今日瞓到八㸃醒，醒左就出去搵野食，去左一間叫做 はなまるうどん的店，主要係食烏冬，好似丸龜製麵的形式，自己夾一D炸物，另外烏冬由店員煮比你，然後比錢，自助搵位，食完攞返去返卻口，味道一般，平價之選!
食飽搭車去吉祥寺，呢個地方，之前去過兩次，上次係去搵蛋糕模，再之前一次去食 Satou 牛肉炸丸，估唔到多年後，仍然好多人排隊買呢個牛肉丸，我食過呢個牛肉丸，我唔覺得佢好好食，可能因為炸的原因，我覺得唔係想像中咁好食，今次都係去呢一間店，諗住試吓佢地既牛扒，不過，最終都冇食到，因為出來的時候食了烏冬，仲未食得落，所以睇下晏D點先，在附近行下街，見到旁邊有一個橫丁，裏面主要係一D食店，應該係夜晚先至會開，有部份係開咗，但係個格局似係飲酒的地方，我諗夜晚會幾旺！
去返火車站，行去上次去過的 arte 商場，行左一陣，再去商店街行，呢度有兩條商店街，其實日本有好多呢類商店街，好似大阪心齋橋咁，只係冇咁旺同埋冇咁多人，在商店街行咗陣有D肚餓，見到一間鰻魚店，叫做味乃宮川，就入去食個鰻魚飯，日本有好多傳統的鰻魚飯店，暫時未有食到一間令我覺得好好食一定要去嘅，呢間都唔例外，味道唔錯但係唔算特別精彩，店內只有兩個人客，計埋我就三個人，食到半路果兩個人客走先，剩返我一個包場！
食完飯繼續行多一陣，又經過 Satou ，仍然大排長龍，但嗰啲見到有個小小的商場，叫做レソガ館モール，這裏有一間 pancake 店，叫做幸せのパンケーキ，A happy pancake ，主要售賣 soufflé pancake ，呢種pancake近期都幾熱賣，雖然唔係新產物，之前和好友在大阪吃過 gram ，應該早一、兩年係呢間 gram 大喜左熱朝先，上次在大阪係第一次食，覺得佢好輕好有空氣感，但係味道就略為淡D，有人話呢間好食D，所以就來試一試，雖然食咗鰻魚飯都幾飽，不過永遠都有位食甜品，何況仲要等位，呢個商場係非常之細同埋非常之靜亦都好舊，只有呢間甜品店係最多人，佢門口放咗一個board 板，你係自己填個名同埋寫幾多個人，然後等佢叫名，我填的時候見到前邊有一頁未叫，預計都要等成個鐘頭，我見到有D面向牆/𥦬的位置，都係三個三個的，見到有兩個人坐咗剩左一個位，睇吓有冇機會會坐到單丁位，因為我前面嘅都係兩個以上，不過大部份日本餐廳都係唔會搭枱，呢度都係，所以仍然要繼續等，中間有D人冇等到走咗，所以比預期快，不過有D過咗嘅號碼，返到嚟又俾佢插返隊，原本可以落去行下，但係行咗成朝都有D攰，所以坐低等，最後等左一個鐘頭，終於有位喇！當然佢比張二人枱我啦！我一坐低即刻叫嘢食，因為餐牌在門口已經睇咗，同埋我比較喜歡食原味，先至食到個 pancake究竟好唔好食，其實每枱都係食呢個pancake，頭先等位的時候，都望到佢哋廚房點樣製作呢個pancake ，見店員都好快手，所以唔使好耐就有得食，呢個pancake唔似得 gram 果個咁彈，但係個蛋味重好多，同埋個texture 比較實，覺得呢間好食D！
食完甜品已經差唔多五點，跟住搭車去汐留，由吉祥寺搭JR去新宿轉都營大江戶線，呢條線成日都搭，因為去築地都係搭呢條線，而汐留呢個地方就係築地市場站之前一個站！之前未去過汐留，今次因為知道佢會有個美女與野獸的燈光滙演，去到汐留站，搵一個商場叫做 Caretta ，一出地鐵，就已經見到個佈置，剛剛有一part滙演，當然係播放美女與野獸𥚃面的歌曲，配合一些燈光效果，而佈置就有少少似城堡，而在佈置的中央，有一朵玫瑰花，氣氛都唔錯，如果有埋美女野獸造型公仔或者剪影會好D，只有玫瑰花，欠缺男女主角！個表演每隔15分鐘一part ，而每一part 都係播返同一樣的音樂，而第二組音樂就會係下一個小時播放，兩組音樂輪流每小時一組咁播放，而中央的玫瑰花可以排隊去影相，不過只係音樂停的時候先至可以影，所以都要排半個小時左右先至影到！商場裏面亦都有兩個展覽區，擺放左男女主角果套衫，同埋一D相，在於這裏影相、拍片、聽歌、排隊，都用左成三個鐘頭，附近亦都冇乜嘢好行，所以就返番去酒店喇！
