瑞士雞翼

在網上見到人用鑄鐵鍋整瑞士雞翼，見佢好簡單，我有試吓整！不過我冇用鑄鐵鍋，只係用咗不銹鋼鍋，因為個不銹鋼鍋都好傳熱！

材料：

雞翼10隻

汁料：

鉅利高級醬油100ml

雞湯250ml

冰糖約60g

玫瑰露酒一湯匙

薑一、兩片

將所有汁料煲滾，加入雞翼，加蓋大火煮3分鐘，然後熄火，焗15分鐘，用叉拮中間D肉，冇血水出就熟喇！

試後感：雖然個汁都好好味，雞翼D肉都好滑，但係個雞翼就唔多入味，而且唔多上色，個人認為玫瑰露酒可以落多少少，薑就唔好落咁多，煮嘅時間，我認為煮多半分鐘至一分鐘好D，因為三分鐘真係剛剛熟，有D厚肉少少的差小小先熟透，可能用鑄鐵鍋會好D，下次試下用鑄鐵鍋睇下點！

Tsuta 蔦 つた

食完午餐，行左一陣街，去食拉麵，呢間米芝連一星的拉麵店，早已在銅鑼灣開了店，尖沙咀店是新開的，見有位，就入去試下，呢度係先落單比錢，然後先安排入坐，見佢話味噌拉麵係海港城限定，就試下佢，比完錢就安排入坐，全部係 bar 枱位，可以睇到師傅煮麵，見佢地都唔係好忙，好快就有得食，味道唔錯，但係講唔上特別好味，如果要排隊就唔會食，其實我覺得拉麵店在香港好難長久經營，因為香港人都係貪新鮮，熱潮好快就過，不過佢地選擇遊客區，應該仲可以做到遊客生意！

羲和雅苑

之前見海運大廈多咗一D食肆，今日就去試一試！

今日天氣好好，原本都好想去放飛機（航拍），不過唔係好夠時間，可惜尖沙咀係禁飛區，如果唔係就會帶埋出去放，影下博海都好！

幾間食肆，揀咗呢間食烤鴨的，過咗午膳時間，剩返幾枱客，一坐低店員就問食唔食烤鴨，因為剛剛有另一台叫咗半隻，佢地即叫即燒，要等45分鐘，佢話如果我地要埋果半隻就唔使等，如果唔係要再等師傅重新燒過？唔知佢意思係咪唔會比凍左的鴨奉客，所以要求重新燒過？anyway 呢度既然係主打食燒鴨，咁當然要試一試啦！就order左半隻，我哋要睇咗隻鴨有幾大，先決定叫其他嘢食，隻鴨未到之前，店員擺咗一個黑色座，會發熱有煙出的，應該用來熱住D鴨肉，另外攞咗一個圓形轉盤，上面有八個小碟，同一個蒸籠仔，蒸籠仔當然係裝薄餅， 八個小碟入面有京蔥條、青瓜條、洋蔥條、山楂條、藍莓醬、芥茉醬、甜麵醬，仲有跳跳糖（爆炸糖），呢度既食法有別於一般片皮鴨，佢地分開三個部位食，第一係鴨皮，店員話蘸藍莓醬同跳跳糖食，個人唔係太喜歡個藍莓醬，覺得係人造味道，加上跳跳糖，雖然好玩又特別，但係覺得有D怪怪地！第二係食鴨胸，店員話蘸芥茉醬食，味道都可以，因為芥茉醬有少少似芝麻醬，通吼鴨都幾夾，而第三就係食鴨腿，用返傳統方法食，即係加京蔥同青瓜條，蘸甜面醬用薄餅包住食，又可以用洋蔥條和山楂條代替京蔥同青瓜，味道都唔錯，烤鴨D皮好薄，亦都唔太肥，鴨腿的肉也很juicy，半隻鴨的份量比預期少，薄餅又唔係好夠熱，有點美中不足！

四院呀，加左個佛跳牆、譏燒鮑魚同埋炒四季豆，個佛跳牆竟然好似碗仔翅！味道一般！譏燒鮑魚就整得唔錯，四季豆就一般，整體來說，一D較貴的食品就唔錯，其他就一般！

飯局作客 - 東頭邨

 


今晚又去好友家中食飯，今日煮小菜，蒸左條魚，炒左青瓜，白灼蝦同埋生菜包，另外開左之前買的醤油蝦和醬油蟹，又飲我地至愛的八年梅酒，D餸整得好好食，醬油蝦都好味，但係醬油蟹就唔掂，有腥味！

