金不換

網誌日期：2011-01-19 00:27



今晚同幾個朋友一起吃飯，去了金不換吃泰國菜，印象中沒有去過，我們叫的都是大路野，有柚子沙律，炸蝦餅，豬頸肉，咖喱，炒雜菜等等，個沙律用左d幾大粒既柚子，啖啖肉，好味道，炸蝦餅只吃了一件，因為不太喜歡炸粉做的食物，豬頸肉較瘦，味道不錯，咖喱配蒜蓉包，絕配！大家都好快食晒d蒜蓉包，剩返d咖喱！果碟要撈既河粉好好味呢！不過可能唔係河粉係金邊粉之類都唔定！下次會再叫！

席間，大家都傾吓計，又玩吓電話，又影吓相，share 吓用乜嘢apps，可惜今次唔齊人，下次希望約得齊！甜品叫了椰汁糕，黑糯米，同南瓜布甸，成餐飯都好味，我覺得好食過金寶。

譚魚頭

今天約了好友晚飯，原本想到盛八，卻沒有位，大家都想食熱野，行到雅蘭，見到有間譚魚頭，我地未試過，即管去試試。

我記得好耐之前，雅蘭呢度有間中菜店，唔記得店名，有段時間去食一款瑤柱扒四蔬，那是一道很清淡的菜，現在已沒有了，有近似的也只扒一款蔬菜！上到五樓，看見門口有點舊，記憶中，這店也開了幾年，店裏的位很多，現時正做任食火煱 (總覺得火煱店轉做任食，就等於無生意，唯有轉型！)在餐前的前菜，有一碟橙色的酸酸甜甜的醃菜，幾爽甜，另外一個放了芫茜葱，豆，紅椒絲等的碗，用來加入魚湯，代替豉油"點"，幾特別，不過就好辣！我還加了椒絲！我也很吃得辣，也覺得好辣呢！我們選了魚湯湯底，點了醉雞，金菇，豆腐，魚片，餃，牛肉，菜等，這店的電磁爐都放在枱布下，用有線的搖控控制火力，就不會弄髒爐面，我們只叫了一round食物，已吃得很飽！食飯時講開近日很多人病倒，還有醫生說一些人因流感，再去食火煱暖身，令病情更差.......咁似我既？？？

Zoë Café

網誌日期：2011-01-14 23:26

食完拉麵，係時候甜品了，原本想去天后，但係諗起附近有家餅店，就去試一下，在附近走了一圈都找不到，行埋最後果邊，無就放棄，卻在燈火欄柵處！離遠見到大大盞水晶吊燈，帶點意大利懷舊風情的裝修，店子只有十多個坐位，約有五張枱，有兩張有客，我們選了近門口位置，就在水晶吊燈下，較光猛，方便拍照！hehe !

聽說這店最出名的是一款名為1459 ? 1549 ?唔記得個數字，只知係一款千層酥皮蛋糕，可惜當日售罄，未能一嘗，不過還有很多選擇，我選了樣子很漂亮的Rasberry mousse cake, 還有招牌 Zoe cake ，opera ，hazelnut ，芒果千層pancake，再叫了荔枝玫瑰茶，這個茶頗令人失望，沒有玫瑰花的香，既不是用真花，亦不是用茶包，味道倒像台式奶茶店的飲品，只有味，沒有香，至於各款cake味道都不錯，都有水準，只是感覺不能在眾多餅店中突圍而出，可能那千層酥皮蛋糕是其最好的作品吧！始終沒有吃過，不知是否有過人之處！

Mist

今日去了一趟銅鑼灣，專誠到這家主要食拉麵的"fine dining"食店，短短的新會道，很容易找到，店子很小，坐位約有廿個，還有Bar 枱位，下午的Set lunch 有一碗拉麵，三隻餃子，甜品和飲品，拉麵有不同湯底選擇，有梅、鹽，豉油，辣葱等等，還有兩片义燒，可另加义燒，半熟蛋等，原本想加蛋，但係無貨，跟餐的水餃子，味道清淡，可能我顧住影相，d 餃子凍左，不過味道還不錯，我點的梅、鹽湯拉麵，有一棵梅子，樣子吸引，真是急不及待要吃，先喝幾口湯，味道很好，聽說湯底是用老雞和富士蘋果等熬了十小時的，那义燒切得薄薄的，做到入口即溶的感覺，好食！聽說义燒用的是鹿兒島黑豚腩，至於拉麵，我擔心因影相影得太久會淋了，卻完全沒有！麵條質素很高，味道很好！真的叫得上Fine dining ，也聽說麵條是店主自設工場做的，那份心思，真希望能得到回報，只是甜品令人失望，始終不是主力的一項，不過，這店是一定會再去的。

