炸雞特攻隊 Extreme job

緝毒組組長連同下屬一共五個人，辦案經常錯漏百出，幾乎要解散全組人，在一個同輩升職的時候，提供了一個重犯的資料給他，於是他們五人到疑犯對面的炸雞店部署，希望能夠捕獲重犯，在此期間，生意冷清的炸雞店要結業，他們為了繼續監察疑犯的一舉一動，唯有頂手接了這家炸雞店，由於有人蝦到店內光顧，他們唯有硬着頭皮去做炸雞，豈料炸雞大受歡迎，令他們忙得無法查看...........！

今個禮拜都有好幾套戲上畫，都未諗到睇咩戲，見到呢套戲個影評唔差，所以去睇下先，近年都多左韓國電影，可能香港人都喜歡煲韓劇，所以韓國電影都受歡迎，套戲都幾搞笑，有場戲明明男主角喺度喊，都會令人覺得好好笑，不過我覺得可以再豐富D笑料，有D位可以做得再搞笑D，雖然有幾個位係悶悶地，但係整體都算係好笑！

Texas burger

放假睇返場戲先，睇戲之前當然要食D嘢啦，上咗朗豪坊搵嘢食，星期日周圍都好多人，見到呢間漢堡包店冇乜人，咁就試下佢啦！

呢度以前係一間咖啡店，都經營左一段時間，應該轉咗做漢堡包店唔係好耐，呢度有幾個卡位，其餘都係四方枱，今日都係得四、五枱客，我揀咗個車打芝士牛肉漢堡，同埋一杯橙汁，其實可以跟套餐要埋薯條同汽水，但係兩樣都唔係我嘅喜好，所以叫杯橙汁飲就算啦，見到個漢堡包有D失望，因為個麵包冇芝麻！最鍾意食有芝麻嘅麵包，芝士亦都唔算濃厚，牛肉就不過不失！

燒邦特色燒烤、晶晶甜品

好耐都冇去天后食嘢，呢日因為睇咗介紹，所以你就試吓，相約好友一齊去食，呢間小店真係好少，店內只有12個位，而且係幾逼夾，睇呢度的裝修好舊，應該開咗好耐，如果呢度開放式廚房嘅話，就可以加多幾張枱，今晚有三枱客，除咗我地兩個，另外一枱係三個人，另外一枱係六個，呢度主要係食串燒同埋海鮮，佢呢度有幾個魚缸養左D海鮮，不過唔多，主要都係貴價海鮮，例如龍蝦、鮑魚、花竹蝦，我地就叫咗兩隻扇貝，其他野都係每樣叫一串試吓先，叫咗白鱔、牛柳、芝心丸、雞翼等等，因為叫咗辣嘅所以有好多七味粉，太多七味粉唔係好食得到本身食物嘅味道，不過食材都唔差，飲品我哋就叫咗洛神花茶，不過佢係非常細樽，應該唔夠200 ml ，食辣野來講真係唔夠飲，所以要叫多支，其實佢有樽裝烏龍茶，但係夜晚我唔想飲茶，又唔想飲汽水，所以唯有叫多支 ，雖然我地傾計唔係好大聲，不過隔離枱果個男人講嘢好大聲，又同隔離果台六個人吹水，所以好嘈，我哋食完果陣，隔離兩枱都走啦，所以基本上一次過清場，不過佢之前有其他客想食野，就安排左坐係店外面路邊，落完兩天氣涼涼地，坐出邊應該都無所謂，而且呢段馬路唔係咁多車！

食完飯我地去食甜品，去咗斜對面有間叫做晶晶甜品，一人食咗一碗糖水就走！

龍華酒店

又有生日飯，好友二月生日，約唔到出來，改左三月，三月又有兩個生日，所以一次過三個一齊慶祝，本來今日可以齊人，點知有一個記錯日期，八欠一！

今日難得有兩架車，我地有諗過去遠D食，不過有一個話唔可以太夜，所以最後决定去沙田，本來想去陳根記，但係佢限食個半小時，於是改左去龍華食乳鴿！

印象中未去過龍華，就算有都應該耐到唔記得的N年前，呢度好舊，有條長樓梯行上去，樓梯兩邊掛左兩排紅燈籠，看來有點陰森，上到去同一般舊酒樓差不多，今晚只有三、四枱客，呢度大約有廿張枱，睇下餐牌，都係一般酒樓小菜，當然要叫最出名的乳鴿和雞粥，仲有菠蘿咕嚕肉、琵琶豆腐、炸大腸、豉油王炒麵等等，味道都OK，個菠蘿咕嚕肉有一D新鮮菠蘿伴碟，菠蘿就真係幾好食，乳鴿都好味，不過唔算係我食過嘅最好味，繼續加雞粥就煲得好綿！

