最後の平成

連日來，新聞都在倒數日皇裕仁退位的報導，以前冇為意日本的年號，年頭應該 plan 個日本行程橫跨兩個年代，不過日本因為咁而有十年休的假期，當中包含左佢日本嘅假期本身有嘅假期，所以佢本土都好多人去國內旅行，交通、酒店都比較緊張，可能機票、酒店房都會貴D！

既然個人去唔到日本，就喺香港食日本野補數，近近地去咗千両食壽司，聽日香港都係假期，所以假期前席都好多人，不過其實都係等左一陣間位，因為吧枱位好多人唔鍾意坐，而且好多人攞左飛見到有幾十個Number先到，都會即刻走，所以其實等左15分鐘左右已經有位，只係叫咗幾款壽司，食完之壽司後好想食雪糕，所以去咗Häagen-Dazs 買雪糕食，食埋杯雪糕，要同平成講拜拜喇！

大都烤鴨

就快到母親節，我地提早出黎慶祝，又去上個禮拜已經去過嘅大都烤鴨，呢度其實得三張大枱，有兩張係同一間房內，另外一張就自成一角，雖然去兩張枱果間房都必經過我地張枱，不過出入人唔多，所以都問題唔大，反正坐大廳都周不時人來人往，我地叫咗傳統嘅烤鴨，仲叫咗水晶鴨舌、牛肋肉、叉子燒餅、糖醋魚等，同上次食果D差唔多，甜品就一定要叫燕麥番薯，個個都話好食，食得好飽呢！

炑八韓烤

今日約咗好友去銅鑼灣食韓燒，記得早兩年去過尖沙咀分店，味道覺得一般，不過朋友想食，所以去食，我地叫咗個套餐，有豬腩肉、幾款唔同嘅牛肉部位、八爪魚、兩大塊白鱔、海鮮煎蛋餅、仲有個湯，味道比上一次好，個白鱔係由店員負責燒，燒得幾好食，佢可以燒到個魚皮脆脆地，魚肉啱啱好熟，如果自己燒一定做唔到咁好，上次冇食過呢個，今次食過覺得唔錯！

好友帶埋佢個女嚟，不過小朋友顧住玩電話，仲要坐姿好搞笑，不過影合照果陣時佢唔肯同我地影，所以只係偷偷影咗佢打機個樣，好搞笑！

Commissary

平時都好少去金鐘食飯，今日過咗去食lunch，去咗4樓呢一間餐廳，因為今日突然間好想食漢堡包，見到餐牌有，所以去咗食，店入面冇開冷氣，只係開咗風扇，今日天氣有D熱，係谷緊落雨果種熱，所以覺得冷氣應該要開，不過我地唔係食好熱嘅嘢，飲杯凍日都OK，我地叫咗一個set lunch同埋一個雙層芝士漢堡，午餐有一個沙律同埋一個牛面頰，沙律嘅菜都幾新鮮，漢堡包跟咗好大量薯條，牛肉係medium，味道唔錯！我地仲叫咗一個甜品，但係我唔記得叫咩名，感覺好似西式嘅高力豆沙咁，但係冇餡料，都幾好食！

復仇者聯盟 4 終局之戰 3D Avengers 4 Endgame

被困在太空的 Iron man 錄低最後嘅留言，因為氧氣只剩餘一天嘅用量，Nebula 無奈看著他奄奄一息，此時一道強光出現，原來是 Marvel 隊長，幸得到她及時出現，將Iron Man安全帶回地球，衆人找到 Thanos ，得知能量手套已經被毁滅，他們再沒有辦法將消失的人尋回......... 五年後，被困在量子領域的蟻俠，無意中被一隻老鼠釋放出來，才發現他原來離開了第五年了，但對他而言只是幾分鐘的事，他前往尋找復仇者們，認為他們可以用類似時光倒流方式返回人們消失前，各復仇者聯盟的超級英雄聚在一起，希望能回到 Thanos 找到寶石之前，改變歷史.........！

萬眾期待的電影，打破了多項紀錄，我們早在月頭差不多三個星期前已經買飛，片長三個多小時的，我們也不敢喝太多水，因為不想錯過任何一 part，老實說頭段確實有點悶場，因為見有幾個人都睇手機，當然最後果部分係最精彩，而且中間亦都有D搞笑位，未上映之前因為好多劇透都係估估下，演員們都沒有透露劇情，令到人更加想睇，而且之前已經睇咗咁多集，話明今集係終局，所以好多人都充滿期待，我個人認為我地期望太高，感覺上一集比較好睇D，當然結果係令人有點可惜，不過都覺得係時候喇！

J.S. Foodies

頭先去完銅鑼灣行街，諗住去利苑三期食返個幸福pancake，但係好長龍，所以冇排到，過返九龍去咗又一城，見到 IT入面果間pancake店，有位唔使點排隊，就入去食返個晚餐，呢間野其實等於希慎入面果間 Flippers，只係唔同名，都係喺IT入面，希慎果間我食過，呢間就成日見佢排長龍，見到餐牌除咗疏乎厘 pancake 仲有漢堡包同埋意粉，咁我就叫咗個意粉，同埋一個疏乎厘pancake ，個意粉好”漏”，勉勉強強食咗大半個，食剩兩啖都真係食唔落，但係甜品就唔同呀，而且疏乎厘 pancake都係一陣風，所以實有位食，不過味道就麻麻哋，唔夠幸福咁好食！

名館

復活節假期好快過咗，今日個去銅鑼灣，見到條街好多人，應該有好多學生仲放緊假，去咗希慎睇復仇者聯盟4嘅產品，聽日就正式上畫，由於係最終章，所以同佢相關嘅嘢都好 hot ，見到排好長龍，望下D產品亦都冇興趣，只係影吓相就算，人在希慎就上去樓上搵嘢食，去咗呢間食嘢，過咗午餐時間冇乜人，叫咗碗麵，同埋杯飲品，我坐個位置向着玻璃窗，可以望到街景，食物嘅味道就一般，我個碗是五菜麵，應該係五種唔同嘅蔬菜加咗落麵粉度做的，今日天氣算係唔錯，落咗幾日雨終於都有返D太陽，今日天氣預告明天又會再落雨落到下個禮拜！

新南苑

又去新南苑食雞煲，好友生日飯局，為咗要就其中一個在旺角返工，所以去旺角食，我哋先叫咗一個唔辣嘅雞煲，因為好友帶埋個女出嚟，佢個女只有九歲，所以唔叫辣嘅雞煲，唔辣嘅雞煲真係冇咁好食，應該話唔辣嘅雞煲先食到完味，證明的雞調味做得麻麻地，平時只係比辣味蓋過左！雞煲要煮8分鐘，煮得來就齊人喇，我哋只係食一煲，因為在坐個個都食得唔多，加上佢又整咗一盤蟹俾我哋，一共有五隻，有兩個唔食，所以我食咗兩隻，食完都已經飽飽地，跟住就嚟咗一盤海鮮，今日個海鮮就唔錯，蜆都幾大隻，係蟶子比較細隻，除咗海鮮仲有兩碟牛肉，其他配料就唔送上嚟，佢地改咗做法，等你落我打 order 先俾你，之前係唔係都比D丸之類嘅下欄嘢俾你，但係根本好多人都唔食，係食唔晒，而家咁樣做仲好唔使浪費食物，食完火鍋我地切埋蛋糕，食完蛋糕就坐喺度傾咗一陣間計，話題都離唔開前幾日發生嘅安心偷食事件，呢單野都真係幾震撼！