飯局作客 - 除夕倒數

又到除夕倒數飯局，今次去好友新居食，之前已經去過 House warming ，所以識路，好友已經買左野食，等人齊先煮，佢地早一日已煲左羅宋湯，話煲完要浸多兩日先好飲，佢地煲湯好足料，好好味！而食物方面，佢地買左巴馬火腿、蜜瓜🍈、牡丹蝦🍤、壽司🍣、刺身、三文魚、生菜🥗、自己煎牛扒🥩、雞扒同炸薯條🍿！好豐富！好食！我地慢慢食，食完就吹水等夠鐘！好友又焗左蘋果批🥧，好好食，食到非常飽！😄😄 到差唔多12點，就對住電視倒數睇煙花🎆 開心🥳

 

摩登堂

今日無無聊聊，去咗呢間餐廳試吓，佢主要食泰式甜品，都有正餐，我叫左海南雞飯，同埋叫左個泰式街頭烤麵包試吓，同埋咖啡！海南雞飯正正常常，都ok ，麵包有三個，配三種醬，有朱古力、斑蘭、榴連！表面灑左D糖霜，味道唔錯，最緊要榴連好味🤣🤣 咖啡就麻麻地😅

 

星願奇緣 Wish

Kingdom of Rosas 由國王  King Magnifico 所建立，每年國王會舉行一次實踐願望的儀式，讓當選的市民實現一個願望。 少女Asha 希望等候多年的爺爺能夠實現夢想，所以去應徵國王嘅助手，佢喺皇宮面試嘅時候，佢見到大家嘅夢想都藏喺一個球體入面，在皇宮裏面飄浮，佢見到自己爺爺嘅願望，但係同時佢都發現國王身上感知到大家都未能察覺的黑暗，一晚她在野外向天上的星星許願。有一顆星星回應了Asha 、這顆星星擁有讓願望成真的神奇力量，Asha 和這顆星星合作，要破壞國王嘅黑暗勢力，同時幫助國民能夠願望成真。

都係離唔開奸角同埋正義之士，今次呢個星星嘅角色都幾得意，歌曲唔算特別好聽，不過不失！呢套戲買戲飛嘅時候送咗張卡，純粹一張透明嘅卡，用嚟做過紀念😅

 

新合發飯店

今日雖然聖誕節，但係大家都冇乜節目，約埋好友一齊食個晚飯，去咗大圍呢間小菜館，因為大家都想食羊腩煲，店入面嘅座位都唔算好多，分咗兩邊，一邊有樓上，我哋就坐樓上嗰邊，叫咗幾個小菜，當中最好食嘅係薯仔牛柳粒，個薯仔外脆內軟，仲有D甜甜地，應該佢喺撲粉之前落咗啲糖，所以甜甜地，外皮又脆脆地，幾好食！另外叫咗椒鹽鮮魷同埋腰果炸豆腐，羊腩煲就另外加咗豬膶同埋牛肉嚟淥，整體呢度啲食物質素都唔錯，價錢合理，抵食！

今次同好友一家人一齊嚟食，主要都係想傾吓原先我哋plan咗七月去旅行，但係經過今年七月同朋友去大阪嘅經驗，七月天氣實在太熱，所以我拒絕咗，佢哋話要夾小朋友放假，聖誕又唔得，而復活節我又plan咗同朋友去九州，可能要等到再下一年嘅復活節先得喇😅

 

John Choy cafe

今日過去土瓜灣，試吓呢間咖啡店，離遠見到門口好多人，原來D人係喺度等車同埋食煙🚬 🤦🏻‍♀️，餐廳入面就唔多人，餐廳入面有幾張枱，店外面都有幾個座位，呢度除咗餐廳嗰部份之外，仲有賣咖啡豆，咖啡嘅選擇亦都非常之多，我叫左個餐蛋治同奶泡咖啡，唔知幾多年冇食過午餐肉了！佢個午餐肉煎過，香口D，咖啡味道不錯，下次可以試吓其他！另外叫左cheese cake ，呢個就唔太啱我口味！

 

水行俠與失落王國 Aquaman and the Lost Kingdom

水行俠成為了國王之後，仍然喜歡留喺陸地，同爸爸老婆同個仔一齊生活，當然要返去海底處理國事，不過佢感覺到國王冇實際嘅權力，好多嘢佢想做都做唔到，佢好想俾我哋嘅人類知道佢哋嘅存在，但係都被國會反對，生活都幾苦悶！

另一方面，Black Manta 黑蝠魟自從水行俠殺死左佢爸爸之後，佢一直想報復，佢發現到喺北極海底有一個失落王國，當中有支黑色三叉戟，當他得到手後，便得到了強大的力量，他決定去搵水行俠報仇，而水行俠需要借助他的弟弟幫助，才能對抗黑勢力⋯⋯！

今集冇上一集咁好睇，女主角好似刻意被減低戲份，而且好多宣傳都唔見佢有出現，可能佢同Johnny Depp離婚單嘢已經搞到佢神憎鬼厭！劇情方面仍然係有少少搞笑嘅路線，不過佢兩兄弟嘅合作，就好似雷神同佢細佬Loki 嘅翻版 🤔

 

Chutney

由大館出返嚟，就去今晚book 左嘅呢間印度餐廳，原來就在上次食果間黎巴嫩菜果間餐廳樓上，佢地兩間應該係同一間公司，因為訂完枱，就收到黎巴嫩餐廳email ，介紹返自己餐廳！

