亞龍咖喱

今日去佐敦攞介子，跟住去搵食，好耐冇去裕華國貨後面呢邊，上次去牛屋，在寶靈街那邊，今次去呢邊睇睇有乜食，呢邊改變左好多，不過仍然好熱鬧，行左一圈，唔知食乜，諗起好多年前食過的亞龍咖喱，舊地重遊，經過見到有位，入去試下先！

店子細細，坐位唔多，始終舊式食店，坐位比較迫，餐牌一目了然，叫了咖喱牛腩配薄餅，咖喱有好多我諗係洋蔥碎，牛腩唔夠腍，隻碟好細碟，不過牛腩都唔算少，味道唔錯，我叫少辣，所以唔係咁辣，薄餅之後先上，熱辣辣，正！任何包點類都係熱辣辣最好食！想叫多件薄餅，但係食多兩舊牛腩又飽飽地，所以冇叫到！下次再出來試下其他食店先！