八號風球 - 韋柏

尋晚已經3號風球，都幾風平浪靜，同埋天文台預計改掛8號嘅機會好低，點知今日突然間又話兩點前會掛8號，雖然8號風球，但係天氣唔算太惡劣，而且個風掛得好急，所以兩點幾果陣仲有車搭，商場同街市都仲未收，可以去買餸，我就去街市買咗豬扒返去煎，因為時間尚早，可以醃咗D豬扒，等今晚先至食，有幾個鐘頭時間冇乜嘢好做，就睇吓碟，睇咗千與千尋，因為下星期要去吉卜力，所以溫下書先！睇完戲早少少食飯，就煎左D豬扒，味道都唔錯！可能醃嘅時間夠耐，上次好友在我家作客，六個人食三塊豬扒，今次我一個人食四塊 ，不過冇其他餸食！只係食埋水果，所以都好飽，無端端多咗半日假，可以係屋企Hea下！幾舒服！

Greenhouse

相約好友去時代廣場食晏，原本想去三希樓，但係佢收4:00pm ，我哋要3:20 pm 先到，所以改咗去食第二間，去咗呢一間西餐廳，下午三點幾，冇乜人，我哋叫咗一碟蘑菇意粉、一個鵝肝牛肉蛋飯，同埋一個肉眼扒，食物嘅份量都幾細，不過我地都啱啱好食晒，飲品方面，好友F 因為有少少作感冒，所以叫咗杯檸檬薑蜜，我就叫左洛神花蜜， 而另一好友 J 就飲咗杯水果三重奏，食物嘅味道都唔錯！

我地傾計講開，好友 F 與男友分手後，他的男友在 IG 更新自己出去玩嘅相，唔少得同新女友的相，非常風騷，他對好友 F 擺出一個再見亦是朋友的態度，但係一個因男友見異思遷而被拋棄嘅女生，又點可以當冇事發生，仍然當你係好朋友呢？本來覺得，我地仲可以做朋友，但係對於佢呢種態度，我就有所保留！希望好友 F 能夠活得比佢好！

飯局主場 - 第十五回

好友K今日生日，大家相約好去另一好友 F的家食飯，但係好友F 和男友閙分手，所以最後改咗去我屋企，就冇叫佢男朋友，成班朋友一齊食飯去玩，一旦有兩個分手，都真係幾麻煩，因為大家有共同嘅朋友，有D活動都唔應該叫定唔叫！

相約好友在街市等候，一齊去買餸，我地只係買4個餸，四大兩細，4個餸好似唔多夠！不過一個減肥、一個病完未好返，仲有水果同蛋糕，應該夠食，我地買左一斤多D花竹蝦，好細隻，不過幾新鮮！另外買左條杉斑，買左先睇到有大條D！好友已經買左牛肉，加埋菜心，再去買豬扒，點知豬扒得返一舊，只有三塊，豬扒買少左，條魚又買細左，應該唔夠食！

買完餸返去洗洗切切，攪左一輪，蒸爐煲飯、蒸魚、蒸蝦，一個爐攪掂，爐頭一邊煎豬扒，一邊炒菜啱啱好，好友收工上來，剛好煮完即刻有得食，終於可以開餐！大家等得耐都肚餓，真係唔夠食！加上大廚整得好味，全部野清晒！

跟手食埋水果同蛋糕，水果買左韓國巨峰葡萄，同埋大大粒車厘子！好味！食飯時大家傾計，提到好友和男友已經正式分手了，五年感情頭也不回！花心男太可惡！不過好友亦開始約會其他男生，他們因為之前買了演唱會飛，下個月仲要一齊去，我諗再見只是普通朋友了！

#FOLLOWMi 鄭秀文世界巡迴演唱會香港站 2019

早在六月初，好友已經買到門票，有好野梗係預埋我，好開心可以去睇鄭秀文嘅演唱會，因為每次都買唔到飛，終於可以買到，去睇演唱會之前同好友去食咗飯先，我地在旺角東，去咗翡翠食小籠包，今日叫果個炒飯炒得好靚，但係我食唔到咁多，因為晏晝已經食得好飽，而且腸胃炎未好返晒，所以主要都係食咗D菜，食完野搭車去紅磡，例牌在紅館門口影下相，好友前幾日已經睇咗一次，今次已經係睇第二次，我地坐嘅位置都幾高，都有一段時間冇睇演唱會，對上一次係16年睇 Madonna，而上一次在紅館應該都係同同一個朋友，睇男人幫演唱會，當時嘅嘉賓係鄭秀文，今次終於可以睇鄭秀文嘅演唱會！

