貓抓烤肉、Gaga、有米粥料

又又又北上，同上次同一班朋友，今次少左一個人，四個人上去，先去卓悅中心食午餐，今次食烤肉，呢間烤肉店冇乜人，坐位幾寬敞，我哋四個人坐嗰張枱可以坐到六個人，喺美團買咗個套餐，有一份牛肉係砌到好似生日蛋糕咁，上面插咗支蠟燭，我哋貪得意叫你玩吓，肉嘅份量雖然唔算好多，質素都係一般，不過加埋其他食物又有飯咁，都食到好飽，食完飯喺商場度行咗一陣，跟住就搭車過去Coco Park !

諗住坐低飲杯嘢，不過今日好熱，見到好多間都係戶外位多，最後去咗 Gaga，貪佢室內有位！我叫咗杯椰奶咖啡，跟住就去咗廁所，出返嚟已經見到佢哋叫咗薯條同蛋糕😅 我就真係食唔落，男士們仲可以食得落，又或者頭先佢哋上一餐唔夠飽，我哋志在坐低傾吓偈，食吓傾吓都坐咗個幾鐘🤣

喺商場行多一陣，買吓零食，就搭車過去華強北，我哋唔係去買嘢，而係去附近食嘢，好友之前睇咗呢間叫做有米粥料，係粥底火鍋，同我哋平時喺香港食嗰啲唔同，佢係個湯底本身係粥，不過係好稀嘅粥，米嘅份量好少，食物嘅選擇都幾多，去自助形式自己出去攞食物，我哋買嘅套餐佢係定咗幾多碟嘢食，唔同份量同顏色嘅碟去計算，食多咗就照計，有啲似迴轉壽司咁，用你嘅碟嚟計數，我哋叫咗幾碟牛肉，雖然啲牛肉切得好薄，不過啲牛味幾重，跟住攞咗D打邊爐嘅嘢食，呢度係一人一鍋，食物就share一齊夾！整體嚟講呢度嘅氣氛都好熱鬧，食物嘅質素都唔錯，價錢亦都好實惠！

食飽飽就一齊搭的士去返福田口岸，搭火車返香港！