鴻星-金絲螳螂蝦

前兩日星期一跟家人一起吃飯，到了尖沙咀的鴻星，呢期做緊瀨尿蝦 promotion ，佢哋改左個好靚既名，叫金絲螳螂蝦，有兩款食法，我地揀咗避風塘炒，碟蝦中間果兩節無排好，感覺好似少左一兩舊咁！不過應該唔係既！個餐都好多野食，先來個乳豬，再來炸蟹拑，黃色果個係帶子珊瑚卷，裏面係帶子肉，同珊瑚無關！湯係燕窩石頭魚羹，可以揀竹笙燴生翅，我地要減少食翅，食咁多都好飽，但係仲有海斑，津白同八寶扒大鴨，伊麵！食唔咁就打包，最後甜品有壽包，飽到不得了！原本叫左個飯，好彩漏左單無整到！

今日開完會，同上上司傾工作上既野，呢排為左呢件事都好困擾，只希望能早些解決！

正冬火煱

網誌日期：2011-01-10 22:54



上個禮拜同亞雯去打邊爐，果日都好凍，我地兩個人去食，今次去太子既正冬，呢度附近都好多食肆，而且好多都舊舊地，我地去到既時間尚早，有好多位，見有d枱用電磁爐，有d用gas爐，我地果張用電磁爐，依家覺得火爐好似無咁安全！

我地叫左半斤中蝦，只有七隻，但係我唔小心整跌左一隻！另外又叫左本地肥牛，白鱔片，油墨菜，響鈴(炸腐皮)呢排好地方都有得食，佢可以唔淥就咁點甜酸醬，脆卜卜食，或者放入湯，拖一拖就食，我唔係太喜歡，覺得好油淋淋，放入湯亦會令d湯好油，我地仲叫左三種丸，芥辣墨魚丸，梅菜豬肉丸同埋唔記得芝士乜野丸！都幾特別。食物質素都幾好！

我地發現個女經理好面善，我問佢係咪之前响福苑做，佢話係，我地講笑問佢有冇折，佢就送左碟牛柳粒比我地！多謝晒！

Yamm

今日無無聊聊，同好友閒談時，即慶收工時去食飯，我地一心去The One揾食，有興趣果d 唔係太貴就無位，諗起The Mira 有間好出名既Buffet ，於是去The Mira 睇吓，去到已經八點幾，行到入口見侍應正在招呼幾個外藉人仕入坐，應該有位! 侍應話等一等，有人埋單，好快就有位比我地，好開心 walk in 都有位，聽講要預好早訂位，我諗總有人會一早食飽就走，下次訂唔到位可以試吓晏d去，侍應話十點鐘完，我地覺得OK夠時間食。

一坐低即刻攞野食，食物選擇好多！凍海鮮有龍蝦，琵琶蝦，長腳蟹，翡翠螺，法國生蠔，d生蠔一直唔見有，第一次問個師傅，話消緊毒，要等十分鐘，過左廿分鐘再問返同一個人，先話等多兩分鐘，我咪企响度等，先見另一個師傅出來開蠔，都只係開幾隻，可能見咁晏應該個個都食過，所以唔開咁多，不過夠食就OK唔好浪費！除左呢d，仲有Sashimi ，有劍魚，油甘魚，甜蝦，質素都好好，熱盤有即煎鵝肝，豆腐，東菇，有串燒沙嗲，燒豬頸肉等等一d中西熱葷，沙律，巴馬火腿，Pancake 粉麵飯，甜品，多選擇而高質素，難怪滿坐，我地order左兩杯熱飲，我果杯係蘆薈蘋果汁，裏面有一支肉桂，好香！加埋蘋果既味更香！好好味！由於無預到出來食飯，大家都無帶相機，只有用手機影，我地係咁用Lomo 影，影得好開心！

