Deer Kitchen (荃灣)

好多時都經過荃新天地，見到呢間餐廳裝修咗一段時間，最近終於都開咗，我諗開咗三、四日左右，咁岩今日有朋友約食飯，就一齊去試吓佢！

晚飯時間7:00pm 都唔係多人，可能冇乜人知佢開咗，我地見門口冇餐牌，所以入去問佢攞餐牌睇下，店員好細心介紹佢哋餐牌有D乜嘢食，有D乜嘢招牌菜，亦都講埋有D乜嘢優惠，例如：7:30pm 之前仲係happy hour，紅酒🍷、白酒、啤酒🍺都係買一送一，生蠔🦪本身做緊 $10，依家仲平D $8隻 ！咁就入去試吓！

店入面大約有四十幾個位，有兩個大鳥籠卡位，每個可以坐4-5人，不過依家冇比人客坐，放左餐牌、消毒用品，我地坐酒吧附近，睇多次餐牌，招牌菜火焰西班牙黑毛豬肋骨，好友覺得好似好細件，所以叫左晚餐的西班牙黑毛豬鞍，有湯有沙律抵食D，另外叫左一打生蠔🦪，一客Buffalo wing 同埋白酒，白酒係澳洲的 Chardonnay 。

先上左生蠔🦪同白酒🥂，兩個人食住生蠔飲吓酒，好寫意，平時好友同我一樣，宅在家裡有時會食吓黑毛豬火腿、芝士飲吓酒，原來大家都有食 759 的西班牙黑毛豬火腿，雖然唔係高質100%橡果，但係幾十蚊一包都真係抵食！此時此刻都好想食！生蠔都好新鮮，唔算肥美，不過$8隻都物超所值！我地趁7:30 前叫多round白酒！😆

Buffalo wing 不過不失，少少辣，平時食的 Buffalo wing 有D炸粉，呢度就冇乜，似焗雞翼，啱晒我！塊豬鞍好厚肉，肉質尚算 juicy，味道不錯，底下仲有一塊紫薯餅，好味！😋

食緊飯果陣落大雨🌨，仲黑雨添！😅我地慢慢坐，仲叫埋甜品，一個心太軟，一個 Blueberry cheesecake，好味！呢個時候最好有杯咖啡或茶，不過我驚失眠🤦🏻‍♀️所以冇左呢個完美的收結🤣

氣炸胡椒餅

上網睇過一D片，參考左其中一條，條台灣嘅胃小姐，材料都好簡單而且都好快手，因為佢唔係自己搓皮，而係用現成買嘅雪藏香蔥餅，因為買唔到香蔥餅，所以買咗手抓餅，應該都係類似酥皮咁嘅嘢，食譜係咁嘅：

免治豬肉（份量視乎你要包幾多個）

蔥 （2-3 棵）切細圈

糖 7g、鹽、五香粉、黑胡椒碎、白胡椒碎、蒜泥、麻油、豉油，每樣調味料都係少少，白胡椒碎就落多D，先至有返D胡椒味！最緊要加一隻雞蛋，咁D肉先至會Juicy D ！

所有嘢撈埋一齊，餣一陣，最後先至加D蔥落去，每一片手抓餅，只可以做一個胡椒餅，雖然可以擀薄D塊手抓餅去包兩個，但係薄咗會好容易穿，除非真係整細細個！所以用一塊手抓餅，包多少少肉做一個大嘅好D，個食譜教人包好之後，在表面塗一層蜜糖水，然後先至黐D芝麻，但係我冇塗蜜糖水都一樣黐到芝麻，包完之後，用氣炸鍋教160 度焗10分鐘，然後反轉再用180 焗8分鐘，完成！快靚正！👍🏻👍🏻👍🏻

Buondonno Pasta Di Gragnano意粉 Azienda Agricola il poggio del picchio 果醬

 

兩個月前在 KK life in Italy 的網店，訂左意大利粉，D意粉要由意大利坐船🚢過嚟，足足要兩個月！今日去官塘取貨，原來佢都好大包，其實佢同一般意粉一樣，係500g一包，但係包裝紙比較厚同大份，所以重左好多，每set 意粉有七款，合共3.5kg 一份，連埋包裝都有4-5Kg 🤦🏻‍♀️，另外亦都即場買左3樽果醬，因為之前推出一set 要買18樽，雖然好細樽，但也太多了！依家有散裝，就買幾樽試吓！

意粉有7款，我唔知中文叫乜嘢，所以自己比左個名佢😄：

Paccarielli Rigati
大圈圈通芯粉
Scialatielli
短扁意粉
Pennette Rigati
尖長通粉
Maccheroncini 
長通粉
Linguine
扁意粉
Tagliatelle Rigati
闊條麵
Spaghetti 
意大利粉

意粉用左南部 Napoli 的好水好風，因為當地地勢關係，所以有助自然風乾！

至於果醬，牌子好長 Azienda Agricola il poggio del picchio ，是一個小小住家形式的果園少量生產，而且因應季節，以當造的水果製造，而且不加防劑，所以下次未必有同款的果醬售賣，而佢地D果醬有唔同配搭，一共有18種味道：