我地上到去，好快攞到位，我地坐窗邊，呢度睇落唔係好大，今晚都幾full ，大廳望到有幾個銀色爐，應該用嚟焗印度烤包Naan ，見到師傅整Naan 之餘，仲有D一串串嘅肉類！餐牌食物選擇唔算好多，因為唔識點樣叫呢度啲嘢食，所以上網做咗功課，揀咗幾款有興趣嘅食物，我哋叫咗 Keema Pav 係咖喱免治羊肉配牛油麵包，呢個幾好食，小小辣羊肉唔會羶，個牛油麵包有少少似 Pizza Hut 嗰個蒜蓉包咁，好食👍🏻👍🏻 ，Achari beef short rib 慢煮牛肋條，呢個好淋，好似炆牛腩咁啖啖肉👍🏻，lamb Shank Nalli Nihari 慢煮羊膝咖喱 ，呢個冇免治羊肉咁好味！😄 Haryali Fish Tkka 烤魚盲鰽紅菜頭酸辣醬薄荷酸辣醬，呢個估唔到咁好食👍🏻👍🏻魚肉外面黑麻麻，但𥚃面 juicy 又多肉 👍🏻👍🏻 我地諗住叫一份Naan ，但店員話四個人叫一份唔夠食，所以我哋叫左一個原味加一個蒜蓉，原來個Naan 都幾大塊，結果食唔晒D野🤦🏻‍♀️ 如果我地叫少一款肉就食得晒！因為個Naan 都好食，不過食完半個Naan 好似食左成個pizza 咁飽😅😅  整體嚟講食物嘅質素唔錯，當然佢嘅價錢亦都唔係平，不過店員嘅服務態度就麻麻哋，未至於差，不過全程有D黑面 😅

食完飯我哋揸咗架車過去西九龍，去影吓聖誕燈飾，不過我哋去到太夜，佢原本有啲攤檔都已經收晒工，只有聖誕裝飾可以影相，而且影咗半個鐘就close ，你近呢幾日都未必有時間再去影，不過都影咗好多相，今日玩咗成日都好開心！

 

Dragonfly

同好友食完lunch 就去Landmark 影吓相，呢度嘅佈置都好靚，小朋友仲可以入去玩瀡滑梯，應該要消費先可以玩！

我哋影咗一輪相就行返上去大館，因為要去呢間酒吧試吓，去到酒吧嘅時候時間尚早，只有兩枱客，但其中一枱係一大班人，所以都有D嘈，上一次嚟大館嘅時候，已經見到呢間酒吧，因為當時係日頭佢未開，所以冇試到，今次約左人去中環，特登過嚟試吓！原本我地想晏少少，但係驚晏D冇位，所以都係入去坐耐D !

酒吧嘅裝飾，真係店如其名，四周圍都係蜻蜓做裝飾，門口接待處個櫃已經佈滿立體蜻蜓，連聖誕樹🎄上面嘅燈飾都係蜻蜓😅 一入去有一條小巷，有D比較矮嘅枱凳，我諗係用嚟等位用，而酒吧嗰邊，地方就唔係好大，大概有10張左右高枱櫈，同9張圍住吧枱嘅櫈，吧枱後面有個女性人像，好似蜻蜓女神咁😂呢度個天花全部係有蜻蜓圖案嘅燈，全部係同一隻藍色，好靚 😍😍😍😍 

店內音樂都頗強勁，可能空間細，餐牌都好簡單，有D佢地特色飲品就有圖樣，好似水彩畫咁畫出嚟，而classic 的cocktail 就冇相，我地叫完野飲就狂影相🤣🤣 一開始影果陣，另外兩枱客都走了，變咗我哋兩個包場 👭🏻☺️☺️ 就可以影好多冇人嘅相喇😏 飲品跟左一小碗爆谷，味道幾清淡唔太咸👍🏻 而飲品嘅賣相唔算好靚！味道亦一般，我諗好多人真係嚟打卡🤣🤣

走果陣見店外坐位都係佢地嘅，仲有個小舞台，我諗假期可能有live band ，而店門口對面，原來仲有間房，都幾大，有兩張大梳化，好啱一大班人，我地都有入去影吓相！

 

Oolaa

今晚約咗上次去東京嘅團友喺中環食飯，晏晝我哋兩個👭🏻出嚟食啲嘢先，順便喺中環行吓，先去金鐘站打卡Olaf 先，迪士尼為咗慶祝Frozen 園區開幕，喺金鐘站貼咗Olaf 個樣喺度，應該貼咗都有一個月，今日經過就影返張相先！⛄️

去到中環，求其去咗呢間餐廳度食個 lunch，大家嘅目的都係想飲咖啡，叫咗一個pan dryed Sea Bass 同埋Ribeye steak ，跟餐有南瓜素湯，有冇兩塊麵包，主菜個魚同埋牛扒都做得唔錯幾好食，咖啡我哋就叫咗兩杯flat white，咖啡唔算特別出色😅

 

Milu Thai Restaurant

好友生日，去尖沙咀食泰國菜，呢間店前身係西餐廳，我食過兩次，唔知佢幾時轉咗手做呢間泰國菜，上到嚟先發覺原來佢有室外嘅座位，我哋因為有一兩個食煙，所以左室外，而且今日天氣都唔太凍，所以室外都幾舒服，我哋叫咗個泰式拼盤、冬陰功湯、火山排骨、燒雞、魷魚、菜等等，個小雞都幾好，冬陰功都唔錯，不過個排骨就比較淡味D，佢應該只係灼熟咗嘅排骨，點醬汁去食，整體嚟講都算唔錯，價錢亦都唔貴！最後切埋個蛋糕先至走🎂🤣，本來兩個朋友生日，可以分開兩餐食，不過有一個實在太忙，成個月得一日得閒，所以就唯有一齊食😅