Sprout

去睇Tron之前，我地响The One 揾食，最多人等位應該係金牌小籠同易牙，呢兩間係食中式，仲有金寶同越棧，睇嚟東南亞食物最受歡迎，行哂幾層最少人就係呢間主打有機食材既Sprout，Menu 既選擇唔多，主要係set menu，亦有聖誕餐，不過最抵食都係set menu，店環境比較簡單，綠色白色既枱凳，光光猛猛，我地個set B有餐湯，只得一款露筍忌廉湯，味道都幾好，飲完湯就食素雞沙律，D素雞幾得意，個中東包就有D失望，唔夠熱，中間碟醬味道好怪！藍青口亦令人失望，細隻都唔緊要，但係好咸！茄汁雞意粉就一般，不過不失，牛扒都OK既，我既餐茶係三莓茶，都幾香。

整體都OK既，以有機同天然為主既食肆唔多，如果好此道既話，呢度都係一個好既選擇，起碼唔使等咁耐，不過當附近食肆都迫爆既時候，都仲有位，都幾難支持落去，呢度仲兼賣有機用品同食物，可能可以幫補吓！