• 柑橘果醬 
• 杏桃果醬 
• 香橙果醬
• 車厘子果醬
• 白蘭地焦糖洋蔥醬
• 香醋百里香焦糖洋葱醬
• 冧酒無花果醬
• 榛子杏仁可可豆無花果醬
• 薑南瓜醬
• 香橙茄汁
• 薑檸檬果醬
• 開心果穀物茄子醬
• 肉桂蘋果醬
• 可可豆德國琵琶醬
• 橙皮黑朱克力德國琵琶醬
• 辣椒蘋果醬
• 焦糖紅辣椒醬
• 烤榛子黑朱克力棗醬 / 奇異果抹茶果醬

今次買左：薑檸檬、冧酒無花果、車厘子，唔記得試好少有嘅琵琶醬添！下次再買嚟試吓！

迪士尼再重開

七月爆發第三波疫情之後，迪士尼又再關門，唔記得咗邊日開始關門，大概都有兩個月時間，今日又再重開！今次都係要預約登記，當然第一時間預約啦！

入園之前去食D嘢，在旺角新世紀去咗 Wheatfirld食撈麵，配左個紅菜頭湯，同埋$1雞扒，個撈麵幾好食，嗰塊雞扒味道都唔錯不過細塊得可憐！

上次六月第一次重開嘅時候，都係第一日入園，今次明顯比上一次多人，而且今次城堡嘅圍板已經拆咗，雖然上次都睇到城堡個樣，但係前面仲有圍板，拆咗圍板就可以企正中間影相好睇D！城堡嘅後面其實仲有少少搭棚未拆，而且城堡未正式完工！

今日因為人多，排隊時間都長咗，上次都唔使點排隊，今次排隊時間就長D，所以淨係玩咗 Iron Man同埋迷你莊園，連平日冇乜人嘅4D都好多人，所以冇去到睇，商品方面冇乜嘢新野，同上次差不多，所以今次都冇買嘢，淨係食咗杯軟雪糕，同埋買咗相！

Glasshouse Greenery

今日玩左成日，都有D攰，我哋行完 H Zentre之後，就行過對面 K11 Musea，又去搵嘢食，揀咗呢間西餐廳，佢有室外座位，但係我有D熱，所以都係坐室內，不過今晚爆曬場，只有吧枱位，三個人坐bar 枱就冇咁方便傾偈，而且呢度D音樂幾大聲，加上酒吧不停製作飲品，個攪拌機幾乎冇停過，搞到我地要坐中間果個要傳話！

我哋叫咗一個牛油果沙律、一個沙律包配薯條、燒乳豬risotto ，另外叫咗三杯飲品，呢度嘅飲品選擇都好多，搞到我哋揀咗好耐先至揀啱！呢度嘅食物質素都唔錯，個乳豬好好味，我哋原本諗住食甜品，但係頭先經過幸福pancake，所以諗住留肚陣間再去食pancake！

食完嘢就真係落返去食pancake，呢間店嘅餐具全部都係即棄，我哋買咗一個鮮果pancake，同埋一個Tiramisu pancake，因為我哋三個人每人要叫一樣野，所以叫多一杯橙汁，其實我覺得pancake都係食原味或者配水果好D！

食完pancake，我哋再去驚安殿堂度行街，店入面仍然好多人，好友想買洗面膏，我地一路行一路睇好迫人，兩位好友都揀咗一D野買，我就乜嘢都冇買到，佢地兩個人夾埋都買咗千幾蚊，揀果陣時睇D嘢價錢唔係咁貴，賣單果陣就係咁貴！😅

AME Stadium (H Zentre)

呢間電競體育館，今日先至新開張，店員話可以入內參觀，見入面只有幾款運動電競，分別有 E-Cycling 、E-Skiing、E-Racing、E-Rowing 同埋 E-Boxing，有D會配合 VR 一齊玩！我哋都好有興趣，不過相信要有一定嘅體力，我驚玩到身水身汗，原本想即刻試玩，但係好友今日着裙，所以我哋冇玩到！下次稍為練習吓體力，就過嚟玩吓！

谷辰 Guu San

又係睇宣傳廣告，介紹呢間新開嘅日式超市，雖然超市只有5000尺，不過有日式呢兩個字，就吸引咗好多人去睇，呢間超市在 H Zentre ，呢座大廈係新起好，就在中間道喜來登隔離，店入面其實唔係全部野都係日本嘢，不過大部份都係日本嘅，睇佢價錢都係略為貴咗D，有D產品驚安殿堂都有賣，而且價錢會平D！當然呢度唔會咁迫咁多人！店入面仲有一個小food court，只有兩家小店，一間係買米飯，另一間我唔記得咗去賣乜嘢！😅

我地都睇唔啱嘢，行咗一陣就走喇！見到呢個商場除咗地面呢一塵，上面仲有兩層，不過大部份係未開，甚至可能未租出，因為唔係裝修緊，上一層有一間電競運動館，話今日先至開張，我哋在門口巧遇一個朋友，大家傾咗陣間，呢個朋友因為趕時間就走咗！

紫在北角滙花夏祭

 

上個月睇廣告見到介紹北角回滙呢個花夏祭，今日諗住過嚟影相，嚟到先至知原來要預約先至入得去，入唔到去唯有在外圍影相，不過老實說，唔係想像中咁靚，可能入到去影會靚D，好多人在外圍影相，我諗登記人都唔多，因為入面都係得好少人，定抑或係佢特登唔俾咁多人入，就不得而知喇！我地影咗一陣間相就入去北角滙行咗一圈，然後好快就走，因為下一站仲要去尖沙咀！🏃🏻‍♀️🏃🏻‍♀️🏃🏻‍♀️