29-7-2010
此行主要目的地是環球影城，聽導遊講，以前無淨係去新加坡既團，通常都連埋馬來西亞去兩個地方，自從USS開左之後，佢哋就忙左好多，多左齋去新加坡既團，令佢地帶多好多團！所以酒店機票都好緊張，令團費都貴了很不少！
朝早在酒店吃早餐，酒店的早餐好得，食物質素高，選擇亦很多，人更多，幸好導遊早一晚提醒要九時前去，否則要等位，我地坐低無耐已經無位，有排等，因為個個都慢慢嘆呢個豐富既早餐！
食完早餐就由酒店行過去環球影城，天氣好好，仲好曬好熱，由於USS入面，全球最高雙軌過山車無開，導遊話安檢有小小唔係好安全都唔敢開，仲要年尾先開番，所以會每位人客送返$5坡紙飲食券同$5購物券，加埋都有五十幾蚊港紙，對於我地唔玩過山車既人，就着數左！
一入到去門口好多人，因為換飲食券既customer service 就在入口，每個family/group 一個代表去換，其他人都企哂响門口，我地就影住相等。換完券，導遊帶我地冲冲冲冲.....去睇史力加4D，我地買左express coupon，可以排快隊。不過史力加4D好似大阪USJ咁，入到去要企幾分鐘聽故事先，我地排得前，可以坐前d睇，套4D其實同USJ 一樣，除左噴水噴風呢d基本野之外，張凳亦會搖動，當然比迪士尼4D更強！
睇完4D，就行過去Lost World 果邊，有Jurassic Park主題既飛鳥機動遊戲，比較啱小朋友多d，行入d有恐龍蛋比人影相，竟然無人，因為個位置較隱蔽，當然我地一影，就吸引到其他人！行出d有工作人員手持玩具恐龍仔同人影相，好得意！再行過d有吉普車坐，好多人排隊，好彩有express，唔使等！
熱到暈！行到去 Egypt果邊好曬！不過d建築好宏偉！好靚！Revenge of Mummy 係黑暗中既過山車，當然我無玩，我地去左食野，實在太熱了！hea 耐d先行！
食完野出來，過去Sci-fi City ，呢度就係玩雙軌過山車既地方，因為無得玩，所以無乜人，見過山車入面已經攔住左，人人都掉頭走，我地見到原來有張過山車凳比人影相，又係影影吓又多人！我地去旁邊玩太空版既"咖啡杯"，不過轉得頗快！
再行過d已經去返近門口既New York City ，主要係購物大道，同美式歌舞表現，旁邊既 Hollywood 好似 Osaka 咁，有d懷舊美國車同餐廳，購物大街，過左呢段路，又去返門口既 Madagascar同史力加 Far far away城堡，再行返去近Lost world果邊，就係另一重要節目，未來水世界！上次去USJ已經miss左，今次一定要睇！我唔知有無分別，不過睇場景佈置，應該分別不大，坐位用唔同顔色分段，最前既藍色，坐呢段係肯定濕哂身，第二段綠色，都會濕身，不過無藍色咁濕，因為開場前有幾個表演人員會同觀眾現吓遊戲，不時用水槍噴人，甚至成桶水淋過去，坐得呢兩段既就預左，所以都玩得好投入！個show有跳水，爆炸，火燒，快艇，完全Hollywood既電影情節放在眼前！
我第一次去主題公園零購物！！由於售賣的物品以Shrek 及 Madagascar 為主，即使USS主題既T shirt , keychain 等都唔係咁靚！手信更加係無！想買盒餅或者朱古力都無，只有棉花糖同爆谷！真係買唔落手！
成個USS就係呢七個主題地方組成，感覺細過我地個迪士尼！！迪士尼雖然得四個主題，但係空間比較多，而USS七個主題就好似迫埋一齊咁，只係建築較宏偉，其實咁既價錢去大阪USJ好過，需然無Eygpt 同Sci-fi City，但係有Spiderman 同Terminator，而且大好多，精品又迎合港人口味，就算想去USS，我諗等佢地起多幾個主題同平返d價錢先！
