗貴，所以冇去試，諗住去食上次果間鮨処江戶万壽司，又冇開，去高島屋買完水果之後，就轉返去食放題，真係冇位！！跟住想去酒店附近有家食吉列牛的，又大排長龍，最後去左近住上次民宿果間吉列牛，牛かつ富田，剛好有位，坐低之後已經見有人等位，真係遲一步都冇位！我地叫左兩個260g 的 set，因為好肚餓！水準依舊，好味！食飽返酒店休息，太累了，雖然不是零晨機，都一樣咁攰！
沒有留言:
發佈留言