流浮山 - 明記酒家

好友生日飯，揀咗入元朗流浮山食，就晒壽星公近佢屋企，相約好友們在天水圍西鐵站等，在B出口出，在天橋底下面個巴士站，一齊搭K65巴士，大概10分鐘車程左右，去到總站就見到大大個牌坊寫住流浮山

落咗車見到得一間海鮮店，旁邊有個公廁，公廁隔離有條路行入去，呢度就好多海鮮酒家，同埋好多買手信、海產、乾貨嘅鋪頭，好多嘢賣，我地諗住食完飯先至出嚟睇吓有咩啱買，我地先諗左去邊間食先，上網搜查一輪，揀咗呢間明記酒家，我諗其實呢度幾間都係差唔多嘅嘢，主要係睇下佢門口果D海鮮啱唔啱食，因為你落單嘅時候，應該都係會响門口度揀海鮮，我哋叫咗豉椒炒蟶子、蒜蓉開邊蒸蝦、蒜蓉蒸扇貝、西芹炒班片、咕嚕肉、豆腐、炒飯，本來想食雞炸子雞，但係今日乜嘢雞都賣晒，所以改咗要咕嚕肉，因為男士們想要食D肉，叫豆腐係因為其中一個好友減緊肥，佢話淨係食海鮮同埋豆腐，雖然唔係叫咗好多嘢，不過都好飽，因為蟶子都好大隻，蝦同埋扇貝都有粉絲墊底，食埋都好飽，而且炒飯好大碟，每人可以有兩三碗，仲有橙，食埋蛋糕真係飽到不行！呢度啲嘢食整得好食，店員又友善，又好招呼，我哋冇叫啲貴價海鮮例如龍蝦、原條的魚，店員都唔會變面，人均消費都係三百幾蚊，下次可以再嚟！食完飯我地喺度傾計，傾左好耐，都有問到最近嚟咗分嘅好友，佢嘅家庭狀況，佢都好快冇事，繼續照顧自己嘅小朋友，希望佢早日搵返個女朋友啦！食完飯已經11點，出面嘅手信店已經收晒，應該話成條街都收晒，應該得返我地食既呢間未收，因為除咗我地，仲有幾枱客未走，出去搭返巴士去天水圍西鐵站，啱啱好搭到23:15 pm 果架K65尾班車，去到天水圍站，就分道揚鑣，我去搭巴士，佢哋搭西鐵，壽星公就去搭接駁巴士返屋企，雖然個路程都好遠，不過今次食得好開心，我地搭K65嘅時候仲喺度講，下次約埋一齊去澳門食buffet，希望真係可以去得成！