鮨優

今晚約咗好友食飯，未齊人，就去咗呢間壽司店食生蠔，其實呢度主要做外賣，因為冇位坐低食，只係有個細細的企位，只可以企兩三個人，見佢嘅食物選擇都幾多，價錢都唔貴，好友之前食過佢嘅生蠔話好味，所以特登帶我嚟試吓，日本生蠔唔係隻隻都好食，今日有日本真蠔同室津蠔🦪，我哋叫咗兩隻日本真蠔，我又真係幾好食，下次可以試吓佢地D壽司！🍣

跟住我哋去咗打冷，然後就去果欄！😆 因為我哋好想食榴槤，今次買咗一個金枕頭，同埋一個干腰😅，呢幾年D金枕頭嘅味道都好甜，得個甜字，冇乜榴槤味，今次都唔例外，再試下個干腰，味道唔錯，有返D榴槤味，唔會一味死甜，好食 👍🏻

 

Terrace in seaside

之前呢個鋪位係Snoopy餐廳，唔知幾時轉左韓國餐廳，個門口都好靚，開頭唔知佢係食韓國菜，但係見到招牌嘅韓文，就知食乜啦！😆

睇吓餐牌，個餐牌好靚，主菜有年糕、意粉、飯，仲有炸雞、三文治、甜品等，我地叫咗一個蛋包飯、部隊鍋、同埋飲品，食物味道都唔錯，而且賣相都好靚，打卡一流😍，下次要試吓佢哋個炸雞！😋

 

蘇媽·蘇媽 x So Bar

之前一路都想試吓呢間D肉骨茶，今日行過The One，唔知幾時呢度開咗間，仲連埋酒吧，入去食啲嘢補充番體力 💪🏻💪🏻

睇餐牌其實食物嘅選擇都唔算好多，主要都係一啲馬拉、星加坡菜式，我哋叫咗個一字骨肉骨茶，蒜香青龍菜、燒雞翼，肉骨茶唔係想像中咁好食，同記憶中嘅肉骨茶有D差別，可能藥材味冇以前咁重，以前在馬來西亞定星加坡食過，好食好多，可能中藥味太重唔係咁多人鍾意，所以配方都改淡咗？本來想試吓佢班蘭葉做嘅食物，但係今日唔係好肚餓，食完個肉骨茶都飽咗九成，下次再試過😅😅

 

AME Stadium (K11)

之前去尖沙咀 H Zenter 果間 AME 執左，原來搬左去 K11 ！今日就去玩吓先！

位置有D偏僻，在大都烤鴨再入D，依家佢地好似轉左買 token ，之前唔記得係已經有，定有其他option 定，總之依家有 token ，同埋有一個價錢玩晒十種 game，token $500 有50 個，$1000 有200 個，都相差好遠，如果同朋友 share 就梗係買$1000 啦！每個 game 要4個 token ，而滑雪板要10個 token !

佢地多左運動項目，我記得之前好似得6-7款，依家多左足球、籃球、跑步機、攀石同戰鬥繩，以前單車有4架，依家得返兩架，今次我挑戰左滑雪板🏂，好好玩！唔怪之得貴D，時間有15分鐘，都好快過到，負責指導的男仔，好有心機好落力咁教，又全程鼓勵，令人玩得好投入好開心！成功過到兩次100 分 💯👍🏻👍🏻👍🏻 另外又玩左攀石，可惜攀石牆太矮，玩得唔夠喉 😅下次再同其他朋友去玩下先得 😄

 

古琴雅苑

好友四月生日，終於約到佢食生日飯喇！

壽星女講明要食片皮鴨，我哋都好想食，所以訂咗枱一齊去呢度食，去食飯之前我去攞蛋糕，因為之前一日訂咗個蛋糕，攞完蛋糕放咗喺餐廳，再出去行吓，因為仲有成個鐘，四條友走咗去DONKI行咗陣，買咗少少野，就行返去餐廳睇吓有位未！點知都仲有幾多位！早知我哋早D過去啦！

叫咗一隻北京填鴨、小籠包、松子魚、脆鱔、菜 🥬 ，好好味，北京填鴨配卷餅🫓真係冇得輸 😋😋 食得飽飽地，雖然有蛋糕食，但係忍唔住要叫一下高力豆沙香蕉！真係好耐冇食過！反正一客得四粒啊，一人一粒啱啱好！食完甜品再切蛋糕，今次呢個蛋糕係咖啡味，在 Tony Wong 度訂，佢出咗D半磅裝嘅蛋糕，啱晒我哋人少少食，平時D 蛋糕一磅裝四個人食就太多，起碼要六至八個人先食到一磅，而家出咗呢啲半磅裝，以每磅價錢計，其實係貴咗少少，但係就啱啱好食得晒！

飯局作客 - 新貓貓朋友🐈

睇完戲，約咗朋友去佢屋企食飯，一去到佢屋企就話介紹個新朋友俾我識，原來佢養咗隻貓貓，佢話係一隻近乎全白色嘅布偶貓，好友對全白色嘅寵物有D喜好，之前佢養咗隻柴犬，又係揀咗一隻全白色嘅，都係該品種之比較少有嘅顏色！早幾年佢經常話養隻貓，我哋都勸佢唔好養，因為佢之前養過兩隻狗都俾咗人，最重要係佢自己都未養得掂 😅

