東頭邨

又到好友生日啦！去年佢住烏溪沙村屋，地方大好多，今年佢搬咗去東頭邨，雖然地方細左，不過兩口子絕對足夠，招呼埋我地班朋友，都仲有好多位！

今日我哋食蒸海鮮火鍋，我要返工，冇同佢地一齊買餸，佢哋買好晒海鮮洗好晒等我，今晚有蝦、蟹、蜆、花甲、貴妃蚌、象拔蚌仔，平時我哋買海鮮好少買蟹，今次有我最愛嘅蟹，好開心有蟹食！兩隻蟹好生猛，用水養住先，到蒸得先攞出來，我哋先正左花甲同貴妃蚌，逐樣海鮮蒸，等啲汁流落火鍋湯底，不過蒸蜆嘅時候，發現有兩隻臭左，同埋有幾隻好多泥，得幾隻可以食，我哋嗱嗱聲拎走，以免影響湯底！最後先至蒸蟹，兩隻蟹好多肉，好滑，原來好友都唔係太喜歡食蟹，佢哋淨係食蟹蓋啲膏，我自己食咗成隻蟹！

蒸完海鮮就打邊爐，好友買咗手切肥牛，雖然切得幾厚，不過淥完仲好滑！我哋唔係買咗好多配料，因為有海鮮食，好友在大圍通記買的辣椒醬好好味，又夠辣，下次叫佢幫我買番樽先！

食完火鍋，係時候食甜品同蛋糕啦，好友買左Duffy蛋糕比女友，個蛋糕好靚，我哋都唔捨得切，個蛋糕係朱古力蛋糕，表面好多cream，不過都幾好味！食完蛋糕仲有榴槤，今次買咗榴槤唔敢飲酒，上次又飲酒又食榴槤，搞到肚瀉，今次唔敢飲！個榴槤好甜，近期好少買到咁好味嘅榴槤喇！