食完早餐見未夠鐘check out，諗住上房瞓一陣，好友家姐就去浸溫泉，好友揸車好攰，想休息多一陣，點知上到房，所有床舖已經執起，費事再摷佢啲床單出嚟瞓，所以都係挨住喺個榻榻米坐下休息，等到差唔多十點就check out ，依家先比房租！
我地今日想搭船，但隻船呢兩日都冇開船，我地揸左45分鐘車去遊覽船碼頭，都真係冇船，原本想撘呢隻船入去天窗洞睇吓，冇船唯有行去天窗洞上面望吓，見𥚃面都好大浪，我地行上山望吓，放吓飛機，再去海邊龜岩睇吓，跟住就走，呢邊近海，所以都好凍！
跟住去 Ao Terrace 坐纜車，點知今日有冇開🤦🏻♀️唔通真係黑色星期五，難得咁好天，冇船又冇車😅唯有去第二個點，架車行到咁上下見到有個休息站，其實佢係一間店舖，不過地方好大有好多停車位，主要係賣士多啤梨產物，我哋入去買吓嘢又食雪糕！仲買咗個番薯🍠上車一齊食！
跟住揸咗個幾鐘頭車，去到沼津市，去酒店check-in先，跟住出去搵嘢食，行咗去街，呢條商店街好短，而且頗舊，我哋去到商店街嗰陣都未夠六點，但係幾乎所有舖都已關門，冇嘢睇就唯有搵食，搵咗一間叫做滿月嘅拉麵店，跟住地圖過去搵，去到門口見佢鎖咗門，呢度所有嘅店舖都關咗門，明明門口有個牌寫住逢星期三同日放假，今日亦都冇標示話唔開，唔通真係黑色星期五咁邪？當我哋諗住放棄嘅時候，有個男人喺最入嘅位置行出嚟，所以就行過去裝吓見到原來呢間拉麵店個位置係最入嗰間先至啱，入口嗰間同名又冇開嘅，可能係舊舖，總之成個迷你商場入面得呢一間拉麵店有開，見佢有開即刻入去食嘢，入面好細，兩排吧枱，一邊四個一邊五個，仲有樓上，我哋一陣叫咗碗拉麵，又叫咗一啲小食，D小食又幾好食，有炒豬耳、豬肉卷、炒雞腎、餃子，拉麵就普普通通，小食反而做得幾好，呢間小店只有兩公婆經營，不過見佢都幾好生意，放工時間都一路有客入嚟，我哋食完都走！跟住喺附近火車站見到有超市，我地入去行吓，行過去嘅時候竟然落雨，不過都係過雲雨，我哋行完街返酒店嗰陣已經停咗雨，都買唔到啲乜嘢就返酒店休息了！
Cocochee hotel
酒店位於JR 沼津站旁邊，我哋揸車，酒店亦都有自己嘅停車場俾我哋泊車，酒店嘅大堂好大，而且都幾新淨，職員亦都好好禮貌，接待處可以自取護膚品及浸浴包，不過浸浴包寫明只限取一包，攞第二包要俾錢，不過我哋攞兩包職員都冇特別問我哋，我住嗰間房都算有啲空間，因為床同枱之間個位置都幾闊，而好友佢哋間房就有一半榻榻米地氈，所以入房嘅時候就要除鞋，我嗰間就普通酒店房咁，成間房都係地氈。由酒店行去商店街嗰邊係要經過一條行人隧道穿過天橋底過去，商店街嗰邊就好熱鬧，火車站呢邊都有少少商店，但係因為我哋夜咗，所以冇特別行，第二朝又一早走，所以冇再喺附近行街，酒店好近火車站，如果自己搭車嚟都算方便！窗外對住火車站，望到車站有個小商場，不過一早就會聽到樓下交通燈嘅響聲🤣
沒有留言:
發佈留言