我地一路食飯一路傾計，傾傾吓都講到大家對自己目前嘅工作，都有D厭倦或者想轉行，佢哋講到興致勃勃想自己做生意，主要都係講想搞小食店，不過大家都諗到自己創業嘅風險，同埋都知道會好辛苦，不過隨着年紀漸長，都覺得而家嘅工作睇唔到前景，不過，創業呢D嘢好多時都係得把口講，始終創業唔係咁容易，你睇人地做得成功，好似好簡單，其實一D都唔容易，始終要走出個 comfort zone 都要勇氣！

食飽飯諗住切蛋糕，點知原來好友冇買到蛋糕，不過我地都叫咗呢度嘅甜品，就係豆腐花，味道唔錯，我地叫咗一鍋，每人一碗啱啱好！

Chop Chop 食神叉燒

最近去北角發掘一下有乜嘢食，見到近住AIA 大廈附近果條街，都有好幾間食肆，今日去咗呢間試吓！

叫咗個暗然銷魂飯，有埋例湯，例湯嘅味道都唔錯，個蛋煎得個樣幾靚，叉燒個賣相都唔錯，食落口個味道都可以，佢比較重玫瑰露酒嘅味道，同埋落咗好多麥芽糖，所以表面好甜，只係略為肥左D！

百樂小館

今日相約一班好友，慶祝我地相識15周年，時間過得真係好快，估唔到我地咁快就已經識咗15年，睇返當年我地一齊去玩嘅相，真係變化好大，有三個近年都做左媽媽，當然亦有一兩個冇乜點變！

本來今次齊晒人，但係經常甩底果個甩底王，當然又甩底啦！真係可惜！

呢度好新淨，應該裝修冇幾耐，座位都唔算太多，今晚亦都唔滿座，我地叫咗幾個小菜，有椒鹽鮮魷、魚香茄子、滷水鵝片、椒鹽白飯魚、兩面黃等等，食物的質素都唔錯，不過碟頭比較細，相對來講價錢就偏貴，基本上食完都唔算好飽！不過我哋就食埋甜品，因為話呢度啲甜品都唔錯，我哋叫左幾款甜品，有湯圓、綠豆爽等等，味道唔錯，亦都唔會太甜，最後我哋影埋大合照，因為少咗一個人，所以我地用手機開咗佢張相，一齊影合照！

Urban coffee roaster by Galleon

去完花卉展覽又去飲杯野，行咗去百德新街果邊，見到有間賣傢俬嘅店舖，入邊有呢間coffee shop，又入去試吓囉！

呢度地方唔係好大，大概有20個位，我地叫咗一個羽衣甘藍沙律，同埋一個溫泉蛋藜麥厚多士，然後叫咗兩杯咖啡，一杯白咖啡同埋一杯 latte ，咖啡拉花都幾靚，同埋呢間野嘅咖啡係幾專業，食物嘅質素都唔錯，都係比較健康嘅選擇，下次可以再來試吓，呢度除咗有咖啡仲有一D相關嘅產品賣，不過選擇就唔係好多！

香港花卉展覽 2019

又到一年一度嘅花卉展覽，先去皇室堡食D嘢，去咗 Dazzling cafe 食飯，然後就即刻入場，今日天色唔係太好，完全冇太陽，而且密雲，不過都係好多人入場，而且大部份係老人家，同時亦都好多學生畫畫，呢幾年嘅佈置主要都係個幾個機構包辦，例如路政署、海洋公園等等，今年入口位係用花砌成嘅一列地鐵車身，後面亦都有火車路軌，同埋仲有個大埔墟站嘅牌，今年嘅主題係大紅花，所以每個佈置都有大紅花，至於其他嘅花同往年都係差不多，當然唔少得最多人嘅鬱金香田啦，不過今年嘅鬱金香就唔係咁靚啦，首先佢全部用橙色嘅鬱金香圍邊，只有少數黃色、紅色、粉紅色放咗喺中間位置，所以好難近距離拍攝，而且D花開得唔係太靚，所以只係影咗好少，感覺今年嘅佈置多咗，好似影景多過影花咁，不過果D佈置都有好多人影，好多是俾人遮住影唔到，或者影出嚟好多人！影左差不多兩小時就走喇！