食完飯，我地一路睇電視，一路傾計，傾傾傾....足足傾左幾個鐘，又 plan 下行程，如果唔係第二日要工，真係隨時可以傾通宵！

莆田

又有好友生日喇，今次去尖沙咀食飯，去咗呢間食店，之前在銅鑼灣的分店食過，見佢都開多咗分店，在馬鞍山的分店也去過一次，好友們大部份都沒有食過呢間，本來今晚一行九人，一個臨時失約，我地八個食，叫咗一個八人晚餐，有五個頭盤、五個小菜，同埋一個主食，煮食我地揀咗炒米粉，食物嘅份量都唔細，我哋都食得好飽，亦都唔需要加野，食物質素都幾好，味道都好好，食完飯，唔少得切蛋糕，壽星女話今晚好開心，雖然佢唔可以帶埋個仔出嚟，不過成班大人傾下計都好開心！

Café Épure x fancl

今日又去high tea ，book咗呢間餐廳，之前來過兩次，覺得佢地質素唔錯，雖然佢地在港威果邊開咗分店，都係比較鍾意海洋中心呢間，下午茶時間冇乜人，個個都係食下午茶，餐牌基本上有兩款set 選擇，食物大致上係一樣，平D果個set有埋scone，貴D果個就有香檳但係冇scone，而平D果個set亦都可以加錢換香檳，不過我想食 scone，所以叫咗平D果個！

見個下午茶甜點比較多，咸點大致上同之前食嘅差唔多，甜品就做咗好多化妝品裝飾，例如唇膏型的朱古力，今次覺得佢地嘅食物退步左，甜品亦都做得好甜，所以我地都食唔晒，呢個set 有一份 fancl 卸妝油試用裝送俾客，不過每一個set只送一份，其實二人 set 應該送兩份先啱！食完野就去攞禮物！見到好多國內人在購物，我地攞完就走，冇買野，因為買得唔多都費事阻住人做大生意！

鹿角巷

早前尖沙咀開咗呢間台式飲品店，剛剛開的時候很多人，門口一大條人龍，所以一直未有機會是試，今日行過見到只有幾個人排隊，所以就去時事，其實本身對奶茶興趣不大，原本想試佢既光飲系列，但係兩款都賣晒，佢最熱買嘅飲品好多都賣晒，原本想試檸檬蜜香蘆薈，又話冇晒蘆薈，最後買咗杯青檸番石榴，都好快整好，味道都OK啦！對比其他台式飲品好D！

奇妙處處通「反轉迪士尼」晚會

尋晚偶左成晚，今日瞓醒好咗好多，因為一早約咗好友今日去迪士尼，希望可以盡量去到，點知好友忘記咗，夜晚又約咗人食飯，咁就不如淨係入去一陣，點知好友個飯局又取消左，我地就可以慢慢玩啦，入到去都係兩點幾，先去涼下冷氣，然後去玩 Iron man，今日唔係好多人，排隊入得好快有得玩，好友的男友第一次玩，佢覺得好正，想玩多次，我地話玩埋其他先再去玩，跟住去咗玩迷離莊園，直情唔使排隊，冇人玩！玩完出嚟買咗少少嘢食，佢哋食我就冇食，因為我無胃口食唔落，跟住佢哋又玩灰熊山谷，我就響出面等佢地，嘗試幫佢地拍片，不過郁得太快都影得唔清楚，跟住再去排危機次元任務，原來係同一D英雄人物一切完成任務，所謂任務其實都係企喺度聽佢他講，冇實際互動，不過佢地D9佈置場景都整得好靚，睇完出嚟都天黑喇，跟住再去睇夜間萬聖節巡遊，同舊年果個一樣，只係多咗烏蘇拉！睇完即刻去排詭迷宮、詭夢實驗室，呢度只限登記左嘅會員先可以玩，同舊年果個都係差唔多，不過驚嚇氣氛重咗，裏面有好多個房門，冇人話俾你知開邊個們，大家都戰戰兢兢咁去開門睇下，氣氛都幾好，睇完出嚟放緊煙花，睇完煙花當然係最多人離開啦，但係今日係會員試玩日，會員可以留低玩到十點半，我地去咗中菜廳食飯，應該話佢地食飯，因為我食唔落！食完飯我地再去玩Iron Man ，基本上得幾個人玩，我地連續玩左兩次，之前坐第一行，後來坐第四行，發覺坐後面係搖晃得比較勁，下次都係坐後D！跟住再睇玩埋4D先走，好少玩到咁野玩到咁盡！今日完全冇買嘢，因為上次已經買咗，都冇乜特別新野出！