今朝早餐在酒店地下的餐廳食，餐廳叫做夜光杯，我以為是中餐廳，昨天的 welcome drink 也是在這𥚃飲，餐廳的地方不大，但樓底很高，早餐的食物選擇一般，不算多，最特別的是有豚肉飯！正是十勝帶廣的名物，昨晚食左好味的豚肉飯，今日再整多碗，因為今日要離開帶廣了！
食完早餐，揸車去警局，離酒店不遠，天氣有點涼，大概18度，去到見到是一間大警局，類似我們分區警署，門口有一個女警在守住，她只穿短袖衫，左手手持一支長木棍，右手叉腰，眼望前方，一直保持這個姿勢，只是有人經過才會打招呼，但仍維持姿勢不變！入到去在接待處問，我諗冇乜講英文的人來，所以佢地已經知道來意，接待我們的是一個好似係文職的女士，應該只有她識英文，她亦預備了講稿，說起來不太流利，佢又講返報案紙不可以比 copy ，只可以比個號碼我地，我地又搵返網上圖片比佢睇，佢明白後，再去整文件，終於整到一份証明文件比我地 ！好彩只係攪左廿分鐘左右！攪掂晒就揸車去富良野，大約要一個小時，好友的心情好了小小，不過仍然笑唔出！預計保險可以 claim 返$5K，都好過 total loss ！
去到富良野，我地去一個叫做彩香の里的花田，這花田是種在斜坡上，如果開滿花看上去會好漂亮，可惜已是季尾，只有一片綠 ......！只有極少嘅花，仲要上到斜坡最頂嘅位置先至睇到少少花，呢度仲有兩間Cafe一間 shop ，間shop就冇開，兩間Cafe只有一間有outdoor座位，我哋就去買咗杯雪糕食，係薰衣草雪糕，味道比較甜，薰衣草味唔係太濃，我地影左陣相就走啦，轉去蜜瓜園 Tomita melon house !
差不多到蜜瓜園之前，離遠已經見到一個蜜瓜氣球，呢個設計幾好，睇唔到個蜜瓜園都睇到佢個氣球，就知道目的地不遠了，去到蜜瓜園嘅時候望到旁邊有一個薰衣草園，我記得以前跟團去北海道嘅時候，去過呢一個薰衣草園，我地先去睇蜜瓜，然後再過去睇吓薰衣草，呢個蜜瓜園好大，可以泊好多車，裡面除咗賣蜜瓜嘅地方之外，仲有一個賣蜜瓜副產品嘅地方，就係蜜瓜蛋糕、麵包、糖果之類，我地即刻買半個蜜瓜試吓先，再加軟雪糕，半個蜜瓜係¥1200，一片蜜瓜就¥300，軟雪糕 ¥350，我地一路刮蜜瓜嘅肉，佢不停標汁，勁多汁，個蜜瓜勁甜！好好食，大家即刻諗要買幾多個！好友先買一個寄日本國內比家姐，我哋揀完一輪最後都係決定後日再嚟買，因為驚買咗趕唔切食，好快會爛！
食完雪糕，行過去對面薰衣草園，見到薰衣草園個名都係同蜜瓜園同一個名，就知道佢地係同一個集團，呢邊好多遊客，因為停咗幾架旅遊巴在停車場，見到D團友多數係泰國人，見呢度免費入場，我地喺度行吓影吓相！
跟住我地轉去另一個花田，就係四季彩の丘，呢個花田亦都係好多旅行團會去，我上次跟團都係去呢個花田，我仲記得佢門口有個用稻草球砌成的公仔，應該係佢地嘅吉祥物，當年同佢影過相，當時我地四個人影嘅果張相，大家都笑得好開心，如今有一個已經離開咗，睇返張相都唏噓！今日花田入面都好多人，而且個花田都好大，我地只係睇咗一陣影吓相就走，因為天色都唔係太理想，在入口的商店，見到有我上次在九州買的提子乾，所以買返兩包食，跟住見到白色嘅粟米，可以即刻生食，就買咗兩條試吓，真係非常之清甜，返香港果陣睇吓機場有冇得賣，要買番D返香港食先得！
