山西刀削麵皇

之前成日去嗰間山西麵店執咗笠，見到呢間都係食山西麵，好耐之前食過一次，平時行過都見佢幾多人，今日見佢冇乜人，又入去試吓！

食物嘅選擇都幾多，試咗麻辣牛腩刀削麵，同埋麻辣雞絲年糕，麻辣嘅味道同平時食開嘅麻辣有D唔同，而且唔係好夠辣，不過都過得去，可以再食！

 

清酒煮蜆

飲完咖啡，返屋企買餸，見今日D蜆都幾新鮮，買D返去煮！

試吓用清酒煮，上網睇吓食譜，用清雞湯加清酒，比例 1:1 ，加薑煮滾之後，放入蜆，加蓋煮三分鐘就食得！我覺得咸左少少，雞湯應該要用水開左先，例如 250ml 雞湯加 200ml 水，變咗 450 ml 雞湯+ 450 ml 清酒，就淡好多喇！

 

Another One

今日去剪頭髮，行過堪富利士道，見到呢間咖啡店，記得之前係甜品店 Seijo Fruitier ，唔知幾時轉左，見冇乜人，就入去試吓，店入面大概有八九張枱，有兩張係大少少坐四個人，其餘都係坐兩個人，原本坐近門口嗰張枱，但旁邊四個大媽好嘈吵，所以坐咗去最入嗰張枱！店入面除咗咖啡，都有熱食、漢堡包、同一D甜品，有小小越南 feel ，我叫左個 crème brûlée 同一杯 dirty ，味道唔錯，呢度食物同咖啡都唔錯，係環境迫左小小😅 下次試吓D熱食！

 

Rings Coffee

今日無無聊聊想去九龍城飲杯咖啡，上網search左幾間咖啡店，去咗呢一間試吓，今日天氣好熱好曬，咖啡店門外都有幾個座位，咁熱嘅天氣都有人坐室外，店入面嘅座位都唔算好多，今日都沒有滿座，我叫咗一個牛油果多士，同埋一杯 latte ，多士嘅味道都可以想像到，牛油果排到好似一朶花咁好靚！

上網search嘅時候，先知原來九龍城有好幾間咖啡店，我都未去過，下次再試吓其餘嗰幾間！睇新聞話今晚有血月，錯過咗就要等12年，唔知12年後自己會點呢？仲有冇機會再睇血月呢？😅

 

Mokumoku Yakiton

之前睇電視介紹呢間食日本串燒嘅小店，今日去試一試佢，店入面嘅地方都幾細，計埋我哋只有兩枱客，呢度嘅名物係豬肉，不過我哋都係叫咗一、兩串豬肉，其餘叫咗牛舌、羊扒、雞翼、鱔等等，食物嘅質素唔錯，全部野都係即叫即燒，呢度仲有自家製嘅梅酒，亦都有菠蘿酒、芒果酒之類嘅水果浸酒，我哋叫咗杯梅酒試吓，不過我覺得麻麻地，所以最後都係飲返其他飲品，整體來講呢度食物質素係幾好，當然價錢亦都係貴咗少少，餐廳嘅格局都好似日本D居酒屋咁，不過店員就冇喺日本D人咁友善！😅

 

B.O.T.H by Texas Burger

今日相約好友F一齊食lunch，去咗呢間新開嘅餐廳，雖然今日係星期日，不過都有位，唔使等！我哋坐近門口，叫咗卡邦尼意粉同埋一份牛扒，唔少得飲番杯咖啡！食物都幾好味，份量都唔少！

同好友傾偈佢話準備去打針，之前仲猛咁話叫人唔好打住，忽然間又話去打，同佢前度一樣，兩個都係突然間話要去打，雖然我都想打，不過都仍然好擔心，所以都係過多一兩個月再算！

 

新港 + 榴槤團

又到好友K生日，三人行去咗新港打邊爐，我哋叫咗原條鱆紅魚、赤貝、蟶子，火鍋只係叫咗牛肉、鮑魚同埋菜，已經食到非常之飽，今次都唔記得咗買蛋糕，如果有買就真係食唔落，食飽之後我哋就行過去果欄，為咗要食榴槤，就要行吓消耗一下，去到果欄見到有干腰，買咗個六磅重，但係D肉唔係好多，跟住攞去我屋企食，呢個榴槤好好味，我哋為咗食榴槤今日特登唔飲酒！成個榴槤只有五舊肉！好味嘅榴槤通常都唔夠食！頭先明明話好飽，食起上嚟都覺得唔夠！😅

食完飯我哋喺度傾偈，講起之前去歐洲，好友見我屋企有幾個歐洲買返嚟嘅小型牛鈴，好友話佢上次冇買到牛鈴，因為好貴，我就話記得唔係好貴，而我屋企果兩個仲有價錢牌喺度，俾佢睇吓都係幾蚊歐元，當其時嚟講七算都係幾十蚊，可能佢當時睇錯價錢🤷🏻‍♀️🤷🏻‍♂️

 

母親節飯聚

又到母親節，又係一家人食飯嘅時候，今次又買咗長腳蟹，今次冇咁大隻，因為人少左，雖然細隻咗但係都分量十足，除咗鞋之外，當然唔少得白切雞，每次媽媽都買隻雞整白切雞，佢買果隻雞都好靚，佢話去九龍城街市買，仲要預早一晚醃咗佢，隻雞好好味，其他餸就有弟弟買的韓式豬手，同埋蒸魚、炒菜呢D唔少得，最重要就係有靚湯飲！

 

老厝邊

雖然疫情嘅影響，令到好多食店都關門，但係亦都有唔少新店開，今日試咗呢間台式食物店，店入面有少少懷舊裝修，座位唔算好多，不過佢有樓上，我就冇上去睇，睇吓餐牌，食物嘅選擇就唔多，都係一D台式嘅麵同飲品，我下午茶時間去，主餐牌嘅食物冇提供 ！ 只提供下午茶餐，選擇就更加少，而且份量都較細，叫咗個嘉義雞肉飯，賣相就真係麻麻地，味道都還可以，不過我覺得佢食物種類太少，咁樣經營應該好難經營！

 

新竹福源花生醬

最近在美孚新村見到有兩間新開嘅食材店，其中一間有賣台灣新竹福源花生醬🥜，一直都好想試，但係唔係周圍有得賣，今日既然見到就買來試吓，價錢唔貴，不過食用限期就短D，只有一個月多D，都有信心食得晒，所以就買返去試吓，有時晚餐唔想煮嘢食，會買幾片麵包塗花生醬食，呢隻花生醬好香滑，一打開裏面有一層油，通常食到底就會比較乾，所以我會由底搞上嚟，好味！😋😋