食得好飽，食完飯出去行吓！幫助消化，我地去嘉連威老道行吓，去左 g!商場睇吓，見到個好古老既磅，之前睇電視講過，亦都响碼頭見過，估唔到呢度都有，大家都無試，因為吃得太飽，怕爆磅！！！哈哈哈哈！

機密邂逅 The Tourist

今日好凍呀！聽日仲凍d，幾時先凍完？都係留响室內好d，留在家裏要開暖爐先無咁凍！戲院都係一個好暖既地方！有新戲上，let's go！！

套戲講Angelina 既神秘男友皮雅斯，因為騙走黑幫人物邵威的23億黑錢，而分別被黑幫和政府追捕，由於沒有他的照片，只有從他的女友方面監視，而皮雅斯每次都用信件與她通訊，今次皮雅斯約她到威尼斯，在火連上遇見Johnny Depp，兩人一起到酒店休息一晚後，翌日便開始被追殺，最終揭發了女主角的身份..........！

套戲揾兩大巨星合作，但係安排在聖誕黃金檔期後才上？其實套戲浪費左兩大巨星，Angelina 沒有平常那些打打殺殺的戲份，只需扮得靚靚，Johnny depp 久遺的正常模樣，失去攪笑的氣氛，配上特工片的情節，有點唔湯唔水，如果唔係佢兩個做，會更少人睇！

Lomo Lomo

近日裝了Lomo Lomo 這免費 Apps ，愛死它了！愛他拍出那種獨特感覺，那份舊舊地既氣氛，之前都好想買部真的 Lomo相機，但係一諗到要用菲林，要哂相同埋要用相簿，就唔想買！早幾日忽然想起有這個Apps，裝完一試！真係好鐘意！日日都要用佢影吓相！又可將其他相加入 Lomo效果！好好玩，點影都唔使驚好似真 Lomo 要買/用咁多菲林！呢個免費App 有兩款相機選擇，一個是 Diana 另一個是傳統四格鏡頭，而鏡頭有五款輪流轉，亦可影相前，選定用那個鏡頭一次，之後會變返random，想加鏡頭，就要比錢喇！

Party night

公司一年一度的party又嚟啦！今年在會展進行，我個team人被拆開兩枱坐，無咁好玩！可惜！

今年既 dress code係 要 Jungle feel，個個豹紋，虎紋，迷彩，皮草，我就着豹紋衫，同張枱布一樣，不過張枱布係毛毛豹紋，Pro 好多，成晚既氣氛麻麻地，可能好多人唔識，同枱果班又唔熟，而且個個坐定定，唔似舊年食Buffet咁free！一路食一路有抽獎，我抽到個熨斗，後來換左人地果份2036靈芝孢子！食完個鮑片，見侍應擺左個小火盤，上面放左個壺，大家估佢係乜？見下一道菜係魚，諗佢應該係豉油！條魚到既時候，就知佢真係豉油，不過覺得無需要熱住d 豉油，因為分完條魚之後，豉油都凍左！anyway ，d 餸菜都唔錯，只係隻雞唔OK! 到最後歌舞表演先帶返起d氣氛！

愛情戀上癮 Love and other drugs

套戲好多人買飛，可能套戲一直着眼在男女主角的床戲，我個人認為有無床戲都會睇，始終男女主角都是我喜歡的。

故事講男主角英俊而又口甜舌滑，甚為女性歡迎，他由售賣電器轉為賣葯，經常在診所推銷，一次在診所認識患了柏金遜症的女主角，兩人隨即發展情慾關係，漸漸男主角愛上女主角，面對這種不冶之症，女主角不想拖累人，並决定分手，男主角最終决定放棄升職機會，返回她身邊。
最令我感受深刻是戲中講述男主角因葯廠發明"偉哥"而令他生意不絕，在一次醫學會議時，兩人到附近聽了一個關於柏金遜症的分享會，他在小食處遇見一個病者的丈夫，談及他太太此病不同階段的情況，指出病者日漸不能照顧自己，甚至要人協助清理便溺.........他才認真想到將來，這也是一個好大的人生交义點！到底有多少人真的愛一個人，在開始一段感情時可以接受這殘酷現實，甘心等待這一天的來臨？

