今朝一早起身，喺便利店買啲早餐上車食，然後揸車去今次旅程嘅重點目的地，大阪萬博 😍😍好友已經睇晒攻略，知道泊架車喺萬博嘅停車場係要行好遠，或者要再搭佢哋嘅巴士過去西閘嗰邊，所以我哋揸架車喺附近南港北泊低，再去宇宙廣場站搭火車一個站入去夢洲！去到宇宙廣場站附近，雖然有幾個停車場，但係都full晒，或者係好貴 🥹 喺附近都搵唔到其他車位，於是我哋決定搭多一個站，揸架車去咗貿易中心站，呢度相對就多車位同埋合理價錢！泊好架車行過去貿易中心站都唔係太近，大概要行5分鐘左右，我哋搭南港港城線，去到宇宙廣場站轉車，搭中央線去夢洲站，其實呢個位置喺USJ附近，不過唔知以前係乜嘢嚟，亦都未嚟過，個車站係好新淨，而且非常之大，因為人流實在非常之多，出咗車站之後就係萬博嘅東閘，呢度人山人海，所以佢要將啲人分流，就係根據返你張飛嘅入場時間，如果你早左入嚟，真係可能要等，最慘呢度係烈日當空，要暴曬住等，好彩我哋冇特別早到，所以可以直接去閘口安檢，當然安檢都係非常多人，而且非常之慢，我哋排隊等安檢嘅時候都係暴曬住🥵好彩今日都唔算好熱，我哋排咗差唔多半個鐘頭先至入到去😅
一個月前好友買咗飛之後，已經每日撳入去萬博嘅website，諗住攞展館嘅入場券，即使佢每日都睇幾次，但係都冇辦法攞到入場券，即使入場之前一刻都係攞唔到🫠🫠 當然有啲展館係可以排隊入去，但係起碼要排個幾兩個鐘😔😔 所以基本上係冇一個展館可以入到去，我哋就當體驗一下，周圍參觀一下展館嘅外圍，一入到去就見到吉祥物，個個圍住影，我地影左一輪個巨型木圈，再去附近展館望吓，見好多要預約或排長龍，似乎入館機會唔大，見到有間大丸松阪屋商店，即刻入去行吓，原本諗住臨走先去shopping ，不過驚D野賣晒或者夜D好多人，所以行左先，入店都要排隊，不過都好快，店內非常多人好迫😅 睇啱兩款手信都賣晒！買左少少紀念品和手信，跟住行埋隔籬嗰間手信店，呢間雖然都好多人，但係啲嘢冇咁靚，所以冇買到嘢
出嚟見到隔離有間Lawson，我哋就買少少嘢食醫吓肚，坐喺出面嘅石凳度食吓嘢，跟住我哋就行去其他展館外面影吓相，有好多展館嘅外圍都好靚，我哋未過嚟日本之前，睇新聞講呢度好多蚊，不過今日見到就冇乜，係坐近個水池邊就會有啲，然後我哋行上去個巨型木圈度行咗一段路，上到嚟就好涼爽，不過個圈圈太大了，所以我哋只係行咗一段，落返去行咗一陣，大家都有D倦意，因為前後都行咗七個鐘😅 我哋10點入嚟，五點幾就走喇！
去返夢洲站，搭返火車去停車場攞車，因為好友個老婆唔係好舒服，所以車咗佢返去民宿休息先，跟住我哋三個就過咗去通天閣，雖然呢度都嚟過幾次，但係冇上過去通天閣，好友要上去搵Chiikawa 金幣，所以我哋就上去睇吓，通天閣呢度而家有個瀡滑梯，應該係新加咗幾年，上次嚟大阪都有諗過過嚟呢度，但係當時唔夠時間冇過到嚟，呢度分咗兩條隊入場，一條係玩瀡滑梯另一條係純粹參觀，我哋要等lift上去，因為個lift都幾慢，不過今日都唔係好多人，上到去都係有少少似東京鐵塔咁，比較舊亦都唔係好多嘢睇，地方比較細，好有搵咗兩部金幣機都冇晒Chiikawa ，只有角落生物🤭
我哋揸返車返去民宿，接埋好友一齊出去食飯，去返心齋橋嗰邊嘅藥妝店，我哋喺藥妝店都搞咗成個鐘，因為要幫人買嘢自己又要買嘢，四個人加埋買咗成五萬円，就可以攞到最高嘅discount，跟住我哋就去食晚飯，其實已經差唔多11點，我哋去食烏冬，間店叫做麵匠の心つくし つるとんたん，雖然已經好夜，但係都排晒隊，我哋足足排咗成個鐘，真係非常肚餓，我哋一人叫咗碗烏冬，另外加咗沙律同埋鰻魚手卷，每樣嘢都好好食，唔怪得咁多人排隊，不過都唔係咁慣臨瞓仲食嘢，不過真係好肚餓，因為只係晏晝喺万博嗰度食咗個飯團到而家！🥹🥹食完嘢返去民宿，排隊沖完涼瞓覺都已經差唔多兩點🥺
沒有留言:
發佈留言