又又又北上，同上次同一班朋友，今次少左一個人，四個人上去，先去卓悅中心食午餐，今次食烤肉，呢間烤肉店冇乜人，坐位幾寬敞，我哋四個人坐嗰張枱可以坐到六個人，喺美團買咗個套餐，有一份牛肉係砌到好似生日蛋糕咁，上面插咗支蠟燭，我哋貪得意叫你玩吓，肉嘅份量雖然唔算好多，質素都係一般，不過加埋其他食物又有飯咁，都食到好飽，食完飯喺商場度行咗一陣，跟住就搭車過去Coco Park !
喺商場行多一陣，買吓零食，就搭車過去華強北，我哋唔係去買嘢，而係去附近食嘢，好友之前睇咗呢間叫做有米粥料，係粥底火鍋，同我哋平時喺香港食嗰啲唔同，佢係個湯底本身係粥，不過係好稀嘅粥，米嘅份量好少，食物嘅選擇都幾多，去自助形式自己出去攞食物，我哋買嘅套餐佢係定咗幾多碟嘢食，唔同份量同顏色嘅碟去計算，食多咗就照計，有啲似迴轉壽司咁，用你嘅碟嚟計數，我哋叫咗幾碟牛肉，雖然啲牛肉切得好薄，不過啲牛味幾重，跟住攞咗D打邊爐嘅嘢食，呢度係一人一鍋，食物就share一齊夾！整體嚟講呢度嘅氣氛都好熱鬧，食物嘅質素都唔錯，價錢亦都好實惠！
食飽飽就一齊搭的士去返福田口岸，搭火車返香港！
今晚約咗一班好友食飯，因為大家都差不多有一年冇見，因為每年聖誕都會聚餐，有時都會約出嚟食飯，不過其中一個好友因為在六月嘅時候確診咗鼻咽癌，所以大家冇出嚟食飯，不過佢好叻仔，而家已經可以出嚟同我哋見面，而且精神都唔錯，當然係瘦咗好多，同埋好多嘢唔食得，佢幸運地好早發現，只需做電療，現在係休養期間，預計下個月都可以返工，不過我哋都叫佢唔好心急，最緊要養好個身體，今次大家志在見吓面，同埋佢睇我哋食嘢🤣🤣 其實佢話而家食嘢都冇味，仲要飲營養奶，希望佢能夠早日康復，健健康康！
今次去呢間小菜館應該好好生意，因為佢分咗幾個舖位，而且每個舖位都座無虛席，唯一缺點就係太嘈，啱啱坐低嘅時候係最多客嘅時候，所以要好大聲講嘢先聽到，食到咁上下啲人開始走，先至冇咁嘈，我哋都叫咗好幾款小菜，不過好多唔記得影相😅 整體食物好夠鑊氣，我哋都食過附近幾間小菜館，覺得呢間係好食啲，下次可能都係會再嚟呢間食！
今日約咗人飲下午茶，因為要三點後先至會合，時間尚早，就去中環食個lunch先，試吓去呢間開咗唔係好耐嘅食店，據講要提早預約同埋排隊要排好耐，因為我得一個人就去碰吓運氣，去到見到門口寫住Walkin嘅籌已經派晒，我都諗住走，跟住行過去另一邊嘅時候，透過玻璃牆望見裏面有個單丁位，於是試吓入去問吓有冇機會有位，點知真係有，呢度其實得兩個爐，大概有廿幾個位，先喺門口嘅售賣機落單，每人最少要點一個餐，其實呢度只有一款套餐，其餘嘅都係飲品同埋追加食物，我叫咗一個套餐同埋一杯果汁，十幾個座位圍住個火爐，有一個師傅在烤漢堡牛肉，然後逐件放喺人客面前嘅食物架，每個座位都有好多配料擺咗喺度，我每樣都攞少少試吓，我覺得配柚子Sauce係最好食，呢個漢堡牛肉比較起三和敍質素差不多，不過呢度嘅漢堡牛肉有少少洋蔥喺裏面，比較有D咬口，不過如果要排好耐我就唔會排，情願去返三和敍，食物質素差不多，價錢亦都係一樣，同樣係白飯任裝，不過呢度嘅飯係好食D👍🏻，聽講佢就嚟會喺尖沙咀開分店，今時今日在香港做飲食都唔容易，可以做到再開分店，真係好多人食，不過我覺得開兩間就夠，太多又變得唔矜貴🤭
今朝一早醒左，早D出門，行去小伝馬町站，撘Metro 日比谷線直接去築地，由本願寺嗰邊行過去場外市場，行咗一個圈，想去虎杖食海膽飯，發現佢開咗一間分店，但係呢間分店係完全冇客，因為佢個格局同其餘嘅唔同，呢度冇壽司吧枱，即係話睇唔到師傅嘅製作過程，我哋覺得冇乜所謂，唔使排隊等位食同...
