飯局作客 - 除夕倒數

而家每年嘅12月31號，都係同同一班朋友去倒數，呢兩年都係去好友屋企，因為要食飯同埋等夠鐘倒數都要好幾個鐘，出街食就有幾個鐘頭唔知去邊，始終喺屋企就可以傾吓偈，睇吓電視就好快過！

今晚又打邊爐，好友一早買咗海鮮同牛肉，我就幫手去九龍城買魚蛋同雲吞，再去好友屋企準備，不過佢哋都洗晒嘢，我哋就坐下傾吓偈等齊人先食，好友在日本買左支 Suntory 嘅 XO brandy ，味道幾好，不過太嗆喉，所以大家只飲左1/3 支😅 食完飯又傾吓偈，睇吓片，今次倒數就set 好咗手機，拍晒片同影相， 2024話咁快就結束咗啦，希望我2025年一切都會好！🫰🏻

 

萬發海鮮菜館

又到一年一度聖誕交換禮物嘅飯局，今日甩底王又甩底，又話腰痛，今次又去深水埗食，呢間飯店有幾個舖位，深水埗區好多呢類嘅小菜館都係咁樣嘅形式，呢間都好多人食，我哋都叫咗好多嘢食，開頭人未齊嘅時候，已經叫咗個滷水拼盤，原來都好大碟，跟住又叫咗蟶子王，每隻要$78 ，不過佢蒸得老咗，肉質有啲硬，叫咗爽滑魚皮、黑椒薯仔牛肉粒、蠔餅、椒鹽鮮魷、半隻霸王雞、半隻燒雞、薑蔥魚卜，食物整得都好夠火候，而且抵食夾大件👍🏻👍🏻

食完飯又係交換禮物嘅時候，每年都總有人搞事，買埋啲唔等使嘅嘢，今年有人買罐頭鮑魚，又有人買成箱零食，我就抽到個小型放濕機，之前抽到個香薰機，我好似成日都係抽到呢類型嘅嘢🤣🤣🤣

 

瑞幸咖啡（香港）

近年都多咗好多大陸嘅食店嚟香港開店，我諗最令人期待嘅係呢間咖啡店，今日佢五間分店同日開張，我見佢首杯價$15.9 ，又買杯試吓！又要裝App！買左杯生椰拿鐵，之前在深圳飲過都覺得幾好飲，不過覺得香港呢杯，個味冇咁好，不過都可接受👌🏻

 

The Coffee Journal

今日約咗好友去銅鑼灣飲咖啡，順便攞埋手信俾佢，原本想去新開嗰間四代目菊川食鰻魚飯，但係佢落咗場，唯有自己去咗city’super食咗個 lunch，再約好友去飲咖啡，行咗去耀華街呢間 coffee shop ，記憶中佢前身都係咖啡店，我哋亦都嚟過一次，印象中個裝修係灰色磚牆，同店員傾開，佢都話之前係灰色磚牆，店嘅座位唔多，亦都有啲室外嘅位置，餐牌嘅咖啡選擇亦都好多，有啲自選咖啡豆，再加唔同嘅整法，價錢就略為貴啲，亦都有一啲聖誕期間嘅款式，好友揀咗 Yuzu Ginger coffee ，我就揀咗 Ginger Latte，又估唔到薑🫚同咖啡☕️嘅味都幾夾，我哋都覺得好飲，下次可以嚟試吓其他咖啡👍🏻

 

五輪洞

好耐冇去青衣城，今日過去有啲嘢做，順便去食碗拉麵，以前經常同好友相約喺青衣城等，然後一齊入去迪士尼，嗰陣時我哋成日去麵屋武藏食拉麵，近呢幾年已經冇同好友入去，所以冇去青衣城，今次特登去麵屋武藏食拉麵，發覺已經轉咗名，叫做五輪洞，以為係第二間拉麵店，入到去發現原來都係麵屋武藏嘅其中一間拉麵店，之前佢有一間神山，而家又有呢間五輪洞，反而用佢麵屋武藏個名嘅拉麵店又唔多覺有，叫咗碗拉麵同餃子，覺得冇以前咁好食，可能而家拉麵店都有好多選擇，食得多就覺得冇乜特別😅，食完拉麵都喺附近行咗個圈，好多舖頭都轉左，希望再有機會同好友一齊入去迪士尼啦！

 

2024年12月東京伊豆自駕遊 Day 7 - 東京站

今朝早D起身，因為今日航班改早咗兩個鐘，香港航空早幾日已經通知咗改時間，雖然話可以比一次免費改期，但係唔可以改今日夜D嘅航班，唯有早D去機場🤦🏻‍♀️ check out個 咗直接拎埋行李去東京站，先去食早餐！去咗東京站八重洲嗰邊嗰間椿屋珈琲，呢間都嚟過一次，今朝冇乜人，只有兩枱客，叫了多士配沙律和咖啡👍🏻

跟住再去大丸買Fancl 和花茶，再去火車站買手信，買左一間叫做God Bless butter 嘅蛋卷，又買左卡樂B薯條，跟住去火車站搵個位pack 行李，再搭NEX 去機場！

