Urban Roasted resort

在大南街經過呢間coffee shop好多次，每次見到佢都冇乜人，原因係佢除咗咖啡之外，只有蛋糕，今日即管去試一試，店員話遲D佢哋會有意粉、三文治之類嘅食物，我諗佢哋都覺得但係買咖啡同蛋糕係唔夠，店入面嘅空間都幾大，座位都唔算好多，佢有樓上，不過呢度係舊樓，嗰啲樓上其實係閣樓，樓底都係比較低少少，所以樓上嘅但係矮一D，所以我都係坐樓下，叫咗一件芝士蛋糕同埋一杯咖啡，味道就不過不失，下次等佢有其他野食先再嚟！

 

美味餃子店

每次去大南街，都經過呢間餃子店，見佢經常都爆滿，今日就冇乜人，所以去試吓，呢度除咗餃子仲有野葛菜煲生魚豬骨湯同埋豬手、墨丸麵，我叫咗一碗湯同埋一碗十隻韭菜湯餃🥟，個湯叫咗碗細嘅，雖然大碗只係多$6 ，但係因為叫咗湯餃，所以唔飲咁多湯喇，餃子都幾大隻，望到廚房入面D亞姨喺度包餃子，餃子味道就過得去啦，又唔係話特別好食，如果要等位或者好多人我就唔會食！下次行過如果冇乜人，都可以試吓D煎餃！

 

雞 soba 座銀

上次去食白鯛湯拉麵嘅時候，對面果間日本食品店，俾咗張卡片介紹同集團嘅呢間拉麵店，今次就去試一試佢，今日去到見到冇客，以為落咗場，店入面嘅座位都有大約廿個，餐牌選擇唔算多，都係幾款拉麵，個style有D似上次果間白鯛湯拉麵，既然呢間主要係食雞拉麵，當然要叫返碗雞白湯拉麵啦，個湯幾好味，跟碗麵果兩塊雞肉豬肉都好食 👍🏻 店員嘅服務都好有禮貌，下次可以試吓沾麵😋

 

PHI

文清咖啡店開到成行成市，最近喺美孚都開咗一間，呢個舊區都好少有呢類新派啲嘅餐廳，今日就去試一試佢，晏晝已經食咗飯所以去食個甜品，店入面嘅座位唔算好多，餐牌食物都係一D意粉、三文治、多士、蛋糕、pancake 等等，我叫咗一個疏乎厘 pancake🥞，同埋一杯玫瑰咖啡🌹☕️，疏乎厘pancake 味道都唔錯唔會太甜，啱我食，咖啡個樣都幾靚，不過味道就普普通通啦 !

 

太漁

話咁快到咗19號，上個月19號去咗名潮食館，相隔已經一個月，上個月原本就係約咗同一班朋友，因為我去咗名潮食館而取消咗，最後係改咗今日！今日全日食食食 😅

今晚都有二個甩底，我哋五個人食，叫咗招牌嘅老壇酸菜魚、咕嚕肉、半隻雞、乾煸四季豆等等，食物就一般啦，今日本來多一個例，但係今朝佢去行山嘅時候中暑，所以冇嚟到😅 另一個好友同佢一齊行山就冇事，所以可以出席！

 

Mr.Kanso

食完壽司🍣，好友 J 要返工走先，我同好友 F 去揾地方飲咖啡，行去耀華街諗住去街尾嗰間coffee shop，行到半路見到呢間，成間都係買賣罐頭，佢有堂食，有D食物都係用罐頭做，見佢有嘢飲，我哋又坐低試吓！

點入面嘅座位唔算多，門口有一張吧枱，有個小酒吧，入面仲有大概四五張枱，叫咗兩個小食同埋兩杯咖啡，一款係烤雞配炸番薯條，另一款係帆立貝脆餅，帆立貝係罐頭，佢會跟埋帆立貝個罐頭包裝，如果覺得好食可以買番罐，個炸雞同埋番薯條就加咗炸漿去炸，我唔係咁鍾意食😅，個番薯條就幾好食！

食咗兩餐都好飽，跟住同好友去搭車，因為我今晚約咗另一班朋友食飯，好友就自己搭車返屋企去先😅

 

鮨三川

上次食過一次之後，好鍾意呢間壽司店，今次約埋好友一齊食，原本訂枱上星期，但係冇位book唔到，所以訂咗今日，餐廳係分咗兩邊，今次坐另一邊，壽司嘅款式大致同上次差不多：

愛女魚配梅子醬
金線鯛（日本紅衫魚）
帆立貝竹炭鹽
深海池魚配柚子胡椒
依左木（上面有D類似薑芽碎）
牡丹蝦
鮮鯖魚
赤身醬油漬
北海道銀鱈魚
大拖羅
三文籽
海膽