好友準備咗海鮮同埋牛肉，今晚打邊爐，另一好友未到之前，當然係同隻貓貓 🐈玩下啦，我都好耐冇玩過貓喇，佢隻貓有D驚青，雖然只係買咗幾日，不過當我哋递起手想摸佢個頭嘅時候，佢都好本能反應地縮開，感覺好似之前養佢嘅人係會成日打佢，所以見到人递高手就驚驚🥺

今晚食埋個分兩份控制得好好，啱啱好食晒，好好味！我哋已經約定下次食榴槤 🤭🤭

 

怪獸與鄧不利多的秘密 Fantastic Beasts: The Secrets of Dumbledore

幾個月冇去睇戲，戲院終於開返，亦都有好多戲上畫，先睇咗呢套先！

Newt 幫助一隻母麒麟誕下小麒麟，小麒麟能夠看到人類的靈魂，及未來的魔法生物，此時他們受到Grindelwald 的手下襲擊，搶走了小麒麟，Newt 返回母麒麟身邊時，發現牠已經奄奄一息，以及另一隻小麒麟，原來小麒麟是雙胞胎！於是他將小麒麟帶回自己的皮箱內！

鄧不利多年輕時，與 Grindelwald 曾經許下血盟，希望統治人類世界，任何一方都不可以違背對方，Grindelwald 參加領袖競選，希望能夠統治人類，鄧不利多阻止不到他，於是 Newt 聯同麻瓜 Jacob 等人對抗 Grindelwald …..！

套戲好長，成兩個半鐘，我覺得劇情拖得有D慢，雖然已經嚟到第三集，我都唔係好記得第一、二集劇情 😅比起前兩集，呢集有少少悶，係後半段先至比較緊湊！

檸檬手撕雞

最近成日睇抖音嘅短片，主要都係睇啲食譜，貪佢時間快，唔會咁長氣同埋因為短時間，食譜都係比較簡單，之前睇咗呢個手撕雞，又學下整！

買咗兩隻雞髀，只需要用鹽焗雞粉醃佢一陣，然後就蒸佢30 分鐘，然後要攤返凍佢，留返起蒸雞嘅肉汁，在雞肉汁加以下配料：一個檸檬、一個蒜頭、四隻辣椒、一棵芫荽，再加少少糖，然後自己試味，可以酌量加糖或者鹽去調到啱自己口味，將雞髀手撕起肉，再淋埋個汁就食得啦！雖然個食譜都好簡單，不過時間都要四十分鐘左右😅

 

心信奇妙 再次相會

迪士尼樂園關閉咗三次，今次關閉咗104日，尋日重開，尋日因為冇假放，所以約咗今日去！尋日睇新聞唔係好多人，我記得每次第一日開都唔多人，但係今日就好多人，可能因為係星期五嘅關係！張年票本來二月到期，Extend 左三次之後，出年五月先到期！😄

今日早少少出門，先去食少少嘢，然後直接入園，門口唔係好多人，可能好多人一早入咗去，入到去就覺得好多人，所有機動遊戲都要排隊最少半小時，所以我都冇玩機動遊戲，所有商店都好多人，不過晏晝都有巡遊，當然係規模細好多，只有三卡車！亦都有D舞台表演，不過今日好曬，所以我都冇睇到，大部份時間留喺商店入面涼冷氣！剛剛入嚟嘅時候見到好多產品都好靚，都好想買！佢哋出咗一隻頭箍，係可以自由組合上面嘅卡通人物，我就冇買到，因為屋企都好多頭箍！又有D春天粉紅色嘅產品，同埋出咗好多款口罩都好靚，又有D幾特別嘅背囊，不過質料好硬身，同埋容量比較細，所以都唔啱我！我走嘅時候，只係得壹樣嘢啱，然後買咗兩盒口罩就算，今期佢有優惠價換購米奇背囊，有四個顏色選擇，我揀咗個紫色！

太陽未落山就走喇，我見好多人都走，因為冇夜間巡遊又冇煙花睇，唔知幾時先可以有煙花睇呢？

 

海港薈

好友移居左台灣一年後，攞咗居留權，早幾個月返咗嚟香港，不過撞啱疫情，都冇辦法約出嚟見面，而家疫情放緩，今日開始恢復晚市堂食，即刻約出嚟食飯，今晚去大埔食，已經好幾年冇去過大埔！商場入面嘅店舖幾乎全部轉晒，只有少數仲係不變！以前喺呢度返工，好多時都去呢間酒樓食晏，酒樓就冇乜點變！

我哋四個都好耐冇見，經常只係在Facebook傾幾句，大家都係講吓近況，好友在台灣嘅生活好寫意，因為佢冇乜點打工，都係幫下朋友手，所以都好清閑，佢打算留多幾個月先走，所以都想搵啲part-time做吓，過吓日晨，而另一好友，講起原來佢八歲個女有 ADHD 注意力不足過動症，不過唔係好嚴重果隻，佢話開頭唔知道嘅時候，老師成日投訴佢好曳，都估唔到老師冇咁嘅經驗，發覺唔到佢嘅問題，只係一味投訴！反而其他學習班嘅老師就發現到佢嘅問題，所以叫好友同佢做吓評估，不過好又話睇政府嘅評估，要等年幾兩年，所以搵咗啲政府資助嘅機構去做評估，但係都要$8000 ！最後評估出咗嚟真係有，就可以攞住評估書去睇政府醫生攞藥，先至可以慳到D醫療費 😔 

今晚我哋叫咗燒味雙拼，有叉燒同燒腩仔，好耐冇食過燒男仔喇！好好味！另外仲叫咗條魚、雞煲、蝦仁豆腐、金銀蛋莧菜，呢餐價錢都唔貴，最重要大家食得開心！