飯局主場 - 第廿二回

 近呢幾年都係同我同一班好朋友倒數迎接新嘅一年，今次係其中兩個好友第一次嚟我屋企，為咗簡單啲我哋就蒸海鮮同打邊爐，好友在荃灣買咗海鮮攞過嚟，而另外兩個好友就接埋個女一齊過嚟，好友洗晒所有嘅海鮮整晒所有嘅嘢，基本上我乜嘢都唔使做，只係等埋好友攞埋牛肉上嚟切埋就食得，今次買嘅份量都唔算好多，除咗牛肉仲有蝦🦐、扇貝、鮑魚、蜆、脆肉魚腩、墨魚滑等等，肯定食唔晒，因為每次打邊爐都一定食剩野😅

一路食飯一路飲，飲飲下都飲咗幾支酒，好開心成班好朋友可以一齊傾吓計食吓野，好友嘅女兒已經13歲，好似大人一樣同我哋一齊傾偈，我哋盡量傾D佢啱嘅話題，講吓D韓國女團男團，因為呢個小妹妹嘅打扮到成個韓妹咁，真係青春無敵！

食完飯，好友一手包辦洗埋碗，真係第一次唔使自己洗碗，搞到我都有D唔好意思，跟住我哋切咗D蜜瓜嚟食，個蜜瓜好甜，好好食，食完晒所有嘢已經差唔多要倒數，我地對住個電視一齊倒數影相，送走唔多開心嘅2020年，希望2021年疫情快D過去，大家可以重過正常生活！

以前我地呢班 friend 係八個人，有一個經常甩底而家都冇乜搵佢，另一個因為湊仔，佢奶奶又好管束，所以成日都出唔到嚟，我哋就變咗最頻密接觸嘅六個人，可惜最近其中兩公婆，因為個仔病咗，所以出唔到嚟，因為佢個仔係重病有腫瘤，要長時間照料，最近佢做完手術，佢哋俾咗D相我哋睇，只有四歲嘅小朋友已經開肚做手術，長長嘅一條疤痕，睇到真係好傷心，因為呢個小朋友好乖，我把成班朋友好錫佢，每次食飯都要帶埋佢，有佢喺度我哋成班都好開心，年初因為疫情已經少咗見面，六月疫情好轉嘅時候同佢一齊慶祝生日，一個月後佢就確診有腫瘤，之後就化療、手術、電療，我地好傷心好難過😭😭😭😭，希望佢快D好返，佢病咗咁耐我哋都冇見過佢，因為佢抵抗力好弱，擔心有疫情或者有其他細菌感染，所以都唔敢去探佢，好掛住佢，雖然佢爸爸話佢就算好返，都好大機會復發，希望佢今次好返之後，小心D飲食同埋生活，能夠減低復發嘅機會❤️

三和敘

早前去好友屋企食飯，前兩日好友屋企嘅大廈係強制檢測大廈，加上自己有少少流感症狀，所以好擔心，即刻走去做檢測，夜晚做完檢查，第二日已經有訊息通知我冇事，當堂成個人都放心晒，之前未有結果嘅時候，就已經諗好咗如果冇事就食餐好D，所以今日就食餐好D😄😆

本來想出去尖沙咀，但係因為今晚約咗朋友去我屋企食飯，要去會合好友攞海鮮，所以唔係好夠時間，就近近地去咗九龍城，原本想去買德昌嘅魚蛋，但係排得超長龍，因為限聚令冇得堂食，所以我諗今晚好多人喺屋企打邊爐倒數，同打邊爐相關嘅食物都排晒隊，好友話買海鮮都好困難，因為超多人，牛肉檔亦都因為人太多，牛肉唔會代人客切片，所以我地一陣間都要自己切！😅

在九龍城想話飲杯咖啡，行過三和敘，突然間諗吓都好耐冇嚟過，呢間野係比較貴，因為質素都高，不過午餐通常都有D套餐會平D，咁所以行過去睇吓門口個餐牌，午餐嘅餐牌真係平少少，但係真係少少，所以揀咗一個set lunch，係海膽蟹肉釜飯，有湯有甜品有沙律，算係抵食！

 

Retold

自從限聚令又再冇得晚餐堂食，就只能夠午餐堂食，夜晚就返屋企食，尋日冬至，一家人都冇一齊食飯，因為疫情嚴峻，始終我哋各自住喺港九新界各區，都唔想有接觸，避免老人家抵抗力弱，就算屋企人都唔一齊聚餐🤦🏻‍♀️

又去南豐紗廠，入面有幾間餐廳都未去過，原本今日想去食點心，但係好多人，所以去咗呢間冇乜人嘅餐廳，店員都好着緊清潔消毒，咁就令到顧客好放心，叫咗一個意粉同埋一杯咖啡，隔離左右都冇人坐，咁就除低口罩都食得安心D，意粉嘅味道都唔錯，不過份量就細咗D，咖啡都好香濃，食完野杯咖啡慢慢飲☕️，坐咗陣都開始有多咗人入嚟，所以都唔坐咁耐走喇！

 

The Coffee Academïcs

呢間咖啡店都去過好幾次，因為佢有好多間分店，今次去海港城呢間係新開左冇幾耐，因為之前呢度係宇治園，賣綠茶食物及飲品，見佢新開就幫襯下，呢度有一個位係買外賣嘅咖啡小食，入去裏面就有得坐低食，座位唔算好多同以前嘅格局差唔多，試咗佢嘅 handkerchief 意粉、檸檬蛋糕、signature 咖啡，食物不過不失，咖啡唔算好特別，比較鍾意呢度嘅環境多啲，下次要約埋喺附近返工嘅朋友一齊飲番杯咖啡先得！