離開咗花田之後，去搵 Mild Seven 之丘，聽講呢個山丘係因為有人影過張相，放咗 Mild Seven 包裝盒上，所以呢個山丘又稱 Mild Seven 之丘，去到嘅時候見到有兩個牌，話呢個係私人地方不准進入，如果企在呢個牌前面影相，就完全背光影唔到，如果天氣好又在正中午，先至有機會影到一個好D嘅效果，既然影唔到就唯有走，不過架車駛前少少之後見到另外一邊嘅山丘都好靚，我地停低影相嘅時候，好多經過嘅車都停低喺度影相，走嘅時候離遠見到，烏雲嘅中間有一線光照落嚟，之前同事笑稱呢種叫做耶穌光，意思係天上面突然有一條光線照住個人，就好似The chosen one 咁！
我地揸車返去旭川市，先去酒店check-in，今晚住 JR Inn ，酒店位於 Aeon 樓上，停車場非常之爆，其實個停車場有五層高，但係個個都停”架空下”果層，因為呢一層可以直接入去 Aeon 同埋 JR Inn 酒店，所以呢一層嘅車位都好緊張！我哋都搵到一個遠少少嘅位，在停車場去酒店要搭電梯上去5/F，酒店好新淨，接待處亦都有護膚品可以取，亦都係POLA呢個牌子！ check-in 完就上房，放低行李我地就出去，先去 Aeon 行一個圈，然後搵嘢食，食店集中左一齊，大概只有10間左右，睇完一輪決定咗去食 Shabu Shabu，店內嘅宣傳係用了¥1999 放題吸引人，入到去其實如果你想食好D嘅國產牛就要¥3099！任飲放題非酒精類就¥299 ，飲酒放題就¥599，我哋揀咗 ¥3099放題，湯底就揀咗雞湯同埋傳統嘅 Sukiyaki ，雞湯嘅味道偏鹹，Sukiyaki 就好味！我地個餐有兩款牛肉同埋兩豬肉揀，我地食咗一轉四款肉，就揀定一款豬同一款牛再 encore，肉嘅放題就要統一三人揀同一價錢，反而飲品可以揀唔同價錢，但係我地個餐本身包非酒類飲品放題，佢亦都可以唔使全部人揀同一種飲品放題，又真係估佢唔到！肉嘅質素唔係特別高，唔係特別推薦！
食完飯我地在商場行吓，我地去咗玩夾公仔機，我地叫店員幫我地擺得易夾D，最後成功夾到 Q pot 嘅Loki 公仔，同埋 Mario 星星，好開心！再去左 Daiso 買野，又去左超市買生果，然後返房休息！
酒店入住後評價
旭川 JR Inn
JR Inn Asahikawa
酒店位置就在旭川駅旁邊，無論揸車同搭火車都好方便，酒店好新淨，樓下就係 Aeon，就算天氣唔好都唔使行出街，已經可以shopping、食飯！酒店接待處在5樓，因為5樓以下係 Aeon，酒店嘅設計都好新，以木傢俬同裝修為主，酒店旁邊嘅通道可以行去電梯口，中間亦都有枕頭俾你選擇，我之前住過札幌站旁邊嘅 JR Inn ，都係有枕頭俾你揀，電梯嘅對面就係大浴場，早上去完全沒有人，兩個浴池都算幾大，梳洗嘅位置就比較細！房間的空間同一般市區酒店差不多，放兩個行李會迫D，洗手間和衣櫃用同一趟門，即係趟開洗手間門時衣櫃會關上，淋浴間同坐厠分格開，浴室用品同樣是 POLA牌子！房價是五百多，一張床的房，一人或兩人住都是同價，個人認為以位置及新舊程度，算是便宜！
早餐要去 Aeon 四樓的 Grand Farm Buffet 餐廳食，呢間餐廳全日都做 buffet ，食物選擇比較少，只有烏冬和拉麵不錯！
沒有留言:
發佈留言