去到機場都頗多人排隊，既完行李都冇乜時間，原本想去食壽司，但係要等位，所以改咗去食一風堂，食完就搭飛機返香港了👋🏻

 

2024年12月東京伊豆自駕遊 Day 6 - 木更津、東京

今朝起身清埋雪櫃啲D牛奶同芝士，就去check out，只需要將鎖匙擺返喺盒仔就得，呢個時候大家發覺條鎖匙唔知去咗邊，大家都話自己冇攞，我印象中尋晚係好友嘅家姐開門，但我又唔係好肯定，佢都話佢冇攞過嚟鎖匙，我話唔緊要，大家不如摸一摸自己件褸個袋，睇吓有冇條鎖匙，結果真係在好友的家姐身上🤣🤣，總之搵到就得喇！擺返條鎖匙入盒仔，鎖返好，掉埋D垃圾落垃圾箱，就可以走得！

我哋去墨田區，諗住去野口鮮魚店食海鮮丼，去到見有幾個人排緊隊，但係門口有個牌用日文寫住逢星期三休息，但係下面寫住兩個日期，一個係今日，應該嘅意思係除咗逢星期三休息，呢兩個日子都唔開😅排隊嘅人當中有日本人，於是我嘗試用英文問吓佢哋今日係咪唔開？但係我都未問，佢已經表示 no English 😅 唯有指下個牌俾佢睇，佢先至睇到今日唔開，佢同自己朋友講日文，應該個意思係話俾佢哋聽今日唔開，然後同我哋講thank you ，跟住就走，然後成條隊都走晒🥹咁我哋都走！

既然食唔到就去搵其他嘢食，因為今日好友要去機場，所以時間唔係好多，於是我哋直接揸車去木根津，大概揸咗一個鐘頭車，在一條跨海大橋嘅中間，有一個好大嘅休息站，零零舍舍喺海嘅中央有座建築物，海ほたる PA，除咗有一個幾層嘅停車場，仲有成個商場，有嘢食有嘢買，仲有Starbucks 添😄

我哋逗留咗半個鐘左右，影吓相睇吓嘢，我就買咗杯Starbucks 飲吓，跟住繼續揸車去outlet，呢程車大概半個鐘就去到，去到outlet第一時間食飯，呢度個food court 都幾大，我哋揀咗食十勝豚丼，大家都想食呢個，所以每人一碗，食完飯就開始行街，行行吓失散咗，我就去睇吓幾點鐘有車出返市區，好友就WhatsApp同我講，返香港先再見，所以各自各行街，我行到咁上下就去等車返市區，佢有車去東京站、新宿、渋谷、池袋等等原本想去新宿，但係冇咁快有車，最後揀咗最快有車嘅東京！15:30 有車，車程約50分鐘！車費¥1,400

最後要一個鐘多D先去到東京八重洲巴士總站，原來車站出嚟係之前去過果間根室花まる壽司店度，嚟到東京站，就去丸之內果邊，搵今期聖誕 Mario 主題燈飾 Marunouchi Bright Holiday，先去大丸間LV 幫好友買LV 銀包，跟住去搵Mario 燈飾，佢分佈在附近幾個商場內，呢度重有條街做緊聖誕市集，好熱閙，我分別影左 Mario、Yoshi、Toad，因為有點攰，所以唔影其他了！

跟住搭車去新宿，原本想去高島屋買花茶，原來間店冇左，跟住去食dinner ，在高島屋的赤坂富貴貫食鰻魚飯，跟住又去新宿站南口聽busking，再去三丁目果邊行吓，就返酒店了！

酒店住後感：
Hotel Kazusaya
今次揀呢間酒店嘅原因，係上次住喺附近嗰間Monday Apartment覺得個位置都唔錯，而呢間酒店就喺Monday附近，所以有興趣試吓住，因為佢嘅位置喺兩個地鐵站嘅中間，一個係JR 新日本橋站，如果要搭JR就去呢個站，或者行過少少去神田站，另一邊係Metro 嘅小傳馬町站，如果由大街行過對面就係Metro 三越前站，呢個站相對比較熱鬧，因為有三座Coreo 室町商場，有三越百貨，同埋一間文華酒店，中間仲有個神社，附近仲有幾間便利店，去銀座、築地搭Metro 好方便，搭JR 去東京站亦只係一個站👍🏻
感覺上呢間酒店主要係日本人同外國人，完全見唔到香港人同講國語嘅人，所以覺得D職員都比較有禮貌，我早上已經放低咗行李，夜晚check in 嘅時候行李已經放咗上我間房👍🏻 酒店都幾新淨，佢係2020年翻新過，酒店亦都有浴場，房間唔算大，我入房放低嘢就去浴場浸浴，女湯呢邊有五個沖涼位，浴池只有一個，大概可以坐到10幾人，我去浸浴嘅時候只有一兩個人，浸完我又去大堂買嘢飲，見到有酒店模型，介紹酒店有130年歷史，所以知道佢2020年翻新過，整體嘅感覺都唔錯，而且價錢唔貴，酒店喺內街有少少靜，夜晚就唔會驚嘈親！