香港美酒佳餚巡禮

一連四日既香港美酒佳餚巡禮開始左喇，第一次去呢種 event ，好期待呀，地點在西九龍海濱長廊，可以在九龍站步行前往，或者尖沙咀有免費 shuttle bus ，所以都係揀撘 shuttle bus，去到尖東站，在K出口有指示，一出地鐵口 U turn 去中間道，就見到有D旅巴上緊客，人龍好長，龍尾要在梳士巴利道入，近龍尾有個牌寫住等候時間約一小時，行到咁上下有個牌寫住45分鐘，跟住下一個30分鐘，見keep 住有三四架旅遊巴埋站，期實唔使咁耐，在 30分鐘果牌時，有兩間車等繄埋站，都可以上到第二架，不過去到九龍站附近已經塞車，見沿途好多人行過去，條路都好長，我諗由九龍站要行十五至廿分鐘，去到會場已經人山人海，單係售票處已經大排長龍，安排都幾亂，龍尾都唔知在邊度，都唔知會唔會打左尖！個地又多石，不過人龍都keep住行，好少停低，見 AE 咭專櫃竟然話故障，咁多人，想唔壞機都唔得，原本諗住尋日去尖沙咀碼頭買品酒券先，後來諗住入到嚟先買，點知咁多人，仲連二人同行既套票都賣晒！早知一早買左先入去！排左一輪，諗住買一set 尊尚品酒證同一 set 標準品酒證，每邊試少少，點知只係得標準品酒證！尊尚品酒證要在另一條隊買，或者入去尊尚區買，唯有買標準證試下先！隨品酒證送了一個酒杯，用來試酒，每次試飲要比一或兩張品酒券，一 set 有十張品酒券和美食券，亦可以一張張散買，每張$10，但要另買膠杯，我見好多人用膠杯，可能志在試酒吧！買完券可以入場喇！由排隊搭車到買品酒券，然後入得場，足足要近兩個鐘，唔知十點入黎仲有冇時間飲呢？

一入場就係波爾多區，對面有好幾檔食物銷售點，可能大家等得久了，餓極了，要立即買些吃的，每個食品攤位都排晒隊！先買了鮑魚仔和燒雞翼吃，雞翼好香但凍了，味道還可以，鮑魚好細粒，但也入味！打了底，才去品酒，老實說，不懂品酒，只想看看有沒有些易入口，甜甜地既酒可以試下，現場實在有太多酒可選擇了，不知試那種好，仲要個個 booth 都好多人，有D酒商各出奇謀，攪下氣氛，吸引人埋去，對酒既認識好少，所以求其見多人試又試下，飲下酒又食下野，氣氛好熱鬧，雖然好迫人，但係都好開心，在意大利酒區有好多野食，有D廚師即場煮食，同埋點少得食下火腿？雖然食慣西班牙火腿，都試下意大利火腿，佢冇西班牙火腿咁油潤同埋冇咁好味，不過價錢平，另一個酒商都有 Iberico 賣，亦有試食，20個月既 Iberico 價錢當然平一點，店員大嗌最後一個鐘優惠，才發現已經十一點了，只行了半個場，還有尊尚區和甜品天地未去！仲有今日係西班牙之夜，都未去睇 ........ 唔夠時間，我諗如果一早在碼頭買定品酒券，再撘 shuttle bus 入去，應該係最快唔使排咁耐隊 ！

走既時候都幾亂，等 shuttle bus 條龍好長，又搵唔到邊度撘的士！所以行去九龍站轉的士，行到去九龍站附近果段路幾危險，係回旋處，D人飲左酒，要好小心睇車，去到的士站又係大排長龍，等左好耐都冇的士，等左大半個鐘先上到車，在車上聽到 call 台不斷有 call 車，九龍站往 XX ，但係通通冇回應！我諗呢幾日冇乜野都唔好去呢邊！終於要一點先返到屋企！