%Arabica

今日出尖沙咀，主要去K11 Musea 影下佢果朶一個型玫瑰花🌹，唔知道擺咗幾耐，我都係最近先知有呢朵玫瑰花，今日天氣好熱，影完玫瑰花，見到旁邊有個小賣亭，原來係呢間咖啡店，不過今日冇飲咖啡，因為頭先去海港城食咗壽司，有D口乾，所以叫咗杯檸檬水🍋！解渴D！😅

 

中環街市

中環街市終於完成咗活化工程，昨日正式開幕了，今日就過去睇吓，從來未入過呢個街市，因為佢長時間都係空置及封閉左！都想睇吓裏面係點樣！

街市樓高三層，我由皇后大道中嗰邊入口入去，街市入面好熱鬧，好多人同我一樣趁熱鬧 😄，個個都企喺樓梯度影相，因為呢個街市最出名係嗰條樓梯，街市入面大部份地方都係將原有嘅裝修翻新左，包括呢條樓梯，唔容易影到一張冇人嘅相！😅 呢度仲保留左部份以前嘅檔口，改裝成為商店，所以D商店都唔係好大間，呢度有一D食店，大部份都係一個檔口咁大，主要都係做外賣，或者要符合中環區午飯時間D人匆匆忙忙要拎走，都有位置俾你坐低或者企喺度食，亦都有一兩間好似餐廳咁樣，值得一讚嘅係洗手間設計比較新穎！

呢度其中一間最大嘅商店，叫做 SL…OWOOD ，主要係賣一D比較環保嘅嘢，有食物同埋家庭用品，而且有賣麵包，佢嘅食物係鼓勵你用可重用器皿盛載，不過佢都有D紙袋俾你裝，你揀完食物之後，自己在紙袋上面寫返產品嘅No. 同埋重量，然後去俾錢就得喇！食物嘅選擇都幾多，主要係粉麵米、果仁、糖鹽、麵粉、乾果、香料等等，我揀咗一款意粉同三款麵，仲有素肉乾同開心果，下次再買其他試吓！

 

Barcode

見到中環呢間新開嘅Cafe，個背景都幾靚，所以又去試吓，我搭巴士去，跟地圖行，諗住沿上亞厘畢道行，位置好似有D唔對路，原來要行樓梯落去忌連拿利，餐廳在斜路最高嘅位置，去到仲諗住會好多人，今日只係得兩枱客！可能呢間店嘅位置有少少癖，雖然近住藝穗會，但係在斜路上高，唔太起眼，店嘅裝修都係以藍白色為主，同對面嗰間學校一樣係藍白色，店入邊嘅裝修都幾Modern，雖然今日好熱，但係兩枱客都坐出面，我都坐咗出面先，因為想影吓相，然後先坐入去裏面食野，店入面只有四張枱，同埋一D吧枱高櫈，室外嘅位就有大約八張枱，食物嘅選擇主要都係三文治、cake、曲奇、canelé  之類，飲品主要都係咖啡同茶，我就叫咗個 Big Beef 三文治🥪同 Latte，三文治都幾好味，佢係有D酸酸地嘅菜同埋D醬，夾住D燒牛肉，咖啡就ok 啦！雖然坐裏面，望出去都叫做有啲 view，間學校同隔離果座建築物都好有歐洲feel 😂 令我諗起在威尼斯飲咖啡☕️嘅感覺 🤣

 

台北。寬巷子

過返嚟海港城，直接就去食晚飯，我哋訂枱係六點，今日啲時間都好緊湊，去到都遲咗幾分鐘，不過佢會等10分鐘嘅！呢個鐘數就未滿座，可能多數人訂八點嗰個時段，一坐低先揀個湯底，揀咗養生白鳳湯，有人蔘花膠同埋烏雞做嘅湯底，我哋揀咗個大嘅日本和牛，雖然佢係大碟，其實只有六片！😅😅😅 另外叫咗佢最出名嘅玫瑰枝香，其實佢係豬肉砌出嚟嘅玫瑰花，我哋只係叫咗一朵，另外一啲配菜，有波波糖（菠菜包住一D豆皮）呢個係素菜、支仔冰 （蝦同豬肉花枝）、好彩頭（蘿蔔包住鴨肉蓉）、鳳梨酥（蝦同豬肉包喺豆腐裏面），同埋叫咗一個份菜！幾乎每一樣食物都係三件，啱啱好我哋每人一件，個湯底都幾好味，我哋就咁飲都入咗幾碗先，食物就普普通通唔算好特別，只係個名同埋造型比較特別，因為佢係台式嘢，所以都搞咗啲 gimmick ! 呢餐其實都期待咗好耐，因為都係提早咗成個月訂，不過相對就有少少失望，除咗價錢比日山貴之外，食材都唔係話一D好貴價嘅嘢，收費就偏貴左D！

 