借東西の小矮人- 亞莉亞蒂 Karigurashi no Arrietty

原本想睇愛情戀上癮，但係買唔到飛，轉睇呢一套都想睇既戲，始終宮崎駿有一定水準！
故事講述患心臟病而要到婆婆家靜養的12歲男孩翔，婆婆的老宜在小金井郊外的一座大屋，一到埗便在這裡遇到傳說中的小矮人，14歲的亞莉亞蒂，充滿好奇心的亞莉亞蒂經常走到人類世界，希望能進行借東西這冒險的工作，她跟爸爸在深夜時候出動,到人類的厨房借來方糖、紙巾等生活必需品，怎料第一次行動便被翔發現﹗本來小矮人被人類發現,便要搬走，但亞莉亞蒂卻與翔建立了感情，可惜她的行踪被家中的傭人發現，最終亞莉亞蒂仍然要離開這地方.........！

宮崎駿的故事向來都有其個人風格，雖然角色做型大同小異，離不開一男一女青少年，一老婆婆，一隻貓，好像每套宮崎駿的動畫都會有，不過每個故事仍很獨特，結局好像會有延續，如果有都會去睇！

五代同糖

網誌日期：2010-12-30 00:28

我地行去食飯既時候，經過街口時，見到呢間甜品店，對上一次見好多人等位，今次見無乜人，原來係時間既分別，我地食飯前無人，因為太早，食完飯去，就人山人海！門外廿幾人等，多數係三至五位，兩人枱只係等兩張，但係佢哋可以順住number比枱！不過都好快，因為裏面都幾迫，個個食完即走，我地等位時已經睇定食乜嘢，樣樣都想食，見門口既廣告都主要介紹佢哋個雞蛋布丁同心太軟，我地决定就叫雞蛋布丁，心太軟，木糠蛋糕，焗士多啤梨疏乎里，每樣一件share 食，點知個布丁賣哂！只有外賣六個裝，我地照order，食兩個，諗住打包四個比佢老婆同仔仔食，但係佢太好味.......我地食哂！布丁好滑，裏面有d黑色點點，應該係雲呢拿條，個心太軟沒有驚喜，裏面的朱古力漿不夠濃，外面又不夠熱，可能多人order，都預先做好吧！木糠蛋糕是第一次食，咬落質地不像蛋糕，一層層的感覺，不會太甜，幾好！疏乎里要等廿分鐘，面層幾好味，裏面的士多啤梨較酸，可能用其他水果會好些！

食完飽到不得了！Eric决定返轉頭買果件外套，佢話返到去未關門就買，行到返去真係未關門！就咁買左！跟住我地行落佐敦撘車，幫助消化！

板獎

網誌日期：2010-12-30 00:11

今日收工同Eric 去食飯，我地去尖沙咀行左一陣，佢一心去買外套，但係試上身唔多啱心水，都係放棄，跟住唔知食乜好，行行吓行左去赫德道，入到去條街好似無乜好食，見到之前去過個間板獎火煱，佢本來話食日本野，依家改去打邊爐。

坐低睇menu，個店員問我地食唔食sashimi，我先諗起佢哋有日本野食，店員推介原條池魚，話係新鮮空運到港，就叫左條試吓，果然係好鮮味，用埋手磨鮮Wasabi，Good!今次湯底叫左鰹魚湯，比較清淡，湯內只有海帶同蘿蔔，聞到味道似麵豉湯，入口清清地，我地叫既野食唔多，叫左未食過既鹿舌同花膠仔，另外又叫左和牛片，佢地切到一片片好似心型咁！仲有枝竹同菜，整渾醬既時候，我地兩個都係要勁多椒絲同蒜！鹿舌既味道好似雞腎，花膠仔滑嘟嘟，幾得意！食吓食吓都好飽！呢個時候，大家都想食甜品......店員話有水果送，我地照食！但仍無損我去下一站既興緻..........let's go !!!!