澳門一日遊

和好友哥兒們已經幾年冇去過澳門，今次順道慶祝生日😏

我哋分開兩批人搭車搭船，有兩個撘船，三個搭車，我地在上葡京集合，因為book咗食自助山lunch buffet ，都係第一次嚟上葡京，酒店好新淨，而且都幾靚，可惜天陰落雨，我哋三個先去攞位，坐低等佢哋，今日都幾多人，呢間餐廳地方非常之大，我諗入座人數大概用咗三份之二地方，另外仲有D室外位因為落雨冇開！

呢度食物嘅選擇都非常之多，當然海鮮類就唔太多嘅，因為lunch嘅價錢比較平，晚餐貴D，因為海鮮嘅選擇都多，午餐嘅海鮮就只有哈、翡翠螺、青口之類，日式刺身就只有三款，佢有生蠔供應，但係另外俾錢，熱食就有好多選擇，基本嘅燒牛肉，仲有啲台式食品，例如臭豆腐，又有印度、意大利、中式食品等等，甜品款式亦非常多！飲品方面都有啲免費果汁、港式奶茶咖啡，當然唔少得一啲基本咖啡奶茶之類，佢呢度有啤酒同埋紅白酒，都係要另外俾錢！

我哋食到非常之飽！食飽當然出去行吓，行咗一陣就停咗雨，我哋落咗去上葡京嘅賭場，睇佢哋賭咗陣錢，大家都冇收穫，跟住就行出上葡京四圍行吓，離遠見到有個模仿香港珍寶海鮮舫嘅建築，寫住澳門皇宮，右行過去睇吓，原來呢度叫做娛樂廠，有個地方係玩室內 Air diving，我地就冇玩，行左一陣就過去永利皇宮，我未去過，見佢有纜車坐，好友話上次去要排兩個鐘，今日落雨應該唔使排咁耐，去到果然唔多人，大概排咗5分鐘就可以上車，上到去酒店嗰邊有一個站，我哋可以唔落車，繼續搭返去上車嗰個站！雖然只係喺個水池上兜咗一個圈，不過呢度真係幾靚！而且免費，都值得上嚟睇吓！

跟住行去倫敦人，影完一輪相，就搭shuttle 去大山巴附近，再分兩架的士去食晚飯，訂左婆仔屋，呢間餐廳都幾古色古香，佢好似一間獨立屋咁，有兩層高，我哋上一層餐廳度食，佢係食葡國菜嘅，我哋叫咗蝦、燉肉、炸馬介休球、海鮮飯等等，食物質素都唔錯，價格實惠！仲喺呢度切埋蛋糕☺️👍🏻食完野在外面行一陣，然後行去新葡京，又去舊葡京賭場望吓，即時覺得呢度又細有舊！不過仍然非常之熱鬧，座無虛席😅

去到新葡京諗住搭shuttle去碼頭同埋港珠澳口岸，點知shuttle已經停咗，唯有撘巴士！架巴士好多人搭，而且都幾多轉彎位，司機又開得幾快，所以都要搵位坐，都搭咗成半個鐘先去到港珠澳碼頭，跟住一齊搭金巴返香港，旅程就完結喇！全日淨係搭車要俾錢，完全零消費！😂😂😂😂