姊妹欲蒲團 Rough night

Jess 結婚前夕，四個舊同學相約搞單身party ，一齊去左Miami，仲約 Jess埋佢澳洲的好友一齊去，為咗俾驚喜Jess，佢地請咗脫衣舞男上門，豈料發生了意外，脫衣舞男當場死亡，他們情急之下，決定將屍體毁屍滅跡，卻意外頻生，波折重重，同時Jess的未婚夫以為佢悔婚，不惜千里，連夜開車前往Miami.......!

之前睇咗預告果陣已經好想睇，覺得佢有D似醉爆伴郎團，應該係女版醉爆伴郎團，加上有 Scarlett 做主角，可惜笑料不足，仲有D過於無厘頭，老實講冇乜邊場戲聽到有人大笑，電影完咗之後，仲有一part聽女主角澳洲朋友唱咗首歌，跟住仲未完，最後一part ，當然係交代佢地搵緊的東西收埋在邊度啦！

Ciao Chow

晏晝去完high tea，夜晚又去又一城食嘢，呢間餐廳開咗唔係好耐，睇個名就知道係食意大利菜啦，不過佢係比較平價的，主要係食意粉同薄餅，我地叫咗一客意粉，係羅勒醬雞肉意粉，另外叫咗個風乾火腿火箭菜薄餅，呢度仲可以自選材料的薄餅，不過唔想諗喇，所以叫現成的薄餅，另外叫左個沙律，選好食物先去付款，然後會有人攞俾你，先來沙律，呢度沙律係用橄欖油同埋黑醋，平時自己食開的黑醋，都係在意大利買的，質素好好多，呢度D菜又唔係咁靚黑醋又好普通，意粉味道唔錯，份量唔太多，都好夠食，薄餅就好一般，就真係好似在意大利食的薄餅一樣，唔係好多餡料，就只有火腿同菜同埋茄醬，好簡單，整體覺得食物一般啦，始終價錢唔貴，都唔可以要求咁高！

Lobby lounge @ Shangri-la

一個月前訂位呢個 Birdcage tea set，今日終於一試，印象中冇去過呢間酒店食野，一入門口，係傳統五星級酒店格局，雖然有點老舊，亦不失貴氣，雲石地磚，大水晶吊燈，餐廳內的大花紋地氈，都是很多大型酒店喜歡用的風格，餐廳就在入口旁邊，一早訂位的人客，都被安排坐在窗邊，walk in客都被安排坐大堂，雖然窗邊都有D view，不過出邊多車多樹，加上在地下，不是高樓層，所以都唔係好睇到靚的海景，下午茶的 Birdcage tea set 有兩個選擇，中式或歐陸式，我們選擇了歐陸式下午茶，飲品方面如果選擇咖啡，可以印人客張相在咖啡上，所以我地都揀咖啡！

先來一杯welcome drink，應該是蘋果cider，加一件蜜瓜配火腿，跟住下午茶有兩碟鹹點同兩碟甜點，每人兩個scone ，雖然侍應有講解每款食物，但係冇留心聽，所以唔記得確實名稱，不過影咗餐牌，都知道有D乜嘢食！個龍蝦卷同鵝肝醬都好好味，蟹肉三文治卷同三文魚三文治都唔錯，只係三文魚三文治個底淋咗唔脆！scone 一個係 plain 一個有提子，幾好味，係細舊咗D！甜點櫻花芝士餅同紅桑莓千層酥就比較一般，至於macaron 同朱古力餅唔太甜，都幾好！仲有水果，好飽呢！咖啡張相都印得幾清楚，另外仲有朱古力同笑口棗，笑口棗放在一個迷你鳥籠內，個迷你鳥籠可以攞走，另外仲有四粒朱古力，食完真係好飽！我地坐咗都成三個鐘先走！

檸檬蒸䱽魚

前幾日在網上看見有人示範整檸檬蒸䱽魚，因為自己都成日食䱽魚，就跟人地學下整，原本食譜要用香茅同埋葱放在條魚下面，但係買唔到香茅又唔記得咗買蔥，所以只係放咗薑，同埋用鹽和料理酒活抹在魚身上，先放入爐蒸，然後整檸檬汁，將蒜頭、紅椒辣椒、芫茜梗切碎（又唔記得買芫茜），汁料方面有淡味的豉油、魚露、檸檬汁，三種液體汁料的比例大約是1:1:5 即係一份豉油＋一份魚露＋五份檸檬汁，比例跟原本的食譜有分別，因為覺得太鹹，所以將魚露份量減少左，或者冇淡味就要用少D豉油，再加兩份糖，攪拌好可以試下味，再自己加多減少，條魚蒸好之後，如果有香茅同埋葱就要拎走，然後直接將個汁料淋在魚身上，然後加埋芫荽葉就得喇！因為冇買芫茜同香茅，所以少咗D香味，不過味道酸酸甜甜，好啱夏天食，以後蒸魚唔再淨係得薑葱蒸喇！

4DX 鄧寇克大行動 Dunkirk

星期六想去睇呢套啱啱上畫的電影，覺得唔需要睇4DX ,但係時間係得呢套啱，而且得佢有位，唯有睇4DX啦！開場前去咗戲院旁邊的 Sala Thai 食泰國菜，午市時間食咗個海南雞飯，跟左飲品，都幾大杯，趕住入場都飲唔晒！我都係覺得泰國餐廳的海南雞飯，比好多中式餐廳的海南雞飯好食！

故事講述二戰期間，在鄧寇克的英軍，在海邊防波堤等候戰艦接載他們回英國，在這期間他們受到德軍的空襲，士兵Tommy 和另一士兵 Gibson 抬着傷兵上戰艦，可惜他們不獲離開，要上岸繼續等候，此時載着傷兵的戰艦被擊沉，他們夠了另一士兵 Alex，三人在登上另一首戰艦的時候有遇到襲擊⋯⋯在天上，空軍與敵軍作戰，在擊落敵軍的同時，英軍亦有戰機迫擊被擊落墮海⋯⋯在海上，被政府徵用的民用船隻，前往鄧寇克協助英軍撤離，其中一隻船上，道森和他的兒子Peter 及朋友 George，在途上遇到被擊落的空軍，空軍知道他們要去鄧寇克，便要求他們折返，更因此起了爭執，而令 George 受了傷............!