 

安祖家廚

去過火炭好多次，都唔知呢度有間私房菜，午飯時間呢度唔係好多人，加上疫情之下，每張枱最多坐兩個，我哋四個人就分開兩張坐，餐廳入面嘅佈置都幾有心思，呢度夜晚應該係做私房菜，而午餐就星期一至五有唔同嘅餐，亦都有D貴少少嘅嘢食，我哋都係叫午餐，亦都有人叫壽喜燒烏冬，食物嘅質素都唔錯，而且唔多人，通常價錢立偉貴少少嘅餐廳，在上班族嘅地區都係唔會滿座！因為對一般打工仔來講午餐嘅消費都唔會太高，我哋唔係寫過嚟所以冇所謂！

 

飯局主場 - 第廿一回 壽喜燒

今晚相約好友去我屋企食飯，我哋去銅鑼灣集合，去咗超市度買嘢食，今晚整夀喜燒，所以去買牛肉，買咗D靚靚日本牛肉，另外亦都買咗少少海鮮，買咗生蠔、半斤蝦同埋幾隻蚌，仲有D蔬菜類，買完一齊搭車去我屋企，因為食物唔係好多，所以好快就洗好晒嘢可以食得，我用咗 LC 煎牛扒果個pan去整壽喜燒，原則上應該要一個有蓋唔黐底嘅鍋，但係我冇，最重要唔黐底，所以用咗呢個冇蓋嘅pan，整壽喜燒嘅時候好大煙，因為個火開始時開得太大，後來教返細D就好好多，不過成屋都係一浸油煙味！🤦🏻‍♀️ 自己整壽喜燒真係平D又好食，唔少得一人一碗白飯，雖然我哋每人只係食兩片牛肉，但係已經好飽，因為有飯有海鮮，食剩好多蔬菜類，唯有留返跟住嗰兩個食😅

食完飯好友攞咗禮物出嚟，因為之前我哋傾過話聖誕前搞交換禮物聖誕party，我以為下個禮拜先至係，點知原來今次佢哋已經當係聖誕party，所以佢哋買咗禮物，但係我就冇買到，唯有之後補返，
佢哋買俾我嘅禮物都好有心思，包括有我個名嘅手機殼，同埋一個Beauty and the beast 入面 Be our guest 的蠟燭擺設！我哋仲搵返前年在東京迪士尼買嘅聖誕帽，攞出嚟大家一齊戴住佢再影相，佢哋真係好有心思，搞到我都唔係幾好意思😅

 

Sol House 親和藝術

上次同好友去食上海野，見到隔鄰呢間餐廳，今日就去試吓佢！

餐廳唔算好大，一眼睇晒，夜晚應該係會做酒吧，今日一個客都冇，就只有我一個，餐廳入面嘅佈置都幾有氣氛，門口都有大大棵聖誕樹，睇睇個餐牌，午餐有八款選擇，有主菜亦都有pasta，我揀咗烤美國有機極黑豬配蜜糖芥末汁，另外叫咗杯咖啡，豬扒都幾厚身，而且都幾大塊，仲配埋湯、麵包、沙律，仲有薯菜，食到非常之飽，豬扒唔算好Juicy，味道都唔錯，其他嘢就普普通通，價錢亦都合理！

 

飯局作客 - 彩雲邨

疫情下，想成班人一齊食飯，就只能夠在屋企食，今日本來想去我屋企煮飯，但係我冇假放，改咗去好友屋企食，之前都去過佢屋企一、兩次，都好耐冇去過喇，今次因為佢哋嘅細仔生日，所以一齊慶祝吓，好友一早買定餸煮好等我哋，一上到去就差唔多可以開餐，佢哋玩左陣遊戲機先至食飯，今晚只係煮咗四個餸，不過都夠食，因為仲有蛋糕，成班人簡簡單單食返餐，只求大家健健康康，開開心心就夠喇🤗

 

鮨勘

放假出咗去尖沙咀行吓，碼頭呢邊都有返少少聖誕裝飾，仲諗住今年唔會有聖誕裝飾添，影咗一陣間相，入去商場搵工嘢食，突然間好想食日本嘢，見到呢間日式餐廳，之前經過好多次，今次就去試吓佢啦，店入面冇乜客，近門口好多個卡位，我坐近門口嘅卡位，所以店裏面係點樣我就唔清楚，因為冇入去睇。

叫咗個親子丼同埋兩件壽司，我最鍾意嘅大拖羅同埋赤貝，壽司嘅質素唔錯，食材新鮮，個親子丼本來都唔錯，不過個汁太鹹！

 

極上帝王水產

食完Tea 冇幾耐，約咗好友去旺角食日式放題，因為好友生日，呢間係樓上店，店入面嘅格局都頗為逼，疫情之下佢地當然冇滿咗啦，限聚令之下，每枱只能夠坐兩個人，我哋四個人所以分左兩張枱，當然個距離唔係好遠啦，加上店入面冇乜人，可以大聲D傾計！

我哋都叫咗唔少嘢食🍣🥘🍲🦪🍢，因為三位男士都好食得，我就只係食咗少少野，食物嘅質素就麻麻哋，因為呢間個價錢都幾平，而且旺角區果D樓上日式放題質素都係咁上下，食完嘢我哋仲去行咗一陣間街，好友就會合佢女朋友，大家第一次見面，約好下次一齊出嚟食飯！