開場時間都算比較早，頭段主要係唱一D慢歌，亦都換咗幾套衫，跟住係近我哋呢邊升上舞台，效果好似降落傘一樣，非常之靚，見到佢着嘅杉就知道跟住會有嘉賓出場，因為連日來都有報道，知道着呢件歌衫就係嘉賓出場嘅時候，今晚嘅嘉賓係陳慧琳，佢都好耐冇出來唱歌了，講起佢個蝦餃仔原來已經10歲啦！嘉賓唱歌嘅時候就係 Sammi 換衫嘅時候，跟住唱左快歌，載歌載舞，氣氛當然係好high啦，佢仲搵咗一隊地下樂隊叫做鐵樹蘭，大玩 Heavy metal ！唱完快歌又再係慢歌，今次又係近住我地呢邊升上舞台，再唱多一轉快歌之後就完結，當然大家都會叫encore啦，不過今晚大家叫encore嘅氣氛唔係好夠，咁 Sammi 一定會出來再唱歌，唱左一段Medley，全部都係佢一D經典嘅舊歌，佢都有講佢第12、13場演唱會嘅歌酬，會捐畀幾個機構去做善事，我地呢場係第12場，即係話我哋都間接做咗善事，感覺開心D！而今次演唱會，佢哋都唔派發螢光棒比觀眾，因為環保關係，佢哋就推出左一個app叫做 inEvent ，只需要打開個Apps，佢就係一D閃動嘅燈光，會隨着舞台燈光轉換顔色，例如去到encore嘅部份，個app會提醒你要叫 encore，不過大部份人都要揸住個手機影相、拍片，所以根本冇時間去打開個app，今次佢唱完入返去之前已經講，要再 encore就叫大聲D，所以今次叫encore嘅聲大左好多，而最後呢段主要都係跳舞，唱歌嘅部份交俾和音去做，中間佢都有唱少少，但係主力都係跳舞，始終已經47歲，又唱又跳嘅時間一定冇以前咁多，有幾多個仲可以好似郭富城咁54歲仲開緊演唱會，又唱又跳呢？再講佢哋呢一輩嘅歌手都唔唱得幾多年，而家新一代嘅歌手又冇幾多個有佢哋咁嘅能力，真係買少見少！

The Butterfly Room @ Rosewood Hotel

星期一腸胃炎，病了幾天，胃口仍不好，但早在一個月前已經預約了這家餐廳，還是要去的，因為改期可能要等一個月，昨天餐廳已打電話給我 confirm booking，所以一定要去，幸好昨晚已可以正常食野，只是胃口仍不太好，不過下午茶份量應該不大！

去到尖沙咀，見到 K11 Musea 裝修得如火如荼，聽說八月尾會開業了，萬象觸目的商場，因為佔地大，而且香港久久沒有這麼大型商場開了，特別是尖沙嘴這地區，相信這裡會成為新地標！

這餐廳位於 Rosewood Hotel 內，這瑰麗酒店應該在三、四月已經開了，不過附近仍是地盤，所以除了入住酒店的旅客，應該不多人到過這裡，除了這裡的餐廳，因為 booking 這麼 full ，應該不少人到這裡餐廳吧！

去到酒店近 K11 Musea 旁的入口，原來只供住客使用，酒店大堂入口要乘車上斜路，或由斜路旁邊的樓梯行上去！我當然是後者！不過今日天氣好，而且有時間，可以慢慢地行上去，沿途見到車路旁是可以望到維港海景，挺不錯的風景，上到大堂入口見有些人等的士，我入去望下，見到大象擺設，便知到了餐廳外，聽說這大象的身價要千萬，一陣要欣賞一下！在大象旁邊先看見一些朱古力陳列在玻璃櫃內，旁邊便是餐廳了！

時間尚早，原本侍應叫我在外面坐一陣，但隨即又話有位了，這餐廳不大，數一數只有14張枱，當然有些是二人枱，有些是五六人枱，看看餐牌，除了下午茶，還有其他選擇，不過今日主要想試佢哋嘅下午茶，所以我哋都係叫咗下午茶，佢有五種食物，首先係鹹點，點心架上面有三文魚卷，鵝肝醬 lollipop 、叉燒酥、松露蛋撻等等，之後有一件五層的蛋糕片，當然唔少得 scone 同埋迷你 Madeleine ，之後侍應會推架 pastry trolley 過來，上面有拿破崙餅、手指餅、蘋果批等等，主要係一D焗嘅餅或者批，而另一架 trolley 就有甜點，有黑森林蛋糕、朱古力蛋糕、朱古力mousse 同幾款朱古力，其實我哋已經飽，所以叫佢切細件D嘅黑森林蛋糕，同埋朱古力蛋糕，亦都揀左幾粒朱古力，食到呢度侍應都提醒我地3:45 pm 要交枱，其實呢度根本沒有滿座，大概只坐咗六、七枱客，唔知點解要預咁早訂枱，基本上 walk in 都有位！邊度下午茶嘅價錢比一般酒店嘅下午茶為咗接近一倍，食物嘅質素當然係好高，特別係甜點方面，而且侍應嘅服務亦都好好，係高級手酒店嘅水準，而且環境好寧靜，個人挺喜歡這裏，且我最喜歡的 scone 也好好味！