彼思動畫的科學秘密 The Science behind Pixar

食完好好味嘅一餐壽喜燒，下一個節目就係去科學館，之前有一次想同朋友去科學館睇展覽，但係因為太過爆入唔到去，所以我從來未入過去科學館，今次一早上網訂咗就可以入去喇，入場費只需要$10，不過勁多人，可能因為仲係暑假，所以好多小朋友！一入到去就第一part就係睇片，因為冇乜位所以我哋冇睇度，直接skip咗去第二part ，第二part係展覽，入口有個巴斯光年，所以個個都企喺度影相，跟住就係彼思動畫製作嘅內容，成個動畫嘅每一part設計同製作，都逐一講解，亦都可以俾人試玩一D效果，展館都算幾大，睇完一輪影完相行到最後就係一間商店，我哋又行返返轉頭，去返最開頭嗰度睇影片，我哋睇嘅時候佢咁啱做完，所以我哋都冇等，睇咗啱啱好一個鐘就出返嚟，跟住就行咗去隔離其他免費嘅展館度睇吓，不過都冇乜特別嘢睇，我哋再搭返車過去海港城，因為頭先行過嚟足足行左差唔多半個鐘，所以選擇搭巴士去返碼頭，因為今晚又訂咗枱去返海港城食飯！

 

日山 Hiyama

期待已久嘅一餐，足足預早一個月訂枱！😅 終於等到呢一日，對上一次去日本，講緊2019年嘅事，當期時想試吓好出名果間壽喜燒人形町今半，後來因為新宿分店門口個店員態度唔係咁好，所以冇入去試，下次去日本一定要去試吓第二間分店！既然依家冇得去日本，就喺香港試吓啦！印象中好多年前食過壽喜燒，已經唔記得咗係點樣，今次呢間日山，係米芝蓮一星，入口嗰個假竹林🎋，都係佢哋呢間店嘅標誌，聽好友講，沙田都將會開一間分店，因為佢喺沙田返工，已經見到圍咗版裝修緊！

我比好友早到咗差不多半個鐘，因為佢呢度有限時，午餐做兩輪，晚餐又做兩輪，訂枱嘅時候只有兩個時段揀，所以知道佢做兩輪，店員話幫我睇吓有枱未，我話唔使急，因為預計好友冇咁快到！其中一個一定遲到，所以我喺出邊影吓相先，其實見到佢門口有個餐牌，好多人都行埋去睇，不過睇完想食都冇得食，因為唔訂枱根本冇位，除非咁岩有人甩底，不過佢呢度嘅訂枱，係早一日會再同你confirm，如果你取消咗，佢哋早一日就知道，我唔知有冇 waiting list，如果有嘅話，可能有機會早一日先通知有位都唔定 🤔 影完相，店員話有枱可以入座，咁我就坐低等佢哋，我哋坐窗口位，雖然有個無敵靚 view，不過我哋顧住傾偈同埋影相，都冇乜點欣賞個靚景 😅 店員俾咗個午餐嘅餐牌我哋，大概有八個選擇，價錢由$268至$498，我哋一早睇好咗，所以已經決定咗，要兩個壽喜燒， 加一個海膽魚生飯，我哋有coupon，每$200可以減$100 ，最多可以減$500 ，計過如果分開單，都係用多一張$100，相差不遠😅 我哋落咗單先，等遲到嘅好友到齊，先至上菜，先來個魚生飯，因為我哋都好鍾意食海膽，佢寫明係北海道嘅海膽，所以我哋先至叫，而且個賣相都幾靚，魚生同埋海膽都好新鮮，不過講唔上好出色，可能佢始終唔係主力做海鮮吧！不過質素都唔差！😄

每個餐都有前菜，前菜有梅酒啫喱、蒸蛋、同埋一啲凍嘅菜，係個梅酒啫喱幾好味，其餘就一般，重點當然放咗喺壽喜燒度啦！日本嘅壽喜燒，正常係每張枱有專人着晒和服咁去即席整壽喜燒，店員話因為疫情關係，要保持距離，所以只會喺側邊位置一併處理每枱嘅壽喜燒，不過煮之前都會攞份牛肉俾我哋睇一睇，我地個餐係用鹿兒島A5和牛牛肩胛位，牛肉嘅雪花都好均勻，亦都唔會太肥，我哋之前去超市買過返屋企自己整壽喜燒，而家咁樣一睇，覺得D牛肉比超市買果D靚好多，我哋都留意佢點樣煮，見到佢嘅做法係先煮咗汁，先至放牛肉落去煮，而且唔係好大火！上次我哋自己整，喺網上睇片，教我哋用大火煎塊牛肉，然後加汁，所以整到D牛肉燶晒， 個煎pan都黑晒！😅 而家見佢咁樣整，下次知道點做！終於整好有得食，佢有一碗生雞蛋🥚蛋漿，塊牛肉點一點D蛋漿先至食，好滑同埋好好味，我哋食得好開心，因為真係好好食，覺得等咗咁耐都值得！好友仲笑我，果個食得開心嘅樣好滿足 😅 直情去日本嘅感覺返晒黎 🤣🤣🤣 我哋開頭覺得一個餐有兩塊牛肉，應該好”漏”，而家覺得唔夠食，因為我哋三個人食兩個餐，只有四片牛肉！每人一片多DD，真係好唔夠食！因為兩個好友平時都比較細食，今日唔知點解大家好似好肚餓，定係因為佢好好食，大家都想繼續食！😆😆😆 食完主菜同埋飯，仲有個甜品，其實只係紅豆雪糕🍨，不過味道都唔錯，店員都走埋嚟問我哋覺得食物點，我哋話好好食，走嘅時候已經即刻要預約下一餐，又要等一個月後，今次食晚餐，一個月後可以訂 22號，但係嗰日係中秋節翌日假期，所以我哋約遲多一個禮拜，又係得兩個時段揀，六點或者八點，暫時約咗八點先，因為未知個幾月後個schedule係點，好期待，又有排等 😅