星小館

今晚約咗好友一齊食飯傾吓行程，去咗呢間食小菜，店入面嘅裝修都唔錯，見到仲有D房仔可以坐四個人，我哋諗住下次可以試吓book，呢度日頭應該有點心食，小菜嘅款式都幾多，而且好多款菜式都有D特別，樣樣都好吸引，原本我哋想叫白肺湯，但係要預訂，所以飲唔到，跟住店員介紹飲海底椰湯，落咗單之後又話賣晒🤦🏻‍♀️ 另外我哋叫咗個剁椒魚頭、羊肚菌粗齋、文昌雞、鐵板牛小排、豉油王炒麵，食物嘅質素都唔錯，份量亦都唔算大，所以我哋本來只係叫咗四個餸，後來都要加炒麵，本來諗住想食甜品，但係佢又賣剩一款，所以我哋都可以出去食甜品！

傾開行程，問好友們怕唔怕上星期四日本開始倒核汚水落海，佢哋都話唔驚😅

 

喫茶 ちょうぼ Choubo Kissaten

前日買咗支Insta360嘅X3 ，今日就去試吓佢！

先去中環睇醫生，然後梗係去中環碼頭嗰邊影吓，天氣非常之熱，影咗一陣已經身水身汗，而家我雖然是用之前已經睇咗啲片介紹點樣用，但係實際自己用起上嚟都唔係咁簡單，又唔知取景啱唔啱，求其拍咗幾條片返去再研究吓，先去IFC涼下冷氣先！🥵 

跟住再由中環搭地鐵去銅鑼灣，去到銅鑼灣先食少少嘢兼涼下冷氣，去咗世貿，上次想去呢間餐廳，但係後來改咗去食壽司，今日就自己嚟試吓，我叫咗一個炸厚切豬扒飯同埋一杯栗子咖啡，杯咖啡話係桌前即冲，其實只係將咖啡同奶沖埋一齊🤣 個豬扒幾Juice因為唔係全熟，佢俾我嗰舊豬扒係有根嘅位置，所以有D韌 ！豬扒本身嘅味道唔濃，個汁就幾好味！下次再試吓其他嘢食！

食完嘢繼續去影相，去咗時代廣場，因為仲做緊迪士尼100週年嘅裝飾，我覺得銅鑼灣呢邊嘅裝飾，冇尖沙咀海港城嗰邊咁靚，而且超級多人，都好唔容易先影到幾張冇乜人😅

 

Beans

尋日去完葵芳食晏，今日又去葵芳！😄

今日食西餐，成日都會經過呢間餐廳都係第一次嚟食，餐廳嘅格局都幾文青，木系傢俬，而家好多咖啡店都係咁樣，今日雖然星期日，雖然要等位，都係等一兩張都好快有位！我哋坐嘅位置係面壁位，雖然座位係冇得挨，不過對住假竹林，都唔錯！

餐牌嘅選擇都幾多，主要都係一D意粉、沙律、Pizza，我哋叫咗一個比目魚忌廉周打龍汁意粉同埋一個燒烤醬烤雞 mozzarella pizza，仲叫咗兩份薯條，我就叫咗杯玫瑰咖啡，好友就飲花茶，食物嘅味道都唔錯，而且份量都唔細，可惜只有一個鐘時間食，下次搵日放假去食下！

今日買咗新玩具，係Insta360嘅X3 ， 360到相機，真係好開心，自從買咗佢嗰支自拍棍 Flow ，就愛上呢個品牌，早前已經買咗 Go3，而家趁低吸納買埋支X3 🤣🤣🤣

 

Cha Thai

今日約左好友在葵芳食 lunch ，去左呢間食泰國野，呢度有一D零食雜貨賣，不過唔多見有人睇，可能有好多唔係泰國貨，我就冇興趣！

我地叫午餐，價錢都係幾十元一個餐，我地share 兩個餐，一個係炒金邊粉，豬扒蛋包飯，加左兩串沙嗲牛肉，一人叫一杯椰奶咖啡！食物質素都唔錯，可以有下次😄

食飯果陣同好友傾計，我話佢知尋日收到好友從北海道買返嚟嘅赤肉蜜瓜🍈，仲有蜜瓜蛋糕，好開心，好有心呀！好友話佢11月尾去東京，唔知到時可唔可以一齊在東京食飯呢！

 

奧本海默 Oppenheimer

二戰期間德國研究原子武器，美軍找到奧本海默，要求他擔任曼哈頓計劃總監，負責原子彈的研發工作，奧本組建了一個物理及科學家的團隊，在新墨西哥秘密研製原子彈，這個被視為拯救世界的一種武器。研發期間，科學家對它的危險性感到憂慮，奧本找了著名學家愛恩斯坦去驗證其可能性，並發現有可能毀滅世界。1945年德國雖然已投降，但第二次世界大戰仍在繼續，美國決定繼續這計劃，並要進行了試驗並取得了成功。美國決定在廣島投下原子彈後，日本終於投降了，奧本被封為原子彈之父，但感到自己雙手沾滿了人民的血，令奧本認為自己應該要承擔責任……..！

終於抽到時間去睇呢套三小時的電影，原本想睇 IMAX 版本，但買唔到中間位就不如睇普通版本，之前睇鄧寇克大行動，覺得好睇，今次導演都係用二戰做背景，好多化學科學名稱，所以追字幕都有D吃力！😅要好專心睇，所以都唔覺佢有三個鐘，中間只有一兩場悶場，一到悶場，有D觀衆就會睇手機、傾計🤦🏻‍♀️

 

百樣玲瓏-卡地亞與女性

一路都好想去睇呢個展覽，但係遲遲都未能夠去睇，見到展期剩返幾日，趁今日放假嗱嗱聲去睇吓，搭車去佐敦轉296D 巴士可以直接去到香港故宮博物館，一落車見到好多團大陸團 😟，我就直接上去買飛，雖然今次淨係想睇一個展館，但係佢嘅飛應該係一張飛已經包左幾個展館可以去，我諗住睇完呢個展覽，睇吓時間先再決定睇唔睇其他嘢，因為其他展館基本上都睇過！

呢個展覽在8號館，亦都係唯一要排隊入場嘅一個展館，而且女性居多！始終珠寶都係女士們喜愛嘅多😂，一入去展館，就係一系列嘅鑽石皇冠👑，非常之靚，當中亦都有海報嗰個，有白色羽毛嘅頭飾，個個企喺度狂影相唔願郁，所以非常之迫！我影咗一陣就去第二個位置睇，其實每個位置都好多人影相，好多展品旁邊都有介紹果件展品嘅資料，但係太多人圍住左，好多時都睇唔到佢寫乜，除咗皇冠，仲有珠寶同埋手袋、手錶，行到最入仲有幾件矚目嘅展品，包括劉嘉玲同埋林青霞借出嘅頭飾，仲有之前一D電影嘅道具鑽石頸鏈， 雖然唔係真鑽石，但係都好靚，展館最入嘅地方，係一D電影角色用過嘅飾物，所有展品都好靚，真係目不暇給，所以我都睇咗足足三個鐘頭，睇完之後喺下面個公園行咗一陣，拍左一陣片，就打道回府喇😄