飲完下午茶，在酒店外面行咗一圈，影咗少少相，就call車出咗去 DonDonki 行下，今次都係冇買到野，雖然唔使排隊入去，但係都係好多人！

金龍泰國菜館

今日入去屯門，因為今個月生日的好友住在屯門，好多時佢都要出九龍同我地食飯，今次因為想大家帶埋小朋友，有兩個小朋友都住屯門，所以我地班大人就入去，相約左好友們去呢間泰國菜館，位置有D偏僻，落咗車仲要行一段路，去到仲要等緊位，因為佢有一間房仔，可以坐多D人，雖然我地得11個人，但係佢間鋪真係好細，佢只係俾到張坐到10個人嘅枱我哋，實在太迫了，要等房仔果台客走咗我地先至有得入去，我地坐入去都係啱啱好，最多坐多一個，因為佢係長方形嘅枱，真係有少少迫，不過自成一國在房仔度都好嘅！

因為等枱等得耐左，大家都好肚餓，我哋叫咗生蝦刺身、泰式拼盤、炸蝦餅、無骨鳳爪、馬拉盞通菜、蒜蓉炒椰菜苗、菠蘿炒飯、冬陰公湯、豬頸肉、蒜蓉包同埋雞翼，個蒜蓉包好食，食左一round 仲要再encore ，食物都上得好快，我地好快食咗大半，然後先慢慢傾下計，我哋當中有兩個小朋友，年齡大概相差三、四年，之前仲好 friend，冇見一排就變得好陌生，一個啱啱升上中學，一個仲讀緊小學，成晚都冇傾計，因為喜好已經好大分別！

食完野成班大人傾左一輪計，就切蛋糕，蛋糕係附近嘅屋苑度買，好傳統果種屋村餅店，所以價錢比較實惠，而今餐亦都好平， 11個人當中有三個小朋友，扣埋生日果個唔使比，其實七個人夾錢，連埋蛋糕，每人唔使$200 ，真係好抵，唯一係比較遠D，不過搭返車出嚟都好快，係行去巴士站果條路足足要行左成10分鐘！

The Cheesecake Factory

呢兩日放假有D無聊，尋晚又失眠，今日出去尖沙咀行吓，今日又黃雨，所以商場入面好多人，好多食店都無位，行過呢間餐廳，之前一直想去試但係冇去到，今日行過竟然大把位，所以就入去試吓，餐牌食物嘅選擇好多，見到仲有午餐嘅Menu，所以叫咗個午餐食，揀咗檸檬雞扒配天使麵，味道都唔錯，食果陣都唔覺好飽，食完之後個芝士汁就好”漏”，搞到好飽，呢度食物嘅份量都幾大碟，真係要有幾個人一齊嚟食先至得！

上流寄生族 Parasite

基宇和父母及妹妹同住在半地下室，一家人因為找不到工作，只靠替薄餅店摺外賣盒維生，一天基宇的朋友前來探訪，他朋友因為要到外國留學，希望基宇能夠頂替他，替他的學生補習，因為他的女學生多惠是富家女，而且樣子甜美，他希望多惠升上大學後，便正式追求她，她擔心自己到了外地留學，其他人會有機可乘，所以搵自己信任的好友幫忙頂替，基宇到大宅見工後，屋主太太很滿意，同時間基宇見到多惠的弟弟多頌，有點過度活躍，太太和他談起多頌的情況，基宇便說推介一位治療師給他，於是叫妹妹姬晶假扮成治療師，成功得到太太的信任⋯⋯！

故事發展出人意表，前半段劇情有點搞笑，後段劇情緊張，一家人呃呃騙騙成功入屋，一家人寄生在這個上流家族中，反映出貧富懸殊，卻發生意想不到的事情，發展更是一發不可收拾！這套戲可以話係低成本製作，大部份劇情都發生在大宅內，劇情都緊湊，睇到都幾緊張，難怪能夠贏得康城金棕櫚大獎！