今次唔記得追加其他壽司，例如赤貝、白子，今次個師傅有同我哋傾吓計，應該話係聽到我哋講嘢，都會加入話題，因為呢邊好靜，另外有兩台客喺我哋旁邊，兩個女仔同埋一pair 男女，佢哋都冇乜傾偈，或者係好細聲，上次坐果邊就好嘈，應該係有一大班人，喺度高談闊論，所以好嘈！兩個好友都話呢間好食，冇介紹錯，因為之前介紹好友去雲壽司，我最近去過覺得佢質素差咗，但係唔記得同好友講，佢上星期走咗去試，都話覺得麻麻地！不過如果佢原本係想來呢間，就係因為訂唔到枱先至過去雲壽司🤦🏻‍♀️

 

楓子咖啡

之前想試吓呢間，但係經常爆滿！今日早小小去，就有位喇！

店入面大約有十幾個位，揀左望街位，餐牌選擇有吐司、沙律🥗、意粉🍝、烏冬等，因為約左人食 lunch ，今餐當早餐，所以只係叫個無花果牛油果🥑吐司，本來想食紅菜頭藜麥沙律，但今日沒有供應，另外叫左杯咖啡！等食期間陸續有人入嚟，好快就 full 左！

今日天氣好好，有D熱，陽光普照，最啱影相！先嚟咖啡，影左一輪相之後，個沙律先至到！又影咗一輪相，先至食，吐司上面有黑醋，味道唔錯，唔會係好酸果種，好食，食完野就走喇，因為見到有人等位，而且我都差唔多要起行！🏃🏻‍♀️

 

香江花月

好耐冇同呢一班好友食飯啦，上次已經係12月初嘅時候，今次約出嚟食飯，一定要搵間正嘢食下啦，喺網上搵到呢間火鍋店，聽講話店主豪花二千萬裝修，睇相見到D裝修好靚，所以就去試一試佢！

我哋訂咗枱6:30 pm，最早嘅時段，所以去到冇乜客，店員都好熱情招待，仲叫我哋周圍影吓相，我哋梗係去影佢果個”偽 Team lab” 😆 其實佢係一間房，裏面擺咗好多圓形嘅裝飾，而且有好多塊鏡，加埋燈光效果，真係有D似日本嘅 Team lab ，只不過地方係細好多，除咗呢個偽 Team lab 之外，店入面有好多古董擺設，所謂嘅古董係一D幾十年前嘅舊嘢，例如人手撥號嘅電話、舊式電視機等等，店入面嘅裝修真係好靚，睇得出用料係唔錯，而且地方都幾大，仲有兩間房， 部分卡位亦都非常之寬敞！所以我哋狂影相！😂😂

影完一輪坐低就先來個welcome drink ，係荔枝特飲，小小嘅杯入面有一粒荔枝肉，飲完見個杯底有條立體魚，幾得意，之前在某間日本餐館都見過，跟住睇吓個餐牌，餐牌一樣係好靚，其中個日本牛乳鍋，有兩朵用牛乳湯做的白色花🌹在鍋中間，非常之靚，平時食火鍋好少會揀牛乳湯底，因為覺得牛乳同火鍋好似唔係好夾，但係為咗呢個咁靚嘅火鍋湯底，就即管試一試佢！個湯底其實係剛剛開始食嘅時候，有少少奶味滑身D，跟住D湯吸左肉味就完全冇晒奶味，味道同普通湯底差唔多，另外佢仲有一個牛肉拼盤香江拼，放在一個圓形嘅盤上，剛剛好套喺個火鍋嘅邊，拼埋個火鍋一齊好靚😍😍😍😍，基本上枱枱都會叫呢個，一來食得火鍋嘅多數都會食牛肉，二來配埋一齊真係好靚！佢先上咗個火鍋同埋個牛肉俾我哋先，可能都知個個客都要影一輪相，我哋當然唔客氣啦，連平時冇乜影相嘅男士們都影埋一份！😆😆

除咗牛肉我哋仲叫咗半隻雞、響鈴、脆骨腩等等，呢度飲品都好有特色，我哋叫咗一杯蝶中花、鳯琉香、瑰洛月，三款飲品嘅造型都好靚，佢有得揀要唔要酒精，當然係唔同價錢啦，有酒精就貴少少，果杯鳳琉香，會即場整個波波喺上面，都幾得意，而杯瑰洛月我個人覺得甜咗D，食物方面，個牛肉拼盤嘅質素唔錯，D牛肉好淋，好好味👍🏻👍🏻  呢度嘅食材質素都幾好，店員嘅服務都好殷勤，一定要再同其他朋友嚟食！