故事分開三個部分，防波堤、天空、海，三個地方，同時發生的事情，這戰爭電影聯想起雷霆救兵，三個士兵掙扎求存，多少我運氣有關吧！成套戲都幾大製作，海陸空加埋大量演員，雖然唔算話好好睇，但係劇情都幾緊張，因為遇到幾次生死關頭，睇嘅時候都令人發人深省，戰爭對世人的影響。

Amber coffee brewery Hong Kong

食完雞飯，去附近一間開咗冇耐的咖啡店，店子細細，大約有4個在地櫃上的坐墊座位，6張 bar 櫈，同兩張高身圓枱，圓枱可以坐三、四個人，餐牌好簡單，一眼睇晒，見佢夜晚會做酒吧，所以有酒賣，我地叫左一杯 Latte 同一杯 Cappuccino ，佢地用個茶杯裝咖啡，咖啡味道好香濃，同平時在連鎖快咖啡店飲的不同，始終呢類細的咖啡店，比較有風格一點，我地等緊的時候，見到有雜誌放在枱下面比客人睇，我地睇到一本介紹咖啡店的雜誌，有介紹到這一家咖啡店，原來他們有一款特別的咖啡，卻沒有寫在餐牌上，如果早D睇到就會叫來試下，唯有下次再試吧！雜誌也有介紹，店主是一個得奬咖啡師，難怪品質這麼好！

雞功房

之前睇雜誌介紹過呢間食店，話之前賣蟹，叫蟹功房，依家賣雞，所以改左做雞功房！

要上大廈二樓，店子很細，大約廿多個坐位，茶餐廳格局，過左 lunch time ，D人開始走，一入去，店員話剩返一份海南雞，所以叫佢留左先，原本想食頭抽醬油雞，但係賣晒！黃酒雞都賣，最後一份海南雞比我留埋，見到有人入來見冇晒雞就走，其實佢開到五點，六點又晚市，唔知點解唔整多D？

除咗海南雞，店員話仲有醉雞翼，我哋叫咗一客醉雞翼小食，另外叫咗蟹肉伊麵，因為呢間之前係賣蟹的，應該D蟹唔會差掛！海南雞跟咗一碗湯同埋油飯，個湯入口好大陣藥材味，但係入口唔會苦澀，仲有D酒香，幾好飲，海南雞冇預期咁好，雖然份量都唔算少，而且都頗多肉，只係唔夠滑，個油飯唔會好油膩，都幾啱食，而個蟹肉伊麵，蟹肉係好細粒的，味道還可以！醉雞翼略嫌唔夠酒味，整體來講都算係物有所值！

Coffee Central by Coffee Exchange

最近中環剛開始入伙的華懋廣場，開了家護膚品店，地庫有coffee shop，今日同老細去試下！

店內地方頗大，大約有60個位，我地四點幾去，得幾個客，望下有乜野飲，英文餐牌，有D名似係韓國拼音，又冇中文，唔知係乜，老細叫左Mocha，我見有一系列叫 Snow 的飲品，應該係水果 smoothie ，叫了蘋果芒果，老細話唔好飲，佢話冇咖啡味，得朱古力味！我果杯就似奶昔，都係麻麻地！

味一番

老細升職請食飯，一行17人，冒著大雨出去尖沙咀，一於撘的士！竟然無塞車！我地訂左七點，六點已經到左，呢間店因為唔大，佢地將D枱拍埋一齊，已經佔左大半個場，剩返三張4人枱同bar 枱，我地一張長枱，呢種格局唔係咁傾到計，佢呢度冇圓枱，都冇辦法！

我地仲有幾個未到，所以食住小食等，小食有枝豆、雞泡魚乾同埋炸雞軟骨，呢度之前來過一次，食物質素好，所以今次再來，坐至七點幾先齊人，一到齊即刻叫酒飲，叫左支獺祭純米大吟釀五十，1.8公升，店員倒落細樽比我地，呢隻酒易入口，幾好飲，餐廳做緊 promotion ，order 獺祭酒，生蠔可以有半價優惠，我地叫15隻，有兩個唔食，點知得8隻！咁唯有叫佢將D蠔一開二，原來D蠔都幾大隻！好肥美好新鮮，每人半隻都夠喇！

再嚟刺身盛，呢盤剌身好肥厚，而且好新鮮！真係好正！牡丹蝦個頭再攞去炸，送酒一流！食完刺身食壽司，壽司有鰻魚同埋大蝦天婦羅反卷，其他熱葷仲有炸豆腐、鹽燒牛舌、黑豚肉露荀、大蔥雞肉、燒東菇、牛肋骨同埋餃子！好多野食，食到好飽！我地都飲左兩支獺祭，再加一支黑牛純米酒，呢支比較辛口，有幾個話飲唔到！都係大吟釀好飲D！甜品係雪糕，好味！唔記得影相！成晚飲飲食食，傾計，好開心！